Read KIMERU BIBLE PROTESTANT EDITION Josh 20 Bible Online

Josh 20 - KIMERU BIBLE PROTESTANT EDITION bible

Josh 20

¹ MWATHANI eerîre Joshua atîrî,

²“Îîra antû ba Israeli bathuure ntûûra cia kûmatûkaga gwiciitha ta ûrîa ndeerîre Musa,

³nîkenda muntû ooragana atîkwenda amatûkaga ku gwiciitha atîkoonwe nî muntû ûrîa ûkeethîrwa akîendaga kwirîîria tharike ya ûrîa ûûragi.

⁴Muntû ta ûu aamatûka gwiciitha ntûûreene îmwe ya iu ageetaga arîa kûgambagîrwa mpingîroone ya ntûûra nawe akeera akûrû ba ntûûra ûrîa athithîtie. Nabo bakamwîtîkagîîria agakûrûka ntûûreene na bakamweejaga antû a gûtûûra gatîgatîîne kaao.

⁵Muntû ûrîa ûkwenda kûrîyia tharike ya ûrîa ûûragi akëeja kwîja eenganîte na mûûragani, antû ba ntûûra îîu bakámûnenkanîra kîrî we nîûntû ooragîre mûtûûri waawe atîkwenda na tika kûrî ûthû baarî nabu mbere ya îgiita rîu.

⁶Muntû ûu ûûraganîte nawe ageeta na mbere gûkara ntûûreene îîu o mwanka rîrîa akaarûngama mbere ya kîûthûrano agambîrwe, na mwanka gîkuû kîa mûthînjîri-Mûrungu ûrîa mûnene ûrîa ûkeethîrwa arî o îgiiteene rîu. Rîu nîrîo mûûragani akoomba gûcoka ntûûreene yaawe na nja yaawe kûrîa aumîte akîmatûka.”

⁷Nabo antû ba Israeli nî baathuurîre Kedeshi ndeene ya Galili îrî nthîgûrû ya irîma ya Nafutali, na Shekemu îrîa îrî nthîgûrûûne ya irîma ya Efuraimu, na Kiriathiaraba, na nîyo Heburoni, îrîa îrî nthîgûrû ya irîma ya Juda.

⁸Ningî rwongo rwa Jorodani bwa gaiti ya Jeriko, nî baathuurîre Bezeri îrîa îrî rwanda rwa nthîgûrû îrîa îng'ananîrîtie ya mwîrîga jwa Rubeni, na Ramothi-gileadi ya mwîrîga jwa Gadi, na Golani îrîa îrî Bashani ya mwîrîga jwa Manase.

⁹Iu nîcio ntûûra cia kûmatûkaga gwiciitha irîa ciathuurîîrwe antû bonthe ba Israeli na kinya ageni barîa baatûûranagia nabo. Muntû arîngîûraga muntû ûngî atîkwenda nî oonaga gwa kûmatûka atîkooragwe nî muntû ûrîa ûkwenda kûrîyia tharike ya ûrîa ûûragi. Nawe atîngîûragwa atîambîte kûgambîrwa mbere ya kîûthûrano.