Read KIMERU BIBLE PROTESTANT EDITION Josh 16 Bible Online

Josh 16 - KIMERU BIBLE PROTESTANT EDITION bible

Josh 16

¹Mwanka jwa ûmotho jwa nchiarwa cia Josefu jwaumaga Jorodani, akuî na Jeriko, gaiti ka ithima bia Jeriko gwîta bwa rwanda. Kuuma Jeriko, mwanka jwaitagia bwa nthî ya irîma mwanka Betheli.

²Kuuma Betheli jwetaga mwanka Luzi, na jûgakinya Atarothi kûrîa Araki baatwîre.

³Kuuma au jwetaga bwa rûgûrû jûgakinya nthî ya Ajafleti na jûgeeta mwanka Bethihoroni ya gaiti. Kuuma au jûgeeta Gezeri, naju jûkathirîra îria rîa Mediterania.

⁴Îîu nîyo nthîgûrû îrîa nchiarwa cia Josefu, cia mwîrîga jwa Efuraimu na nusu ya mwîrîga jwa Manase ciagaîîrwe.

⁵Nthîgûrû îrîa mîciî ya mwîrîga jwa Efuraimu yagaîîrwe yakari ta ûjû: mwanka jwaao jwaumaga Atarothi-adari jûkeerekera bwa gaiti mwanka Bethihoroni ya bwa rûgûrû,

⁶na kuuma au jûgeeta mwanka îria rîa Mediterania. Rûteere rwa bwa ûrîo baarigeenie na Mikimethathi. Kuuma au, mwanka jûkathiûrûka bwa gaiti jwerekerete Taanathi-shilo jûgakûrûka jûgakinya bwa gaiti ya Janoa.

⁷Jûgacoka jûkeenama kuuma Janoa jûgeeta Atarothi na Naara, jûkaringithia Jeriko na jûkathirîra Jorodani.

⁸Kuuma Tapua mwanka jwetaga bwa rûgûrû mwanka Karûûjîîne ga Kana na jûkathirîra îrieene rîa Mediterania. Îîu nîyo nthîgûrû îrîa yagaîîrwe mîciî ya mwîrîga jwa Efuraimu, îrî rûgai rwaao.

⁹Amwe na nthîgûrû îîu antû ba Efuraimu nî baagaîri ntûûra imwe ndeene ya nthîgûrû ya Manase.

¹⁰ Îndî bo bateengîre Akanaani barîa baatûûraga Gezeri. Tontû bûû Akanaani batwîre amwe na antû ba Efuraimu naarua tûrî, bakîritithagua ngûgî barî nkombo.