Read KIMERU BIBLE PROTESTANT EDITION Josh 19 Bible Online

Josh 19 - KIMERU BIBLE PROTESTANT EDITION bible

Josh 19

¹Kuura ya ijîîrî îragwîra mwîrîga jwa Simioni kûringana na mîciî yaaju. Naru rûgai rwaao rûreethîrwa rûrî ndeene ya nthîgûrû ya mwîrîga jwa Juda.

² Ntûûra irîa baagaîîrwe ciaarî Beerisheba na Sheba na Molada,

³na Hazari-shuali na Bala na Ezemu,

⁴na Elitoladi na Bethuli na Horima,

⁵na Zikilagi na Bethimarikabothi na Hazari-susa,

⁶na Bethileboathi na Sharuheni: cionthe ntûûra îkûmi na ithatû amwe na tûtûûra twaacio.

⁷Ntûûra ingî ciaarî Aini na Rimoni na Etheri na Ashani: cionthe ntûûra inya amwe na tûtûûra twaacio.

⁸Ningî nthîgûrû yaao nî yaajûkagia tûtûûra tunthe tûrîa twathiûrûkîte ntûûra iu gwîta mwanka ntûûra ya Baalathi-beeri, tayo Rama ya bwa ûmotho. Îîu nîyo nthîgûrû îrîa mwîrîga jwa Simioni jwagaîîrwe kûringana na mîciî yaaju.

⁹Nthîgûrû îrîa mwîrîga jwa Juda jwagaîri nî yaarî înene îgakûrûkithia. Kîu nîkîo gîatûmîre mwîrîga jwa Simioni jweewa gîchunchî kîa rûgai rwaao ndeene ya nthîgûrû ya mwîrîga jwa Juda.

¹⁰Nayo kuura ya îthatû nî yaagwîrîîre mwîrîga jwa Zebuloni kûringana na mîciî yaaju. Nthîgûrû îrîa baagaîîrwe yakinyaga mwanka Saridi.

¹¹Kuuma au mwanka jwaao jwaitagia bwa rûgûrû jûgakinya Mareali, jûgatongithia Dabeshethi na karûûjî karîa karî bwa gaiti ya Jokineamu.

¹²Kuuma Saridi mwanka jweetaga jwerekerete bwa gaiti jûgakinya mwankeene jwa Kisilothi-tabori, jûgeeta Daberathi, jûgaitia mwanka Jafia.

¹³Kuuma Jafia, jûgeeta bwa gaiti mwanka Gathi-heferi na Ithi-kazini jûgeeta mwanka Rimoni jwerekerete bwa Nea.

¹⁴Mwanka jwa rûteere rwa ûrîo naju jwathiûrûkagîra bwa Hanathoni jûgeeta kûthirîra mûguuruune jwa Ifutaheli.

¹⁵Ningî nî jwajûkagia kinya Katathi na Nahalali na Shimuroni na Idala na Bethlehemu; cionthe ntûûra îkûmi na ijîîrî amwe na tûtûûra twaacio.

¹⁶Ntûûra iu amwe na tûtûûra twaacio nîcio ciagaîîrwe antû ba mwîrîga jwa Zebuloni kûringana na mîciî yaao.

¹⁷Kuura ya inya nayo nî yaagwîrîîre mwîrîga jwa Isakari kûringana na mîciî yaaju.

¹⁸Nthîgûrû îrîa baagaîîrwe yajûkagia Jezereeli na Kesulothi na Shunemu,

¹⁹na Hafaraimu na Shioni na Anaharathi,

²⁰na Rabithi na Kishioni na Abezi,

²¹na Remethi na Eganimu na Enihada na Bethipazezi.

²²Ningî mwanka jwaao nî jwagwataga Tabori na Shahazuma na Bethishemeshi na jûkathirîra Jorodani. Iu ciaarî ntûûra îkûmi na îthanthatû amwe na tûtûûra twaacio.

²³Ntûûra iu amwe na tûtûûra twaacio nîcio ciagaîîrwe antû ba mwîrîga jwa Isakari kûringana na mîciî yaao.

²⁴Nayo kuura ya îthaano îragwîîra mwîrîga jwa Asheri kûringana na mîciî yaaju.

²⁵Nthîgûrû îrîa baagaîîrwe yajûkagia Helikathi na Hali na Beteni na Akishafu,

²⁶na Alami-meleki na Amadi na Mishali. Rûteere rwa bwa rûgûrû mwanka nî jwakinyaga Karimeli na Shihori-Iibunathi.

