Read KIMERU BIBLE PROTESTANT EDITION Josh 2 Bible Online

Josh 2 - KIMERU BIBLE PROTESTANT EDITION bible

Josh 2

¹ Joshua mûtaana wa Nuni nî aatûmîre na witho achûnkûûni baîrî kuuma Shitimu arabeera, “Îteeni bûgacûnkûûne nthîgûrû na mono mono Jeriko.” Nabo bareeta na baratonya nyomba ya mûka mûmaraya ûmwe weetagwa Rahabu, bararara ku.

²Mûnene wa Jeriko nî aakinyîîrue ûntû bûû areerwa atîrî, “Kûrî antû bamwe ba Israeli beeja gûkû ûtukû bûbû gûcûnkûûna nthîgûrû.”

³Mûnene wa Jeriko aratûmana kîrî Rahabu akiugaga atîrî, “Rita antû bau beeja kîrî gwe, na batonya nyomba yaaku nîûntû ka beejîte gûcûnkûûna nthîgûrû yonthe.”

⁴Îndî mûka ûu nî aarî akwitha antû bau baîrî, nawe arauga, “Nî mma kûrî antû beejîre kîrî ni, îndî ntîkûmenyaga kûrîa bakuumîte.

⁵Mpingîro îrî akuî kwingwa gûkûgîa muundu, antû bau nî baumagarîre na ntîramenya kûrîa beetîre. Bathingateni na mpwîî, nîûntû bwoomba kûbagwatagwata.”

⁶Nî aarî akûbaitithia îgûrûgûrû na aabaitha na mabua jarîa aanîkîte îgûrû rîa nyomba.

⁷Antû bau baatûmi nî mûnene baraumagara, barabathingatia bwa Jorodani o mwanka mariûkoone. Nayo mpingîro nî yaingîrwe bakumagara o rîo.

⁸Îndî mbere ya achûnkûûni bau baîrî bamama, Rahabu araitia kîrî bo îgûrûgûrû rîa nyomba,

⁹na arabeera atîrî, “Nî nkûmenya atî, MWATHANI nî abweete nthîgûrû îîjî, na antû bonthe nî bamakîte mono nîûntû bweenu.

¹⁰ Nîkwîthîrwa nî twigîîtue ûrîa MWATHANI atûmîre rûûjî rwa Îria Îtuune rûwa mbere yeenu rîrîa bwaumaga Misri, na ûrîa bwagîtîre anene barîa baîrî ba Amori, tabo Sihoni na Ogi barîa baatwîre rwongo rûrîa rûngî rwa Jorodani bwa gaiti, barîa bwaathirîrie buru.

¹¹Naatuî nî twigîîtue mantû jaja, najo nî jatwinainîtie mono na gûtî muntû weetû ûtigi na ûchamba kinya bûnini nîûntû MWATHANI Mûrungu weenu nîwe Mûrungu wenka îgûrû na nthîgûrû.

¹²Nandî rî, ndabwerenca bûnciîtîrie na riîtwa rîa MWATHANI, atî bûkaigîîrua nja ya baaba kîaao, o ta ûrîa ni naani ndabwigîîrua kîaao. Ningî bûmpe rwaano rwa gûtûma mbwîtîkia;

¹³atî bûkoonokia baaba na maama na ataana ba chiaa na aarî ba chiaa na antû baao bonthe na atî bûgaatwonokia tûtîkooragwe.”

¹⁴Nabo antû bau baramwîra atîrî, “Tûkärega kûbwonokia tûrokua! Bunka akî waarega kuumbûra mantû jaja jeetû rî, naatuî tûkabwigîîrua kîaao na tûbûthithîrie mantû ja îota rîrîa MWATHANI agatwaa nthîgûrû îîjî.”

¹⁵Arabaumagarîîria ndiricheene arabeenîka na mûkanda, nîkwîthîrwa nyomba yaawe yaaki rûthingoone rwa ntûûra na tontû bûu nîo aatûûraga.

¹⁶Ningî arabeera atîrî, “Itieni bwa irîmeene bûtîkeeje gûtirimana na barîa bakûbûcwaa; ningî bûciithe ntukû ithatû mwanka barîa bakûbûcwaa bacoke; nyuma ya ûu bûcoke bûciîtîre.”

¹⁷Antû bau baramwîra atîrî, “Tuî tûkaingia mûciîtio jûjû jwaaku waatûma tûciîtia.

¹⁸Atîrî, rîrîa tûkaithûkîra nthîgûrû îîjî, ûgacuuria mûrigi jûjû mûtuune ndiricheene îîjî watwînîkîîra, ningî ûûthûranie gûkû nyomba yaaku abaagu na nyakwe na ataana ba nyakwe na antû ba nja ya abaagu bonthe.

¹⁹Ûrîa ûkaumagara mwariine jwa nyomba yaaku, eete njîreene, ooragwe nî îgûrû rîaawe, na tuî tûtî o. Îndî muntû kinya ûmwe wa barîa bakeethîrwa barî amwe naagwe nyomba îîjî akëeja kûringithua, nî tuî tûkarîua tharike yaawe.

²⁰Îndî ûkëeja kuumbûra mantû jaja jeetû ûmenye tuî tûtîrîîwa nî mûciîtio jûjû jwaaku waatûma tûciîtia.”

²¹Rahabu nawe arauga, “Kûrokara o ta ûu bwauga!” Arabarekeeria, nabo baraciîtîra; aracoka aracuuria mûrigi jûu mûtûûne ndiricheene.

²²Nabo bareeta irîmeene, baraiciitha nao ntukû ithatû mwanka rîrîa barîa babathingatîîtie baacokere ntûûreene. Nabo bau babathingatîîtie nî baarî bakûbacwaa njîreene yonthe barabaaga.

²³Nabo achûnkûûni bau bobaîrî nî baaumîre nau irîmeene barauna mûuro jwa Jorodani bareeta kîrî Joshua mûtaana wa Nuni. Nabo baramwîra mantû jonthe jarîa jaakarîkîte kîrî bo.

²⁴Bareera Joshua atîrî, “Gûtî nkaanja atî MWATHANI nî anenkanîrîte nthîgûrû îîu yonthe njareene cieetû; na nkûrûki atûûri ba nthî îîu nî bagwati nî ûguaa bûbûnene nîûntû bweetû!”