Read KIMERU BIBLE PROTESTANT EDITION Josh 21 Bible Online

Josh 21 - KIMERU BIBLE PROTESTANT EDITION bible

Josh 21

¹Nabo atongeeria ba mîciî ya mwîrîga jwa Alawi nî beetîre kîrî Eleazari, mûthînjîri-Mûrungu, na Joshua mûtaana wa Nuni, na atongeeria ba mîciî ya mîîrîga îngî ya antû ba Israeli.

² Nabo atongeeria ba Alawi barabaarîria kûu Shilo, nthî ya Kanaani, barabeera ûjû, “MWATHANI nî aejanîre Waatho na njîra ya Musa arauga atî tweewe ntûûra irîa tûgatûûraga amwe na bieni biaacio bia kûrîthagia ng'ombe cieetû.”

³Tontû bûû, antû ba Israeli baraa Alawi ntûûra imwe cia iria baagaîri kûringana na ûrîa MWATHANI augîîte.

⁴Kuura îragwîra antû ba mûciî jwa Kohathi: nchiarwa cia mûthînjîri-Mûrungu Aaroni, baragaîrwa ntûûra îkûmi na ithatû cia mîîrîga ya Juda na Simioni na Benjamini.

⁵Nabo antû bau bangî ba mîciî ya Kohathi baragaîrwa ntûûra îkûmi cia mîîrîga ya Efuraimu na Dani na nusu ya mwîrîga jwa Manase.

⁶Kuura îragwîra nchiarwa cia Gerishoni nacio iragaîrwa ntûûra îkûmi na ithatû cia mîîrîga ya Isakari na Asheri na Nafutali na nusu ya mwîrîga jwa Manase jûrîa jwaarî Bashani.

⁷Ningî kuura îngî îragwîra nchiarwa cia Merari nacio iragaîrwa ntûûra îkûmi na ijîîrî cia mîîrîga ya Rubeni na Gadi na Zebuloni.

⁸Ntûûra na bieni biu nîbio antû ba Israeli bagaîîre Alawi na njîra ya kûringa kuura o ta ûrîa MWATHANI erîte Musa.

⁹Ntûûra iji igweti na mariîtwa nîcio ciaejanîrwe nî mîîrîga ya Juda na Simioni

¹⁰iragaîrwa nchiarwa cia Aaroni irîa ciaarî cia mîciî ya Kohathi, îrîa yaumanîtie na Lawi. Nîbo baagwîrîîrwe nî kuura ya mbere.

¹¹Baraewa Kiriathiaraba. Ariba arî îthe wa Anaki, na nîyo Heburoni, îrîa îrî nthîgûrûûne ya irîma ya Juda, amwe na bieni birîa kîmîthiûrûkîrîte.

¹²Îndî ithaka bingî bia ntûûra îîu na tûtûûra twaayo nî biaarî bikweewa Kalebu, mûtaana wa Jefune.

¹³Nchiarwa cia mûthînjîri-Mûrungu Aaroni nî ciagaîîrwe ntûûra iji amwe na Heburoni îrîa yaarî ntûûra ya kûmatûkaga gwiciitha, na bieni biaayo: Libuna amwe na bieni biaayo,

¹⁴na Jatiri amwe na bieni biaayo, na Eshitemoa amwe na bieni biaayo,

¹⁵na Horoni amwe na bieni biaayo, na Debiri amwe na bieni biaayo,

¹⁶na Aini amwe na bieni biaayo, na Juta amwe na bieni biaayo, na Bethishemeshi amwe na bieni biaayo. Ntûûra iu kenda ciaumîte mîîrîgeene ya Juda na Simioni.

¹⁷Ningî kuuma mwîrîgeene jwa Benjamini baraewa Gibeoni amwe na bieni biaayo, na Geba amwe na bieni biaayo,

¹⁸na Anathothi amwe na bieni biaayo, na Alimoni amwe na bieni biaayo; baaerwe cionthe ntûûra inya.

¹⁹Ntûûra cia nchiarwa cia mûthînjîri-Mûrungu Aaroni cionthe ciaarî ikûmi na ithatû amwe na bieni biaacio.

