Read KIMERU BIBLE PROTESTANT EDITION Josh 24 Bible Online

Josh 24 - KIMERU BIBLE PROTESTANT EDITION bible

Josh 24

¹Joshua nî oothûranîrie mîîrîga ya Israeli yonthe Shekemu, na areeta akûrû ba Israeli, na atongeeria, na agambi, na arûngamîîri, bareeta mbere ya Mûrungu.

² Joshua areera kîrîndî kîonthe atîrî, “MWATHANI, Mûrungu wa Israeli, ariuga ûjû: ‘Karaaja, biûjûjû bieenu biatûûraga rwongo rwa rûûjî rwa Eufurate. Ûmwe waabio aarî Tera îthe wa Abrahamu na Nahori, ûrîa watumîkagîra mîrungu îngî.

³ Îndî nî ndaaritîre abaagu Abrahamu nthîgûrû îîu îrî rwongo rwa rûûjî rwa Eufurate, ndîramûthiûrûkia nthî yonthe ya Kanaani na ndîratûma nchiarwa ciaawe ithegea. Ndîramwaa Isaaka,

⁴ nawe Isaaka ndîramwaa Jakubu na Esaû. Esaû ndîramwaa nthîgûrû ya irîma ya Edomu yaa yaawe, îndî Jakubu na aana baawe bareeta Misri.

⁵ Nyumeene nî ndaatûmîre Musa na Aaroni, na ndîrakanûkia Misri na mantû jarîa ndaathithîrie, na ndîracoka ndîrabûrita ku.

⁶ Nî ndaaritîre biûjûjû bieenu Misri, na bûrakinya Îrieene Îtuune. Nabo antû ba Misri barî na ngaarî cia ndwaa na mbarathi cia ndwaa bareengana na biûjûjû bieenu mwanka Îria Îtuune.

⁷Nabo rîrîa baankaîîre ni MWATHANI nî ndeekîre muundu gatîgatî keenu na antû ba Misri, ningî ndîracokanîîria rûûjî rwa îria rûrabakunîkania. Naabuî nî bwacioneere na meetho jeenu ûrîa ndaathithîrie Misri. Ningî nî bwatûûrîre rwanda îgiita rîrîraaja,

⁸ ndîracoka ndîrabûreeta nthîgûrû ya Aamori barîa baatwîre rwongo rwa Jorodani rwa bwa gaiti. Nabo bararwaa naabuî, îndî ndîrabanenkanîra njareene cieenu ndîrabathiria buru meethoone jeenu, naabui bûrataa nthîgûrû yaao.

⁹ Balaki, mûtaana wa Zipori, mûnene wa Moabu nî ookîrîîre areeta kûrwaa na Israeli. Nî aatûmanîîre Balaamu mûtaana wa Beori, eeja kûbûruma.

¹⁰Îndî nî ndaregere kûthikîîra Balaamu. Nawe arabûtharima antû a kûbûruma. Tontû bûû, ndîrabûtunyûkia njareene ciaawe.

¹¹ Naabuî nî bwaunîre mûuro jwa Jorodani bûrakinya Jeriko. Nabo Aamori na Aperizi na Akanaani Ahiti na Agirigashi na Ahivi na Ajebusi, barîa baarî atûûri ba Jeriko bararwaa naabuî, naani ndîrabanenkanîra njareene cieenu.

¹² Nî ndaatûmîre magu mbere yeenu jarabwîngîra anene barîa baîrî ba Aamori, tî rûchiû rweenu kana ûta bweenu biabeengîre.

¹³ Ningî ndîrabwaa nthî îrîa bûtathithinîrîte na ntûûra bûtaakîte bûratûûra ku. Nandî bûrîîjaga maciara ja mîzabibû na matuunda jangî jarîa bûtaandîte.’

¹⁴“Rîu rî, kîrageni MWATHANI na bûmûtumîkagîre bûcieejanîte na bûrî na ûûma. Rekaneni na mîrungu îrîa biûjûjû bieenu biatumîkagîra rwongo rwa rûûjî rwa Eufurate na Misri, bûtumîkagîre MWATHANI wenka.

¹⁵Bûkëeja kwîthîrwa bûkîonaga nî bûbûthûûku gûtumîkîra MWATHANI rî, thuureeni naarua ûrîa bûgatumîkagîra, këethîra nî mîrungu îrîa biûjûjû bieenu baatumîkagîra rwongo rwa rûûjî rwa Eufurate, kana nî mîrungu ya Aamori barîa bûtwîre nthîgûrû yaao. Îndî ni na antû ba mûciî jwaakwa tûgatumîkagîra MWATHANI.”

