Read KIMERU BIBLE PROTESTANT EDITION Josh 18 Bible Online

Josh 18 - KIMERU BIBLE PROTESTANT EDITION bible

Josh 18

¹Nakîo kîûthûrano kîonthe kîa Israeli nî kîothûranîre Shilo kîraamba îema rîa gûtirimanîra o. Rîu nî baarî bakûûmbana na nthîgûrû yaarî waathaniine bwaao.

²Nî gwatigeere mîîrîga mûgwanja ya antû ba Israeli îrîa îtaarî îkûgaîrwa biigai biaao.

³Tontû bûû, Joshua arooria antû ba Israeli atîrî, “Ka bûgakara mwanka rî bûtîkûrûkîte nthîgûrûûne îrîa MWATHANI Mûrungu wa biûjûjû bieenu abweete yaa yeenu?

⁴Riteeni antû bathatû-bathatû kuuma o mwîrîga, naani nkaabatûma beete baandîke ûrîa nthîgûrû îkari yonthe bakîonanagia ûrîa o mwîrîga jûbuîrîte kûgaîrwa. Bathiria bacoke kîrî ni.

⁵Nî beete bagaanie nthîgûrû îchunchî mûgwanja. Mwîrîga jwa Juda jwîîte na mbere gûkara nthîgûrû yaao bwa ûmotho, nacio nchiarwa cia Josefu ciîte na mbere gûkara nthîgûrû yaao bwa ûrîo.

⁶Bwathiria kwaandîka bwega ûrîa nthîgûrû îbuîrîte kûgaanua îchunchî mûgwanja bûndeetere maandîko jau aja, naani nkaringa kuura nîûntû bweenu mbere ya MWATHANI Mûrungu weetû.

⁷Îndî Alawi batîgaîrwa nthîgûrû amwe naabuî nîûntû ûthînjîri-Mûrungu nîbu rûgai rwaao. Ningî mîîrîga ya Gadi na Rubeni na nusu ya mwîrîga jwa Manase nî bathirîtie kûgaîrwa nthîgûrû rwongo rwa Jorodani rwa bwa gaiti, îrîa Musa nthûûmba ya MWATHANI aabaeere.”

⁸Joshua areera antû bau baathuuri mîîrîgeene ûjû, “Îteeni na bwaandîke ûrîa nthîgûrû yonthe îkari na bwathiria bûcoke kîrî ni aja Shilo. Naani nkaringa kuura nîûntû bweenu mbere ya MWATHANI.”

⁹Tontû bûû, antû bau bareeta, bareetania na nthîgûrû yonthe bakîandîkaga ûrîa yakari yukuune ntûûra gwa ntûûra, bamîgaanîtie îchunchî mûgwanja. Baathiria baracoka kîrî Joshua kambîîne ya Shilo.

¹⁰Joshua arararinga kuura nîûntû bwaao mbere ya MWATHANI au Shilo, na aragaîra antû ba Israeli nthîgûrû, o mwîrîga gîchunchî kîaaju.

¹¹Mwîrîga jwa Benjamini nîju jwaagwîrîîrwe nî kuura ya mbere kûringana na mîciî yaaju. Nthîgûrû îrîa baeerwe yaarî gatîgatî ka nthîgûrû ya mwîrîga jwa Juda na jwa Josefu.

¹²Mwanka jwaao bwa ûrîo jwaumaga Jorodani jûgaitia mwanka rûgîrîîne rûteere rwa ûrîo rwa Jeriko. Kuuma au, nî jweetaga bwa rûgûrû jûkagiitanîîria nthîgûrû ya irîma mwanka rwanda rwa Bethiaveni.

¹³Kuuma au jûgeeta bwa ûmotho jwerekerete Luzi mwanka jûgakinya rûgîrîne rwa Luzi. Luzi nîyo Betheli. Ningî jûgacoka jûkeenama mwanka Atarothi-adari, jûgakinya kîrîmeene kîrîa kîrî bwa ûmotho ya Bethihoroni ya gaiti.

¹⁴Naju mwanka nî jwagarûkaga jûkeerekera bwa ûmotho juumîte rûteere rwa bwa rûgûrû kuuma kîrîmeene kîrîa kîrî bwa ûmotho gîteganîte na Bethihoroni, jûgeeta kûthirîra Kiriathi-baali, îrîa îrî mwîrîga jwa Juda. Kiriathi-baali nîyo Kiriathi-jearimu. Jûu nîju jwaarî mwanka jwa bwa rûgûrû.

¹⁵Mwanka jwa rûteere rwa bwa ûmotho[8], jwambagîîria mîthieene ya Kiriathi-jearimu jûgeetîîra Efuroni jûgakinya kîthimeene kîa Nefutoa.

¹⁶Kuuma au mwanka jûkeenama jûgakinya mûgwanthî jwa kîrîma kîrîa gîtegene na mûguuru jwa mûtaana wa Hinomu, jûrîa jûrî mûthieene jwa bwa ûrîo ya mûguuru jwa Refaimu. Jûgacoka jûkeenamîîra mûguuruune jwa Hinomu bwa ûmotho ya rûgîrî rwa Ajebusi, na jûkeenama mwanka Enirogeli.

¹⁷Mwanka jûgacoka jûgakîîgama bwa ûrîo jûgeeta mwanka Enishemeshi na kuuma au jûgeeta Gelilothi îrîa îtegeene na mwitio jwa Adumimu. Kuuma au jûkeenama mwanka iigeene rîa Bohani, mûtaana wa Rubeni,

¹⁸jûgeeta bwa ûrîo jûgakûrûkîîra rûteere rwa rûgîrî rwa mûguuru jwa Jorodani, na jûgacoka jûkeenama mûguuruune jûu.

¹⁹Kuuma au, mwanka jûgakûrûkîîra rûteere rwa bwa ûrîo ya rûgîrî rwa Bethihogila jûgeeta kûthirîra gîkumboone kîa bwa ûrîo kîa îria rîa Chumbî, arîa Jorodani îtonyagîîra îrieene rîu. Jûu nîju jwaarî mwanka jwa rûteere rwa bwa ûmotho.

²⁰Mûuro jwa Jorodani nîru rwarî Mwanka jwa rûteere rwa bwa gaiti. Ûu nîu mîanka yonthe ya nthîgûrû îrîa mwîrîga jwa Benjamini jwagaîîrwe yakari kûringana na mîciî yaaju.

²¹Ntûûra cia mwîrîga jwa Benjamini, kûringana na mîciî yaaju ciaarî Jeriko, na Bethihogila, na Emeki-kezizi,

²²na Bethiaraba, na Zemaraimu, na Betheli,

²³na Avimu, na Para, na Ofura,

²⁴na Kefari-amoni, na Ofini, na Geba; cionthe ntûûra îkûmi na ijîîrî na tûtûûra twaacio.

²⁵Ntûûra ingî ciaarî Gibeoni, na Rama, na Beerothi,

²⁶na Mizipe, na Kefira, na Mozaha,

²⁷na Rekemu, na Iripeeli, na Tarala,

²⁸na Zela, na Haelefu, na Jebusi, îrîa nîyo Jerusalemu, na Gibea, na Kiriathi-jearimu; cionthe ntûûra îkûmi na inya amwe na tûtûûra twaacio. Îîu nîyo nthîgûrû îrîa mîciî ya mwîrîga jwa Benjamini yaagaîîrwe.