²⁰Nabo antû bau bangî ba mîciî ya Kohathi, tabo Alawi barîa baumanîtie na Kohathi, nî baaerwe ntûûra iji cia mwîrîga jwa Efuraimu:

²¹Kuuma nthîgûrûûne ya irîma ya Efuraimu nî baaerwe Shekemu, ntûûra ya kûmatûkaga gwiciitha, na Gezeri,

²²na Kibizaimu, na Bethihoroni; cionthe ciaarî ntûûra inya amwe na bieni biaacio.

²³Kuuma mwîrîgeene jwa Dani baraewa Eliteke na Gibethoni,

²⁴na Aijaloni na Gathirimoni; cionthe ciaarî ntûûra inya amwe na bieni biaacio.

²⁵Kuuma kîrî nusu ya mwîrîga jwa Manase baraewa Taanaki, na Gathirimoni; cionthe ciaarî ntûûra ijîîrî amwe na bieni biaacio.

²⁶Ntûûra cionthe iria antû ba mîciî îîu îngî ya Kohathi baaerwe ciaarî îkûmi amwe na bieni biaacio.

²⁷Nabo Alawi ba mîciî ya Gerishoni nî baaerwe ntûûra iji kuuma mwîrîgeene jwa nusu ya Manase: Golani îrîa îrî Bashani, îmwe ya ntûûra cia kûmatûkaga gwiciitha, na Beeshitera; cionthe ciaarî ntûûra ijîîrî amwe na bieni biaacio.

²⁸Kûûma mwîrîgeene jwa Isakari baraewa Kishioni na Daberathi,

²⁹na Jaramuthi na Eganimu.

³⁰Kuuma mwîrîgeene jwa Asheri baraewa Mishali, na Abidoni,

³¹na Helikathi na Rehobu; cionthe ciaarî ntûûra inya na bieni biaacio.

³²Ningî kuuma mwîrîgeene jwa Nafutali baraewa Kedeshi îrîa îrî Galili, îmwe ya ntûûra cia kûmatûkaga gwiciitha, na Hamothi-dori, na Kari tani; cionthe ciaarî ntûûra ithatû amwe na bieni biaacio.

³³Ntûûra cionthe irîa antû ba mîciî mwanya mwanya ya Gerishoni baaerwe ciaarî îkûmi na ithatû, amwe na bieni biaacio.

³⁴Nabo Alawi barîa baatigeere ba mîciî ya Merari, nî baeerwe ntûûra iji kuuma mwîrîgeene jwa Zebuloni: Jokineamu na Karita,

³⁵na Dimuna na Nahalali; cionthe ciaarî ntûûra inya amwe na bieni biaacio.

³⁶Kuuma mwîrîgeene jwa Rubeni baraewa Bezeri na Jahaza

³⁷na Kedemothi na Mefaathi; cionthe ciaarî ntûûra inya amwe na bieni biaacio.

³⁸Kuuma mwîrîgeene jwa Gadi baraewa Ramothi-gileadi, îmwe ya ntûûra cia kûmatûkaga gwiciitha na Mahanaimu,

³⁹na Heshiboni na Jazeri; cionthe ciaarî ntûûra inya amwe na bieni biaacio.

⁴⁰Tontû bûû Alawi barîa baatigeere ba mîciî ya Merari nî baeerwe ntûûra îkûmi na ijîîrî.

⁴¹Ntûûra cionthe irîa Alawi bagaîîrwe gatîgatîîne ka antû ba Israeli ciaarî mîrongo îna na inyaanya amwe na bieni biaacio.

⁴²O ntûûra nî yaarî na kîeni kîmîthiûrûkîrîte. Ûu nîu ntûûra iu cionthe ciaakari.

⁴³Ûu nîu MWATHANI aaere Israeli nthîgûrû yonthe îrîa aaciîtîrîtie biûjûjû biaao atî akabaa. Nabo baathiria kûmîtaa baratûûra ku.

⁴⁴MWATHANI nî aabaeere thîîrî nteere cionthe o ta ûrîa aaciîtîrîtie beethe baao. Gûtî mûnthû waao kinya ûmwe woomba kwirikîria mbere yaao nîûntû MWATHANI nî aaere Aisraeli ûûmbani kîrî anthû baao.

⁴⁵Gûtî ûntû noo bûmwe bwa jarîa meega jonthe MWATHANI eerîîrîte antû ba Israeli bwaremere; jonthe nî joojûrîre.