Read KIMERU BIBLE PROTESTANT EDITION Josh 14 Bible Online

Josh 14 - KIMERU BIBLE PROTESTANT EDITION bible

Josh 14

¹Ûjû nîu nthîgûrû ya Kanaani yagaîîrwe antû ba Israeli îrî rûgai rwaao nî Eleazari, ûrîa waarî mûthînjîri-Mûrungu, na Joshua, mûtaana wa Nuni, na atongeeria ba mîciî ya mîîrîga ya Israeli.

² Mîîrîga kenda na nusu yagaîîrwe nthîgûrû îîu na njîra ya kûringa kuura ûrîa MWATHANI eerîte Musa.

³ Musa nî aarî akwaa mîîrîga îîrî na nusu rûgai rwaao rwongo rwa Jorodani rwa gaiti îndî gûtîbio aeere Alawi nao.

⁴Nchiarwa cia Josefu ciaarî mîîrîga îîrî, Manase na Efuraimu. Gûtî rûgai rwa nthîgûrû rwaeerwe Alawi, tiga ntûûra cia gûtûûra, na bieni biaacio nîûntû bwa kûrîîthagia na nîûntû bwa rûmatho rwaao.

⁵Nabo antû ba Israeli nî baagaanîrie nthîgûrû o ûrîa ungwa MWATHANI eerîte Musa.

⁶ Nabo antû ba Juda nî beetîre kîrî Joshua kûu Giligali, na Kalebu mûtaana wa Jefune ûrîa waarî Mûkenizi, areera Joshua atîrî, “Gwe nî ûkûririkana bûrîa MWATHANI eerîîrîte Musa muntû wa Mûrungu Kadeshi-barinea mantû jakwegiî na jambegiî.

⁷ Ûûni ndaarî na ûkûrû bwa mîaka mîrongo îna rîrîa Musa nthûûmba ya MWATHANI, aantûmîre kuuma Kadeshi-barinea mbîta gûcûnkûûna nthîgûrû. Naani nî ndacokere ndîramwîra mantû jarîa ndoonete o ûrîa jaakari.

⁸Nabo ataana ba baaba barîa twatûmi nabo nî beekîîre kîrîndî ûguaa, îndî ûûni nî ndathîkîîre MWATHANI Mûrungu waakwa buru.

⁹ Musa nî anciîtîîrie ntukû îîu arauga atîrî, ‘Nî mma nthîgûrû yonthe îrîa ûrakinyîre na magûrû jaaku îkaa rûgai rwaaku na rwa aana baaku mwanka kenya nîûntû gwe nî ûraathîkîîre MWATHANI Mûrungu waakwa buru.’

¹⁰Naandi tega, MWATHANI no ambîkîte mwoyo o ta uûrîa augîre mîaka îîjî mîrongo îna na îtaano kuuma rîrîa eerîre Musa mantû jau, rîrîa Aisraeli baarî rûgendoone rwanda. Atîrî, nandî naarua tûrî ndî na mîaka mîrongo înaana na îtaano.

¹¹Îndî amwe na bûu, ndî o na inya naarua tûrî o ta ntukû îrîa Musa aantûmîte. Ndî na inya kinya ya gwîta ndweene kana ya kûthithia ûntû bûngî.

¹²Tontû bûû, naandi nenkera nthî îîjî ya irîma îrîa MWATHANI aambîrîîre. Ntukû îîu nî waigîrue ûrîa Anakimu baarî nthî îîu na ûrîa ntûûra ciaao ciaarî inene na imbirigîre na nthingo. Îndî nkabeenga ku o ta ûrîa MWATHANI aaûgîre, MWATHANI eethîrwa arî amwe naani.”

¹³Joshua nawe aratharima Kalebu, mûtaana wa Jefune, na aramwaa Heburoni îrî rûgai rwaawe.

¹⁴Tontû bûû Heburoni îraa ya Kalebu, mûtaana wa Jefune, Mûkenizi kuuma ntukû îîu mwanka naarua tûrî nîûntû bwa ûrîa aathîkîîre MWATHANI Mûrungu wa Israeli.

¹⁵Mbereene, Heburoni yeetagwa Kiriathiaraba. Ariba nî riîtwa rîa muntû ûrîa waarî ûmûnene nkûrûki ya Anakimu bangî. Naku kûragîa thîîrî nthîgûrûûne îîu.