²⁷Rûteere rwa bwa gaiti mwanka jweetaga Bethidagoni jûgatongithia Zebuloni na mûguuru jwa Iiftaheli jwerekerete bwa ûrîo gûkinya Bethiemeki na Neieli, jûgacoka jûgakûrûka jweerekerete bwa ûrîo mwanka Kabuli,

²⁸na Ebroni na Rehobu na Hamoni na Kana jûgeeta o mwanka Sidoni îrîa nene.

²⁹Kuuma au mwanka nî jwagarûkaga bwa Rama, jûgakinya ntûûra îrîa mbirigîre na rûthingo ya Tiro, jûgacoka jûkeerekera bwa Hosa jûgeeta kûthirîra îrieene rîa Mediterania. Nthîgûrû îîu nayo nî yajûkagia Mahalabu na Akizibu

³⁰na Uma na Afeki na Rehobu; cionthe ntûûra mîrongo îîrî na ijîîrî na tûtûûra twaacio.

³¹Ntûûra iu amwe na tûtûûra twaacio nîcîo ciagaîîrwe antû bwa mwîrîga jwa Asheri kûringana na mîciî yaao.

³²Kuura ya îthanthatû nî yaagwîrîîre mwîrîga jwa Nafutali kûringana na mîciî yaaju.

³³Mwanka jwa nthîgûrû yaao jwaumaga Helefu jûgakinya muuruune jwa Zaananimu, jûgakûrûka jûgeetîîra Adami-nekebu, na Jabuneeli mwanka Lakumu na jûkathirîra Jorodani.

³⁴Kuuma au mwanka jûu jûkagarûka jûkeerekera bwa rûgûrû jûgeeta Azinothi-tabori, jûgeeta mwanka Hukoki jûgîtongithagia Zebuloni bwa ûmotho na Asheri bwa rûgûrû na Juda bwa gaiti mûuroone jwa Jorodani.

³⁵Ntûûra îrîa mbirigîre na nthingo ciaarî Zidimu na Zeli na Hamathi na Rakathi na Kinerethi,

³⁶na Adama na Rama na Hazori,

³⁷na Kedeshi na Edirei na Enihazori,

³⁸na Yironi na Migidaleli na Horemu na Bethianathi na Bethishemeshi; cionthe ciaarî ntûûra îkûmi na kenda amwe na tûtûûra twaacio.

³⁹Ntûûra iu na tûtûûra twaacio nîcio ciagaîîrwe antû ba mwîrîga jwa Nafutali kûringana na mîciî yaao.

⁴⁰Kuura ya mûgwanja nî yaagwîrîîre mwîrîga jwa Dani kûringana na mîciî yaaju.

⁴¹Nayo nthîgûrû îrîa baagaîîrwe yajûkagia Zora na Eshitaoli na Irishemeshi,

⁴²na Shaalabini na Aijaloni na Ithila,

⁴³na Eloni na Timuna na Ekironi,

⁴⁴na Eliteke, na Gibethoni, na Baalathi,

⁴⁵na Jehuudi na Bene-beraki na Gathirimoni,

⁴⁶na Mejarikoni na Rakoni o amwe na nthîgûrû îrîa îtegeene na Jopa.

⁴⁷ Rîrîa antû ba mwîrîga jwa Dani baatuunyîrwe nthîgûrû yaao îrîa baagaîri, nî beetîre baraithûkîra Leshemu na barooraga antû baayo na baramîtaa na baratûûra ku. Nabo baragarûra riîtwa rîaayo, Leshemu, rîraa Dani ta ûrîa îthe wa mwîrîga jwaao eetagwa.

⁴⁸Ntûûra iu na tûtûûra twaacio nîcio ciagaîîrwe antû ba mwîrîga jwa Dani kûringana na mîciî yaao.

⁴⁹Rîrîa antû ba Israeli baathirîrie kûgaîrwa nthîgûrû ta ûrîa yagaanîtue, nî bagaîîre Joshua mûtaana wa Nuni rûgai rwaawe gatîgatîîne kaao.

⁵⁰Kûringana na ûrîa MWATHANI aaugîîte nî bagaîre ntûûra îrîa eendere tayo, Timunathi-sera, îrîa yaarî nthîgûrûûne ya irîma ya Efuraimu. Nawe aramîaka kûrîa kwathûkangi aratûûra ku.

⁵¹Ûu nîu Eleazari mûthînjîri-Mûrungu, na Joshua mûtaana wa Nuni, na atongeeria ba mîciî ya mîîrîga ya Israeli bagaanîrie nthîgûrû barî Shilo. Nabo bamîgaanîrie na njîra ya kûringa kuura, barî mbere ya MWATHANI bakari mwariine jwa Îema rîa gûtirimanîra. Tontû bûû, barathiria kugaania nthîgûrû.