Read KIMERU BIBLE PROTESTANT EDITION Josh 13 Bible Online

Josh 13 - KIMERU BIBLE PROTESTANT EDITION bible

Josh 13

¹Joshua nî aarî agûkûra aatindira. MWATHANI aramwîra atîrî, “Ûûgwe ûgûkûra, îndî nthîgûrû nayo no îtigeere îînene ya gûtaa.

²Nayo nthîgûrû îrîa îtigeere nîyo îîjî: nthî yonthe ya Filisti na Geshuri.

³Geshuri îrîa yaataragwa îrî ya Akanaani nî kuuma karûûji ga Shihori, mwankeene jwa Misri, gwîta bwa ûrîo mwanka mwankeene jwa Ekironi. Nabo anene ba Afilisti baatwîre Gaza na Ashidodi na Ashikeloni na Gathi na Ekironi. Ningî kinya nthî yonthe ya Avimu bwa ûmotho nî itigeere îtîtai.

⁴Ningî kûrî nthîgûrû yonthe ya Akanaani na Meara bwa ûmotho îtigeere, nayo nî nthîgûrû ya Asidoni, gwîta mwanka Afeki mwankeene jwa Aamori.

⁵Ningî nthîgûrû ya Agebali na Lebanoni yonthe bwa riumîîro rîa riûa, kuuma Baali-gadi, îrîa îrî rûteere rwa ûmotho rwa Kîrîma kîa Herimoni, mwanka mûcîcîbîroone jwa gwîta Hamathi.

⁶ Kinya nthî yonthe ya Asidoni, barîa batwîîre nthî ya irîma kuuma irîmeene bia Lebanoni mwanka Misirefothi-maimu, nkeenga antû bau bonthe mbere ya antû ba Israeli. Gwe no kûgaa ûkagaîra antû ba Israeli nthî îîu o ta ûrîa nkwîrîte.

⁷Nandî gaanîria nthî îîjî mîîrîga îrîa îngî kenda amwe na nusu ya mwîrîga jwa Manase yee rûgai rwaao.”

⁸ Mwîrîga jwa Rubeni na jwa Gadi amwe na nusu ya mwîrîga jwa Manase nî baarî bakwigwatîra kiigai kîaao kîa nthîgûrû îrîa Musa, nthûûmba ya MWATHANI, aabanenkeere rwongo rwa mûuro jwa Jorodani bwa gaiti.

⁹Nayo nthî yaao yaakinyîte Aroeri, rûteere rwa kîguuru kîa Arinoni ntûûra îrîa yaarî gatîgatî ka mûgwanthî jûu, kûgwatana na bûûrî îrîa ing'ananîrîtie kuuma Medeba mwanka Diboni.

¹⁰Ningî îgakinya mwankeene jwa Aamoni îjûkîtie ntûûra cionthe irîa ciaathagwa nî mûnene Mûamori weetagwa Sihoni, ûrîa waathanaga arî Heshiboni.

¹¹Yaarî amwe na Gileadi, Geshuri na Maaka, na Kîrîma kîa Herimoni kîonthe na Bashani yonthe mwanka Saleka.

¹²Ningî îkajûkia waathani bunthe bwa Ogi mûnene wa Bashani ûrîa waathanaga Ashitarothi na Edirei. Nîwe wenka watigeere kîrî antû ba Refaimu barîa Musa aarî akûrwaa nabo abeenga kuuma nthî îîu.

¹³Îndî antû ba Israeli bateenga Ageshuri na Amaaka. Tontû bûû, Ageshuri na Amaaka batûûranagia na Aisraeli mwanka naarua tûrî.

¹⁴ Mwîrîga jwa Lawi nîo ju junka Musa atagaîra nthîgûrû nîûntû MWATHANI nî aamwîrîte atî nî bagaîri gîchunchî kîmwe kîa igongwana bia gwakîîrua birîa bikaritagîrwa MWATHANI Mûrungu wa Israeli, na rûu nîru rûgai rwaao.

¹⁵Musa nî aeere antû ba mwîrîga jwa Rubeni rûgai rwaao kûringana na mîciî yaao.

