Read KIMERU BIBLE PROTESTANT EDITION Josh 17 Bible Online

Josh 17 - KIMERU BIBLE PROTESTANT EDITION bible

Josh 17

¹Îîjî nîyo nthîgûrû îrîa yagwîrîîre Manase. Manase nîwe mwana wa kîranga wa Josefu. Makiri mwana wa kîranga wa Manase nîwe waarî îthe wa Gileadi, na nî aaerwe nthîgûrû ya Gileadi na Bashani nîûntû aarî nchamba ya ndwaa.

²Nchiarwa cia Manase iu ingî nî ciagaîîrwe nthîgûrû îrîa yabagwîrîîre kûringana na mîciî yaaju. Nacio nî nchiarwa cia Abiezeri, na cia Heleki, na cia Asirieli, na cia Shekemu, na cia Heferi, na cia Shemida. Bau nîbo baarî ataana ba Manase mûtaana wa Josefu kûringana na mîciî yaao.

³Zelofehadi ataarî na ataana tiga aarî akî. Zelofehadi aarî mûtaana wa Heferi. Heferi aarî mûtaana wa Gileadi. Gileadi aarî mûtaana wa Makiri. Makiri aarî mûtaana wa Manase. Aarî bau nabo beetagwa Mahala, na Noa, na Hogila, na Milika, na Tiriza.

⁴ Nabo nî beetîre kîrî Eleazari ûrîa waarî mûthînjîri-Mûrungu, na Joshua mûtaana wa Nuni, na atongeeria barabeera atîrî, “MWATHANI eerîre Musa atwee rûgai amwe na ataana ba baaba.” Tontû bûû, baragaîrwa nthîgûrû amwe na ataana ba îthe ba mwîrîga jwa Manase kûringana na ûrîa MWATHANI augîîte.

⁵Ûu nîu mwîrîga jwa Manase jwagwîrîîrwe nî ichunchî îkumî, bia nthîgûrû, gûtîgûtarwa nthî ya Gileadi na Bashani îrîa yaarî Rwongo rwa Jorodani rwa bwa gaiti,

⁶nîûntû nchiarwa cia Manase cia aarî na ataana ciagaîîrwe nthîgûrû o ûmwe. Nthî ya Gileadi yagaîîrwe nchiarwa iu ingî cia Manase.

⁷Mwanka jwa nthîgûrû ya Manase jwaumaga Asheri jûgeeta mwanka Mikimethathi bwa gaiti ya Shekemu, jûgacoka jûgeeta bwa ûmotho jûkajûkia nthîgûrû îrîa antû ba Entapua batûûraga.

⁸Nthî ya Tapua yaarî ya Manase, îndî ntûûra ya Tapua, mwankeene jwa Manase, yaarî ya antû ba Efuraimu.

⁹Mwanka naju jwaumaga au jûkeenama jûgakinya karûûjîîne ga Kana. Nacio ntûûra irîa ciaarî rûteere rwa ûmotho rwa karûûjî kau ciaarî cia antû ba Efuraimu kinya keethîrwa ciaarî nthîgûrû ya Manase. Mwanka jûu naju jwagitagîîra rûteere rwa ûrîo rwa karûûjî ga Kana jûgeeta kûthirira îrieene rîa Mediterania.

¹⁰Nthîgûrû ya Efuraimu yaarî bwa ûmotho nayo nthîgûrû ya Manase bwa ûrîo, narîo îria rîa Mediterania rîrî mwanka jwaao jwa rûgûrû. Igacoka igacemanîria Asheri rûteere rwa ûrîo na Isakari bwa gaiti.

¹¹Ningî mwîrîga jwa Manase nî jwajûkagia ntûûra imwe iria ciaarî ndeene ya Isakari na Asheri, nacio nî Bethisheani na Ibileamu amwe na tûtûûra twaacio, ningî jûkajûkia Dori, na Edori, na Taanaki na Megido, amwe na tûtûûra twaacio. Biu biaarî îchunchî bithatû.

¹² Îndî antû ba Manase batoombîre kwînga antû ba ntûûra iu. Tontû bûû, Akanaani bareeta na mbere gûtûûra ku.

¹³Îndî rîrîa antû ba Israeli baagîtîre inya nî baambîrîîrie kûbaritithagia ngûgî îndî bataabeenga buru.

¹⁴Nchiarwa cia Josefu ireera Joshua atîrî, “Nîmbi yatûma ûtûgaira gîchunchî kîmwe akî kîa nthîgûrû kîrî rûgai rweetû na ûkwona ûrîa MWATHANI atûtharimîte mwanka nandî twaingîa?”

¹⁵Joshua arabacokeria ûjû, “Këethîra nthîgûrû ya irîma ya Efuraimu nî îkûbûnyiîra nîûntû bwa ûrîa bûrî babaingî mono rî, îteeni mwitûûne jwa Aperizi na Refaimu bwigwatîre ithaka ku.”

¹⁶Nabo baramwîra atîrî, “Nthîgûrû ya irîma îtî gûtûng'ana. Akanaani barîa batwîre mûgwanthîîne barî ngaarî cia ndwaa cia chuuma; bonthe barîa batwîre Bethisheani na tûtûûra twaayo, na barîa batwîre mûgwanthîîne jwa Jezereeli.”

¹⁷Rîu Joshua areera nchiarwa cia Josefu iu cia mîîrîga ya Efuraimu na nusu ya Manase atîrî, “Nî mma bûrî babaingî na bûrî na inya mono. Tontû bûû, tî gîchunchî kîmwe akî kîa nthîgûrû bûgakara nakîo,

¹⁸îndî kinya nthîgûrû ya irîma îkaa yeenu. Kinya këethîra îrî na mwitû, bûkajûtûgûta bûmîjûkie yonthe yee yeenu. Nîkwîthîrwa bûkeenga Akanaani ku kinya beethîrwa barî na ngaarî cia ndwaa cia chuuma na barî na inya.”