Read KIMERU BIBLE PROTESTANT EDITION Josh 23 Bible Online

Josh 23 - KIMERU BIBLE PROTESTANT EDITION bible

Josh 23

¹Kûrakara atîrî, nyuma ya îgiita rîrîraaja mma kuuma rîrîa MWATHANI oombanîîre Israeli kîrî anthû baao nteere cionthe, Joshua areethîrwa arî ntindiri ya mîaka îmingî mono.

²Aroothûrania Aisraeli bonthe: akûrû baao na atongeeria baao, na agambi baao, na arûngamîîri baao, arabeera atîrî, “Nandî ngûkûra na ngûtindira buru.

³Naabuî nî bwonete jarîa jonthe MWATHANI Mûrungu weenu athithîrîtie antû ba mîgongo îîjî îngî nîûntû bweenu. MWATHANI Mûrungu weenu nîwe ûrabûrwaagîîra.

⁴Ni naani nî ndîkîîtie kûbûgaîra nthîgûrû irîa cionthe ntaîte na kinya irîa itigeere, kuuma mûuro jwa Jorodani mwanka îria rîa Mediterania bwa rûgûrû.

⁵MWATHANI Mûrungu weenu wengwa akabeenga babwebeere, naabuî bûkajûkia nthîgûrû yaao o ta ûrîa MWATHANI, Mûrungu weenu augîîte.

⁶Tontû bûû, bûmenyagîîre mono na bûûjûragie jarîa jonthe jaandîki yukuune rîa Waatho bwa Musa. Bûkauna noo bûmwe bwaajo,

⁷bûtîkeeje kuungana na antû ba mîgongo îrîa îtigeere nthîgûrû îîjî bûrî, kana bwîja kûgweta mariîtwa ja mîrungu yaao, kana bûciîtia riîtweene rîaayo kana bûmîtumîkîra, kana bûmîturîria maru bûmîthaathayia.

⁸Îndî buî karageeni bwigwatithenie na MWATHANI Mûrungu weenu o ta ûrîa bûtwîre bûthithagia mwanka naarua tûrî.

⁹Nîkwîthîrwa nî MWATHANI ûbwîngîrîte mîgongo îmînene na îrî na inya yabwebera, na gûtî muntû ûûmbîte kwirikîria mbere yeenu mwanka nandî.

¹⁰ Muntû weenu ûmwe arengaga antû ngiri nîûntû nî MWATHANI Mûrungu weenu ûrabûrûjagîîra o ta ûrîa augîîte.

¹¹Tontû bûû menyagîîreeni mono kwendaga MWATHANI Mûrungu weenu.

¹²Nîkwîthîrwa bwagarûka na bwagwatanîra na antû ba mîgongo îîu îngî barîa batigîre gatîgatîîne keenu na bwagûrana nabo, na bwaungana nabo,

¹³bûmenye na mma atî MWATHANI Mûrungu weenu atîîta na mbere kûbwîngîra antû baba. Nabo bakaa mûtego, na gîntû kîa kûbûgwatagia na bae mûthanju jwa kûbûcûnia mûgongo, na bae miigua ya kûbûtûraga meetho o mwanka bûthire bwinthe buru nthîgûrûûne îîjî njega ûjû îrîa MWATHANI Mûrungu weenu abweete.

¹⁴“Rîu ni ndî akuî gûkua, naabuî nî bwijî nkoroone cieenu na mathûgaanioone jeenu atî gûtî ûntû noo bûmwe bûbwega bwa jarîa jonthe MWATHANI, Mûrungu weenu auga jabwegiî bûtîkarîkîte. Jonthe nî bûûjûrîrîîtue na gûtî noo bûmwe bwaajo bwaûra.

¹⁵Îndî, o ûu bûûjûrîrîîtue mantû jonthe jarîa meega, jarîa MWATHANI augîîte jabwegiî, nî ou MWATHANI akabûreetera mantû jarîa maaî jonthe, mwanka abûthirie buru nthîgûrûûne îîjî njega ûjû abweete.

¹⁶Bûkëeja kuuna kîrîkanîro kîrîa bwarîkanîîre na MWATHANI Mûrungu weenu na bûgeeta gûtumîkîra mîrungu îngî na kûmîthaathayia, MWATHANI akabûtûrîkîria mûthûûro jwaawe, naabuî bûthîre ntûti nthîgûrûûne îîjî njega abweete.”