Read KIMERU BIBLE PROTESTANT EDITION Josh 11 Bible Online

Josh 11 - KIMERU BIBLE PROTESTANT EDITION bible

Josh 11

¹Rîrîa Jabini mûnene wa Hazori aigîîrue nteto cia kûûmbana gwa Israeli, nî aatûmanîre kîrî Jobabu mûnene wa Madoni na mûnene wa Shimuroni na mûnene wa Akishafu.

²Ningî nî aatûmanîre kîrî anene barîa baatwîre nthî ya irîma rûteere rwa ûrîo na bwa Araba rûteere rwa ûmotho rwa Kinerethi na mûgwanthîîne na Nafothidori bwa rûgûrû,

³na kîrî Akanaani barîa baarî bwa gaiti na barîa baarî bwa rûgûrû. Ningî aratûmana kîrî Aamori na Ahiti na Aperizi na Ajebusi barîa baatwîre irîmeene, na Ahivi barîa baatwîre ruungu rwa kîrîma kîa Herimoni nthîgûrû ya Mizipa.

⁴Nabo baraumagara na njûûrî ciaao cionthe. Nabo baingîîte o ta mûthanga jwa rûteere rwa îria. Nî baarî na mbarathi na ngaarî cia ndwaa inyiingî mono.

⁵Anene bau bonthe baroothûrania njûûrî ciaao bareeta baraamba kambî kûu kîthimeene kîa Meromu nîkenda barwaa na Israeli.

⁶MWATHANI areera Joshua atîrî, “Ûkábakîra, nîûntû gûgîkinya thaa ta iji rûûjû, nkabanenkanîra kîrî Israeli barî baakuû bonthe. Naabuî bûkaunanga mbarathi ciaao magûrû na bûîîthie ngaarî ciaao na mwanki.”

⁷Tontû bûû, Joshua na njûûrî yaawe yonthe nî baithûkîîre antû bau nau kîthimeene kîa Meromu batîkûmenya.

⁸MWATHANI arabanenkanîra njareene cia Israeli. Aisraeli bareengana nabo bakîbooragaga mwanka Sidoni îrîa nene na Misirefothi-maimu na bwa gaiti mwanka mûuro jwa Mizipe. Barabathiria buru na gûtî we waatigara.

⁹Joshua arabathithîria o ûrîa MWATHANI aamwîrîte. Araunanga mbarathi ciaao magûrû na araîîthîîria ngaarî ciaao na mwanki.

¹⁰Nyumeene Joshua na antû baawe nî beetîre barataa ntûûra ya Hazori, na barooraga mûnene waayo na rûchiû. Ntûûra ya Hazori nîyo yatwîre îrî na inya nkûrûki ya moonene jau jangî jonthe ja gûntû kûu.

¹¹Barooraga antû barîa baarî ku bonthe buru batîtigie noo ûmwe arî mwoyo, ningî baraîîthia ntûûra ya Hazori na mwanki.

¹²Joshua arataa ntûûra cia anene bau cionthe amwe na anene beene, arabooraga na rûchiû akîbathiragia buru ta ûrîa Musa nthûûmba ya MWATHANI, aaugîîte.

¹³Îndî ntûûra îrîa ciaaki maganjoone, gûtî yo Israeli yaaîîthia tiga Hazori yonka Joshua aaîîthirie.

¹⁴Antû ba Israeli nî baataîre into bionthe bia ntûûra îîu amwe na nyomoo cia ndîîthia. Îndî Aisraeli barooraga antû ba ntûûra iu bonthe na rûchiû barabathiria buru batîtigie noo ûmwe arî mwoyo.

¹⁵Mantû jarîa jonthe MWATHANI eerîte nthûûmba yaawe Musa, nîo jo Musa eerîre Joshua, nawe Joshua arajaingia. Gûtî ûntû kinya bûmwe aatigia atîthithîtie bwa jarîa jonthe MWATHANI eerîte Musa.

¹⁶Nthîgûrû iji nîcio Joshua aataîre: gûntû kûrîa kûrî irîma, na nthîgûrû îrîa îrî bwa ûmotho bwa Juda yonthe, na nthîgûrû yonthe ya Gosheni, na mûgwanthî, na kîguuru kîa rûûjî rwa Jorodani, na nthîgûrû îrîa îrî irîma ya Israeli, amwe na igwanthî biaayo;

¹⁷kuuma kîrîma kîa Halaki kîrîa giitîîtie bwa Edomu mwanka Baali-gadi mûguuruune jwa Lebanoni, gaiti ka Kîrîma kîa Herimoni. Joshua aragwata anene ba nthîgûrû îîu yonthe na arabooraga.

¹⁸Joshua nî aarwîte ndwaa yaawe na anene ba gûntû kûu îgiita rîrîraaja.

¹⁹Gûtî antû ba ntûûra îngî batuma thîîrî na antû ba Israeli tiga Ahivi barîa baatûûraga Gibeoni. Aisraeli baataîre ntûûra iu ingî cionthe ndweene.

²⁰ Nî MWATHANI Mweneinya waatûmîte nkoro cia antû bau ciûma nîkenda barwaa na Israeli nabo bathirua buru batîkwigîrîîrua kîaao o ta ûrîa MWATHANI eerîte Musa.

²¹O îgiiteene rîu, Joshua nî eetîre arooraga imuntû birîa bietagwa Anakimu[4] kuuma irîmeene, na Heburoni, na Debiri, na Anabu, na îrîmeene bia Juda na Israeli bionthe, arabathiria buru amwe na ntûûra ciaao.

²²Gûtî Anakimu baatigarîre nthîgûrûûne ya antû ba Israeli. No babakai baatigarîre Gaza na Gathi na Ashidodi.

²³Joshua nî aataîre nthî îîu yonthe, o ta ûrîa MWATHANI eerîte Musa. Nawe aramînenkanîra kîrî antû ba Israeli ta rûgai rwaao, aragaîra o mwîrîga gîchunchî kîaaju. Nayo ndwaa îrathira, kûragia thîîri nthî îîu.