Read KIMERU BIBLE PROTESTANT EDITION Josh 1 Bible Online

Josh 1 - KIMERU BIBLE PROTESTANT EDITION bible

Josh 1

¹Rîrîa Musa nthûûmba ya MWATHANI aakwîre, MWATHANI nî aarîîrie Joshua mûtaana wa Nuni, ûrîa waarî mûteethia wa Musa, aramwîra atîrî,

²“Musa, nthûûmba yaakwa, agûkua. Tontû bûû, ithuranîre nandî, gwe na kîrîndî gîkî kîonthe, buune rûûjî rûrû rwa Jorodani bwîte nthîgûrû îrîa nkwaa antû ba Israeli.

³ O antû onthe arîa bûgakinya na magûrû jeenu, nkabwaa o kûringana na ûrîa ndeerîre Musa.

⁴Nthîgûrû yeenu îkeethîrwa îrî kuuma rwanda mwanka Lebanoni, na kuuma mûuroone jûrîa mûnene jwa Eufurate mwanka nthî yonthe ya Ahiti, na mwanka bwa rûgûrû rwa îria rîa Mediterania.

⁵ Gûtî muntû ûkarîûmba gûkwirima matukû jonthe ja ûtûûro bwaaku. O ta ûrîa ndîraarî amwe na Musa nîo u nkethagîrwa ndî amwe naagwe; ntîkarîgûtiga kana nkwîrûkîra.

⁶ Gîta inya na ûgîe ûchamba, nîûntû nîgwe ûgaatûma antû baba baigwatîre nthî îrîa ndaaciîtîîrie biûjûjû biaao atî nkabaa.

⁷Bunka gwe gîta inya na ûgîe ûchamba buru, ûkîmenyagîîra kûthithia mantû kûringana na Waatho bunthe bûrîa waeerwe nî Musa nthûûmba yaakwa. Ûkábûtiga kinya anini nîkenda ûûmbanaga mantûûne jonthe kûrîa kunthe ûgeetaga.

⁸Aragia nteto irîa irî yukuune rîrî rîa Waatho magiita jonthe. Ningî ûthûgaanagie mantû jaarîo ûtukû na mûthenya nîkenda ûûmbaga kûthingata bwega jarîa jaandîki ku. Bûû nîbu bûgatûma njîra ciaaku ithinyaara na ûûmbanaga mantûûne jonthe.

⁹Anga tî ni ningwa ngûkwîra? Gîta inya na ûgîe ûchamba; ûgákîra kana wîja gûkua nkoro, nîûntû ni MWATHANI Mûrungu waaku ndî amwe naagwe o kûrîa kunthe ûgeeta.”

¹⁰Nîrîo Joshua aarîîrie atongeeria ba kîrîndî arabeera atîrî,

¹¹“Thiûrûkeeni kambî yonthe bûkîîraga antû atîrî, ‘Thuranîreni rîîgu nîûntû ntukû ithatû ikîthira bûkauna rûûjî rûrû rwa Jorodani, bûkûrûke nthîgûrû îrîa MWATHANI Mûrungu weenu akûbwaa yee yeenu.’”

¹² Ningî Joshua araarîria antû ba mwîrîga jwa Rubeni, na jwa Gadi, na nusu ya antû ba mwîrîga jwa Manase, arabeera atîrî,

¹³“Ririkaneeni rûteto rûrîa Musa, nthûûmba ya MWATHANI, aabwere rîrîa aabwîrîre atîrî, ‘MWATHANI Mûrungu weenu akûbwaa nthîgûrû îîjî yee antû eenu bûgatûûra bûnogoki.’

¹⁴Eekûrû beenu na aana beenu na ndîîthia cieenu ikaamba gûtîgwa nthîgûrû îrîa Musa aabwere rwongo rûrû rwa Jorodani rwa gaiti. Îndî arûme bonthe barîa boomba kûrûma mathaga ja ndwaa gatîgatîîne keenu nîbo bakauna barî mbere ya Aisraeli bau bangî, barî na mathaga jaao ja ndwaa, nîkenda bakabateethia,

¹⁵o mwanka rîrîa MWATHANI akaa Aisraeli bau bangî kînogoko na kinya buî, beethîrwe bûthirîtie kwigwatîra nthîgûrû îrîa MWATHANI Mûrungu weenu akûbaa. Rîu nîrîo bûgacoka nthîgûrû yeenu îrîa Musa nthûûmba ya MWATHANI abûeere rwongo rûrû rwa Jorodani ndeeria riûa riumagîîra.”

¹⁶Nabo baracokeria Joshua barauga atîrî, “Jau jonthe watwîra tûkaathithia, na kûrîa kunthe ûgatûtûma tûgeeta.

¹⁷O ta ûrîa twaathîkagîra Musa mantûûne jonthe, nou tûgakwathîkagîra. MWATHANI Mûrungu waaku arokaraga amwe naagwe o ta ûrîa aakaraga amwe na Musa!

¹⁸Muntû ûrîa wonthe ûkaregana na Waatho bwaaku, kana arege kwathîkîra ûrîa ûkamwîra, muntû ûu akooragwa. Tontû bûû, gwe gîa inya na ûchamba.”