Read KIMERU BIBLE PROTESTANT EDITION Josh 10 Bible Online

Josh 10 - KIMERU BIBLE PROTESTANT EDITION bible

Josh 10

¹Adonizedeki ûrîa waarî mûnene wa Jerusalemu nî aigîîrue ûrîa Joshua aarî agûtaa Ai na amîthiria buru na aathithîria Ai na mûnene waayo o ta ûrîa aathithîrîtie Jeriko na mûnene waayo. Ningî nî aamenyîre atî antû ba Gibeoni nî baarî bagûtuma thîîrî na antû ba Israeli na batûûranîra amwe nabo.

²Adonizedeki na antû baawe baragwatwa nî ûguaa bûbûnene nîûntû Gibeoni yaarî ntûûra înene, o ta îmwe ya ntûûra cia anene, na yaarî înene nkûrûki ya Ai, ningî antûarûme baayo bonthe baarî nchamba.

³Tontû bûû, Adonizedeki mûnene wa Jerusalemu, aratûmanîra Hohamu mûnene wa Heburoni, na Piramu mûnene wa Jaramuthi, na Jafia mûnene wa Lakishi, na Debiri mûnene wa Egiloni, na arabeera atîrî,

⁴“Njûûni bûnteethie kûrwaa na Gibeoni, nîûntû nî batumîte thîîrî na Joshua na antû ba Israeli.”

⁵Tontû bûû, anene bau ba Aamori bo-bataano; mûnene wa Jerusalemu, na mûnene wa Heburoni, na mûnene wa Jaramuthi, na mûnene wa Lakishi, na mûnene wa Egiloni, baroothûrania njûûrî ciaao amwe bareeta mwanka Gibeoni, baramîcîgîîria na baramiithûkîra.

⁶Nabo antû ba Gibeoni baratûmana kîrî Joshua kûu kambîîne ya Giligali baramwîra, “Menya ûûrîrua nî tuî nthûûmba ciaaku! Njû na mpwîî ûtwonokie! Tûteethie nîûntû anene bonthe ba Aamori barîa batwîre nthîgûrû ya irîma nî bagwatanîrîte na baatwithûkîra.”

⁷Tontû bûû Joshua arauma Giligali areetania na njûûrî yaawe yonthe, na nchamba ciaawe cionthe cia ndwaa.

⁸MWATHANI areera Joshua atîrî, “Ukaabakîra, nîûntû nî mbanenkanîrîte njareene ciaaku. Gûtî noo ûmwe waao ûkairikîria mbere yaaku.”

⁹Tontû bûû, Joshua na antû baawe bararaara gwîta ûtukû bunthe kuuma Giligali mwanka Gibeoni, nabo baraumîîra Aamori batîkûmenya.

¹⁰MWATHANI aratûma Aamori barigicana nî kûmaka boona njûûrî ya Israeli. Nabo Aisraeli barooragîra Aamori babaingî kûu Gibeoni, baracoka bareengana nabo na njîra îrîa iitîîtie bwa Bethihoroni, bareeta bakîbooragaga mwanka Azeka na Makeda.

¹¹Rîrîa Aamori baamatûkîte Aisraeli, bagûkinya mwînamoone jwa Bethihoroni MWATHANI nî eetîre akîbaurithagîria maiga jamanene mono ja ngai ya nchûgû mwanka barakinya Azeka. Barîa booragîrwe nî maiga jau nîbo baarî baingî nkûrûki ya barîa Aisraeli booragîte na nchiû.

¹²Ntukû îîu MWATHANI aanenkanîre Aamori bathirua nî Aisraeli, Joshua nî arîîrie MWATHANI arî mbere ya antû ba Israeli, nawe arauga: “Gwe, riûa, rûûngama ki îgûrû rîa Gibeoni naagwe mweri, ûrûngame îgûrû rîa Mûuro jwa Aijaloni.”

¹³ Narîo riûa rîrarûngama ki, naju mweri jûrakara o arîa jwaarî, mwanka rîrîa mûgongo jwa Israeli jwarîîkîrie kûûmbana kîrî maitha jaao. Mantû jaja najo nî jaandîki yukuune rîa “Jashari.” Riûa rîrarûngama îgûrû gatîgatî rîrarega kûthûa, rîrakara o ta rîa ntukû îmwe îmbûjûru.

¹⁴Mbere kana nyuma ya ntukû îîu gûtooneka ntukû îngî îrîa MWATHANI aathîkîra muntû ûtûûne ta bûû. MWATHANI nîka arûjagîîra Israeli.

¹⁵Nyuma ya mantû jau, Joshua amwe na antû ba Israeli bonthe baracoka kambîîne Giligali.

¹⁶Anene barîa ba Aamori bo-bataano nî baarî bakûmatûka mwanka Makeda baraiciitha gîkurunguune.

¹⁷Joshua aramenyithua mantû jau areerwa atîrî, “Anene barîa bo-bataano bakwonwa baiciithîte gîkurunguune kûu Makeda.”

¹⁸Joshua arauga atîrî, “Ingiritieni maiga jamanene jainge mwari jwa gîkurungu na bwîke antû bamwe o babakarie.

¹⁹Îndî buî bûgaakareni o. Înganeni na anthû bûbaûûre kuuma bwa nyuma, na bûkaareka beeja gûkûrûka ntûûreene ciaao, nîûntû MWATHANI nî abanenkanîrîte njareene cieenu.”

²⁰Joshua na antû ba Israeli nî booragîre Aamori mbûrago înene, akuî kûbathiria. Antû babakai nîbo batigarîre baramatûka barakûrûka ntûûreene irîa ciaarî imbirigîre na nthingo cia maiga.