¹⁶Nthîgûrû yaao yaarî kuuma Aroeri, rûteere rwa kîguuru kîa Arinoni na ntûûreene îrîa îrî kîguuruune kîu gatîgatî îkagwata îrîa îng'ananîrîtie yonthe gwîtîîra bwa Medeba.

¹⁷Ningî îkajûkia Heshiboni na ntûûra ciaayo cionthe irîa irî nthîgûrû îrîa îng'ananîrîtie nacio nî: Diboni, na Bamothi-baali, na Bethibaalimeoni,

¹⁸na Jahazi, na Kedemothi, na Mefaathi,

¹⁹na Kiriathaimu, na Sibuma na Zerethishahari, ntûûra îrîa îrî karîmeene karîa karî mûguuruune.

²⁰Ningî îkajûkia Bethipeori, na mwînamo jwa kîrîma gîa Pisiga na Bethijeshimothi.

²¹Nthîgûrû îîu yajûkagia ntûûra cionthe irîa irî nthîgûrû îrîa îng'ananîrîtie na ûnene bunthe bwa Sihoni, mûnene wa Aamori ûrîa waathanaga Heshiboni. Musa nî aarî akûmîûmba ndweene amwe na anene ba Midiani barîa baathaga nthîgûrû barî rungu rwaawe, nabo beetagwa Evi, na Rekemu, na Zuri, na Huri, na Reba.

²²Kinya Balaamu mûtaana wa Beori ûrîa waarî mûringia nî ooraganîrue amwe na antû bangî nî Aisraeli.

²³Mûuro jwa Jorodani nîju jwaarî mwanka jwa mwîrîga jwa Rubeni bwa rûgûrû. Ntûûra iu, nene na nini nîcio ciaeerwe mwîrîga jwa Rubeni kûringana na mîciî yaao îraa rûgaî rwaao.

²⁴Musa nî aaere kinya mwîrîga jwa Gadi, rûgai rwaao rwa nthîgûrû kûringana na mîciî yaaju.

²⁵Nthîgûrû yaao yajûkagia Jazeri na ntûûra cionthe cia Gileadi, na nusu ya nthîgûrû ya Aamoni o mwanka Aroeri îrîa yaategeene na Raba gwa gaiti.

²⁶Nthîgûrû yaarî kuuma Heshiboni gwîta Ramathi-mizipe na Betonimu, na kuuma Mahanaimu gwîta mwankeene jwa Debiri.

²⁷Kîguuruune kîa Jorodani îkajûkia Bethiharami na Bethinimura na Sukothi, na Zafoni, na nthîgûrû îrîa yatigeere ya ûnene bwa Sihoni, mûnene wa Heshiboni. Mwanka jûrî Rûûjî rwa Jorodani gwîta mwanka gîturi kîa nthî kîa Îria rîa Kinerethi[6]

²⁸Iu nîcio ntûûra inene na inini irîa ciagaîîrwe mîciî ya mwîrîga jwa Gadi.

²⁹Musa nî aaere kîagatî kîa mwîrîga jwa Manase rûgai rwaao rwa nthîgûrû kûringana na mîciî yaaju.

³⁰Nthîgûrû yaao yaambagîîria Mahanaimu îkajûkia Bashani yonthe, nayo nî ûnene bunthe bwa Ogi, ûrîa waarî mûnene wa Bashani, o amwe na ntûûra cionthe mîrongo îtaantatû cia Jairi irîa ciaarî cia Bashani.

³¹Ningî îkajûkia nusu ya Gileadi, na Ashitarothi na Edirei, ntûûra irîa ciaarî nene kûu Bashani kûrîa Ogi aathanaga. Nthîgûrû îîu yonthe nîyo yagaîîrwe nusu ya nchiarwa cia Makiri mûtaana wa Manase, kûringana na mîciî yaao.

³²Ûu nîu Musa agaanîrie nthîgûrû bwa gaiti ya Jeriko na Jorodani rîrîa aarî bûûrîîne ya Moabu.

³³ Îndî gûtî rûgai rwa nthîgûrû Musa aanenkeere mwîrîga jwa Lawi nîûntû MWATHANI Mûrungu wa Israeli nîwe waarî rûgai rwaao o ta ûrîa abeerîte.