¹⁶Kîrîndî nakîo kîrauga atîrî, “Arî! Gûkarîkarîka ûu, tûtîtiganîîria MWATHANI twîta gûtumîkîra mîrungu îngî.

¹⁷Tontû MWATHANI Mûrungu weetû nîwe watûritîre nthî ya Misri amwe na ba-baaba beetû, kuuma ûkomboone. Ningî nîwe waaringîre biama bibinene meethoone jeetû na atûmenyeera rûgendoone rweetû runthe na kîrî antû bonthe barîa twakûrûkagîîra kîrî bo.

¹⁸Ningî MWATHANI nî aatwîngîîre antû bonthe batwebera, kinya Aamori barîa baatwîîre nthî îîjî. Tontû bûû, kinya tuî, tûgatumîkagîra MWATHANI nîûntû nîwe Mûrungu weetû.”

¹⁹Joshua areera kîrîndî ûjû, “Bûtîûmba gûtumîkîra MWATHANI, nîûntû we nî Mûrungu ûmûtheru na arî rûriitho. Atîbûrekera bwauna Waatho kana bweeyia.

²⁰Bûkëeja gûtiganîria MWATHANI na bûgeeta gûtumîkîra mîrungu mîgeni, MWATHANI akaabuutatîra na abûthithîrie bûbûûî na abûthirie buru kinya këethîra nî eethîîrîtwe akîbûthithagîria mantû jameega.”

²¹Nakîo kîrîndî kîreera Joshua atîrî, “Arî! Tuî tûgatumîkagîra MWATHANI.”

²²Nîrîo Joshua aabeerîre ûjû, “Bûî bûgwikûûjîîra bwingwa atî bûkûthuura MWATHANI bûmûtumîkagîre.” Nabo barauga, “Îî tûrî akûûjî.”

²³Joshua arabeera “Këethîra nî ûu, nandî ebeerieni mîrungu mîgeni îrîa îrî gatîgatî keenu na bûcokeere MWATHANI Mûrungu wa Israeli na nkoro cieenu cionthe.”

²⁴Nakîo kîrîndî kîreera Joshua atîrî, “Tûgatumîkagîra MWATHANI Mûrungu weetû na tûkaathîkagîra kajû kaawe.”

²⁵Tontû bûû, Joshua arathithia kîrîkanîro na kîrîndî ntukû îîu kûu Shekemu na arabaa mawaatho na nkuagaya cia kûbatongagîîria.

²⁶Ningî araandîka nteto îîjî yukuune rîa Waatho rîa Mûrungu, na arajûkia iiga rîrînene ararîrûngîka gîtina kîa mûtî jwa muuru jwaarî antû au aathûri a kûthaathagîria MWATHANI.

²⁷Joshua areera kîrîndî kîonthe atîrî, “Iiga rîrî nîrîo mûkûûjî gatîgatî geetû na MWATHANI. Tontû rîkwigua mantû jonthe jarîa MWATHANI aaria naatuî nîrîo rîkaarita ûkûûjî bweja kwayia Mûrungu weenu.”

²⁸Joshua aracoka ararekeeria kîrîndî kîraciaanîra o muntû rûgaiine rwaawe rwa nthîgûrû.

²⁹Kûrakara atîrî, nyuma ya mantû jau, Joshua mûtaana wa Nuni, nthûûmba ya MWATHANI, nî aakuîre arî na ûkûrû bwa mîaka îgana rîa îkûmi.

³⁰ Baramûthika rûgaiine rwaawe rwa nthî kûu Timunathi-sera, nthîgûrû ya irîma ya Efuraimu, rûteere rwa bwa ûrîo rwa kîrîma kîa Gaashi.

³¹Aisraeli nî baatumîkagîra MWATHANI matukû jonthe jarîa Joshua aarî mwoyo. Ningî nyuma ya gîkuû kîaawe no beetîre na mbere gûtumîkîra MWATHANI matukû jonthe jarîa akûrû barîa baatigîrwe mwoyo nî Joshua batûûrîre, barîa baijî mantû jarîa jonthe MWATHANI aathithîrîtie Israeli.

³² Maîndîîndi ja Josefu jarîa antû ba Israeli baakamatîte kuuma Misri, nî jaathikîrwe Shekemu muundeene jûrîa Jakubu aagûrîte kîrî nchiarwa cia Hamori, îthe wa Shekemu. Aajûgûrîte îchunchî îgana rîmwe rîa fetha. Munda jûu jwagaîîrwe nchiarwa cia Josefu.

³³Eleazari, mûtaana wa Aaroni nî aakuîre, na arathikwa Gibea, nthîgûrûûne ya irîma ya Efuraimu îrîa yaagaîri mûtaana waawe Fineasi.