²¹Nayo njûûrî yonthe ya Israeli îracoka thîîria kîrî Joshua kambîîne Makeda. Gûtî muntû wacoka kuuga ûntû no bûmwe bûbûthûûku bwegiî antû ba Israeli.

²²Joshua aracoka arauga atîrî, “Rugûreni mwari jwa gîkurungu bûrite anene bau bo-bataano bûbareete kîrî ni.”

²³Nabo barathithia u, bararita anene bau bo-bataano: mûnene wa Jerusalemu, na mûnene wa Heburoni, na mûnene wa Jaramuthi, na mûnene wa Lakishi, na mûnene wa Egiloni, barabaikia kîrî Joshua.

²⁴Rîrîa baikîrue kîrî Joshua, nî eetîre antû ba Israeli bonthe, na areera atongeeria ba njûûrî barîa beetanîtie nawe ndweene atîrî, “Îjaîjeni aja bûkinye anene baba nkingo na makinya.” Nabo bareejaîja, barakinya anene bau nkingo.

²⁵Joshua arabeera atîrî, “Bûgákîra kana bûkua nkoro; îndî gîeni na inya na ûchamba, nîûntû o ûu nîu MWATHANI akaathithagîria anthû beenu bonthe barîa bûkaarûjaga nabo.”

²⁶Joshua aracoka arabooraga, na arabacuuria mîtîîne îtaano barakara o mwanka ûgoro.

²⁷Riûa rîkîthwa, Joshua arauga bacuurûkue, nabo baracuurûkua mîtîîne na baragerwa gîkurunguune kîrîa baiciithîte mbere, nabo bareeka maiga jamanene mwariine jwa gîkurungu, najo no jatwîre o mwanka naarua tûrî.

²⁸O ntukû îîu Joshua nî aataîre ntûûra ya Makeda na arooraga antû bonthe bayo amwe na mûnene waayo na rûchiû. Gûtî muntû watigara arî mwoyo kinya ûmwe. Ningî arathithîria mûnene wa Makeda o ta ûrîa athithîrîtie mûnene wa Jeriko.

²⁹Rîu Joshua na njûûrî ya Israeli yonthe baracoka barauma Makeda bareeta ntûûra ya Libuna baramiithûkîra.

³⁰MWATHANI aramîeejana kinya yo amwe na mûnene waayo njareene cia Israeli. Joshua arooraga antû baayo bonthe na rûchiû atîtigie kînya ûmwe. Aarathithîria mûnene waayo o ta ûrîa aathithîrîtie mûnene wa Jeriko.

³¹Joshua na njûûrî ya Israeli yonthe barauma Libuna bareeta ntûûra ya Lakishi, baramîcîgîîria, na baramiithûkîra.

³²MWATHANI aranenkanîra Lakishi njareene cia Israeli, nabo baramîtaa ntukû ya ijîîrî, barooraga antû baayo bonthe na nchiû o ta ûrîa bathithîrîtie Libuna.

³³Horamu mûnene wa Gezeri, areeja gûteethia Lakishi. Îndî Joshua aramûûraga amwe na antû baawe arabathiria buru.

³⁴Kuuma Lakishi, Joshua nî aacokîre areeta amwe na njûûrî yonthe ya Israeli mwanka ntûûra ya Egiloni. Baramîcîgîîria na baramiithûkîra.

³⁵Nabo baramîtaa o ntukû îîu, na barooraga antû barîa baarî ku bonthe na rûchiû o ta ûrîa bathithîrîtie Lakishi.

³⁶Joshua na njûûrî ya Israeli yonthe barauma Egiloni bareeta Heburoni baramiithûkîra.

³⁷Nabo baramîtaa, barooraga mûnene, na antû bonthe ba ntûûra îîu, na ba tûtûûra tûrîa twacîgîîrîîtie ntûûra îîu. Barabathithîria o ta ûrîa baathithîrîtie Egiloni. Gûtî muntû kinya ûmwe baatigaria.

³⁸Joshua na njûûrî ya Israeli bonthe baracoka baraithûkîra ntûûra ya Debiri.

³⁹Baramîtaa amwe na mûnene waayo na tûtûûra tûrîa twamîcîgîîrîîtie tûnthe. Barabooraga na nchiû batîtigie muntû kinya ûmwe. Joshua arathithîria Debiri na mûnene waayo o ta ûrîa athithîîrîîtie Heburoni na Libuna na anene baacio.

⁴⁰Ûu nîu Joshua oombîre gûtaa nthîgûrû îîu yonthe, gûntû kûrîa kûrî irîma, na nthîgûrû îrîa îrî bwa ûmotho bwa Juda, na mûgwanthî na ibariine, na kinya anene ba gûntû kûu bonthe arabathiria. Gûtî gîntû kîrî mwoyo gîatigara kînya kîmwe. No kûthirua biathirîrue buru o ta ûrîa MWATHANI Mûrungu wa Israeli aathanîte.

⁴¹Tontû buû, Joshua aroombana kuuma Kadeshi-barinea mwanka Gaza, na nthîgûrû yonthe ya Gosheni, gûkinya Gibeoni.

⁴²Joshua nî oombîre anene bau bonthe na arataa nthî ciaao o rîmwe nîûntû MWATHANI Mûrungu wa Israeli nî aarûjagîîra Israeli.

⁴³Rîu nîrîo Joshua amwe na njûûrî yonthe ya Israeli baacokere kambîîne Giligali.