Read KIMERU BIBLE PROTESTANT EDITION Josh 3 Bible Online

Josh 3 - KIMERU BIBLE PROTESTANT EDITION bible

Josh 3

¹Joshua na antû bonthe ba Israeli nî bookîrîîre rûkîîrî kainda na barauma Shitimu barakinya mûuroone jwa Jorodani, baraamba gûkarakara o mbere ya kuuna.

²Kûrakara atîrî, nyuma ya ntukû ithatû, arûngamîîri nî baathiûrûkanîrie na kambî

³bakîîraga antû atîrî, “Rîrîa bûkoona Îthandûkû rîa kîrîkanîro kîa MWATHANI Mûrungu weenu rîkamati nî athînjîri-Mûrungu barîa Alawi, buume ikaroone bieenu bûrîthingate

⁴nîkenda bûmenya njîra ya gwîtîîra nîûntû bûteejîîra njîra îîjî kaîrî. Gatîgatî keenu na Îthandûkû, bûtige gataaria ga ûû ta kilomita îmwe (1km); bûkarîkuîîrîria.”

⁵Joshua areera kîrîndî atîrî, “Itherieni nîkwîthîrwa rûûjû MWATHANI akaathithia mantû ja kûrigaria gatîgatîîne keenu.”

⁶Joshua nî aarîîrie athînjîri-Mûrungu arabeera, “Jûkieni Îthandûkû rîa kîrîkanîro bûtongeerie kîrîndî.” Nabo barajûkia Îthandûkû rîa kîrîkanîro na baratongeeria kîrîndî.

⁷MWATHANI nî eerîre Joshua atîrî, “Naarua nkaambîrîria gûgûkumithia mbere ya antû bonthe ba Israeli, nîkenda bamenya atî, o ta ûrîa ndîraarî amwe na Musa, ûu nîo u ndî amwe naagwe.

⁸Gwe naagwe wîîre athînjîri-Mûrungu barîa bakamataga Îthandûkû rîa kîrîkanîro ûjû, ‘Bwakinya mûuroone jwa Jorodani bûtonye na bûrûngame ki rûûjîîne.’”

⁹Joshua nawe areera antû ba Israeli atîrî, “Îjaîjeni akuî bwigue nteto cia MWATHANI Mûrungu weenu.”

¹⁰Arabeera ûjû, “Ûntû bûbû nîbu bûgaatûma bûmenya atî Mûrungu ûrîa ûtûûraga mwoyo arî gatîgatî keenu, na gûtî nkaanja atî akaabwîngîra Akanaani na Ahiti na Ahivi na Aperizi na Agirigashi na Aamori na Ajebusi.

¹¹Îthandûkû rîa kîrîkanîro kîa MWATHANI Mûrungu Mweneinya nthî yonthe nîrîo rîkabûtongeeria bûgîtonya Jorodani.

¹²Nandî ithuurîreni antû îkûmi na baîrî kuuma mîîrîgeene ya Israeli, o mwîrîga muntû ûmwe.

¹³Gûgaakara atîrî, rîrîa magûrû ja Athînjîri-Mûrungu barîa bakeethîrwa bakamatîte Îthandûkû rîa MWATHANI ûrîa waathanaga nthî yonthe, jagakinya ndeene ya rûûjî rwa Jorodani, rûûjî rûrîa rûkwînama rûkaarûngama naru rûciûmbe kîthûmba.”

¹⁴Rîrîa kîrîndî kîaumagarîre maemeene jaao nîkenda kiuna Jorodani, athînjîri-Mûrungu nî beetîre bakamatîte Îthandûkû rîa kîrîkanîro barî mbere yaao.

¹⁵Îgiita rîu mûuro jwa Jorodani nî jwoojûri rûûjî na rûraunîkara. Narîo rîarî îgiita rîa maketha. Rîrîa barîa baakamatîte Îthandûkû baatonyîre mûuroone jûu na makinya jaao

¹⁶rûûjî rûrîa rwaumaga bwa rûgûrû nî rwarûngamîre rûraciûmba kîthûmba kûraaja akuî ntûûra ya Adamu, îrîa îriganîrîtie na ntûûra ya Zarethani. Naru rûrîa rwenamîte kuuma au bwa îria rîa Araba rîrîa rîa Chumbî, rûrathirîkîria buru. Kîrîndî kîrauna mwanka rwongo rûu rûngî rwa Jeriko.

¹⁷Nabo athînjîri-Mûrungu barîa baakamatîte Îthandûkû rîa kîrîkanîro kîa MWATHANI bararûngama gûntû gûkûûmo gatîgatî ka Jorodani; nabo Aisraeli bonthe bakiunagîîra gûntû gûkûûmo o mwanka rîrîa mûgongo junthe jwathirîrie kuuna Jorodani.