Read KIMERU BIBLE PROTESTANT EDITION Josh 4 Bible Online

Josh 4 - KIMERU BIBLE PROTESTANT EDITION bible

Josh 4

¹Nî gwakarîre atîrî, mûgongo junthe jûkûthiria kuuna Jorodani MWATHANI nî eerîre Joshua atîrî,

²“Thuureni antû îkûmi na baîrî kuuma kîrî kîrîndî, o mwîrîga muntû,

³na bûbeere ûjû, ‘Rûmeni maiga îkûmi na jaîrî kuuma aja Jorodani gatîgatî arîa magûrû ja athînjîri-Mûrungu jakûrûngi, na bûjakamate bwîte najo bûjeeke kambîîne arîa bûkaraara naarua.’”

⁴Joshua areeta antû îkûmi na baîrî barîa aathuurîte kuuma kîrî antû ba Israeli, o mwîrîga muntû ûmwe.

⁵Arabeera atîrî, “Kûrûkeni mbere ya Îthandûkû rîa MWATHANI Mûrungu weenu, bûtonye Jorodani gatîgatî, na o muntû ajûkie iiga rîmwe arîîkîre gîturo, maiga jau jeethîrwe jaringene na mîîrîga ya Israeli.

⁶Nabu ûntû bûbû bûkaa kîririkania kîrî buî, nîkenda rîrîa aana beenu bakooria nyumeene, ‘Gîtûmi kîa maiga jaja kîrî buî nî kîrîkû?’

⁷Naabuî bûkabeeraga ‘Nî ûrîa rûûjî rwa mûuro jwa Jorodani rwarûngîkîrwe rûragaûkana mbere ya Îthandûkû rîa kîrîkanîro kîa MWATHANI. Rîrîa Îthandûkû rîaunaga Jorodani, mûuro jwa Jorodani nî rwarûngamîre rwagaûkana.’ Tontû bûû, maiga jaja nîjo jakaa kîririkania kîa ûntû bûbû kîrî antû ba Israeli kenya na kenya.”

⁸Nabo antû ba Israeli barathithia o ûu Joshua abaathîte, barajûkia maiga îkûmi na jaîrî kuuma gatîgatî ka Jorodani, jaringene na mîîrîga ya antû ba Israeli, kûringana na ûrîa MWATHANI eerîte Joshua. Nabo barajakamata bareeta najo mwanka kambîîne barajeeka o.

⁹Joshua areeka maiga îkûmi na jaîrî gatîgatî ka Jorodani, o antû arîa ongwa magûrû ja athînjîri-Mûrungu barîa baakamatîte Îthandûkû rîa kîrîkanîro jaakinyîte. Maiga jau nî jatwîre o kinya naarua tûrî.

¹⁰Nabo athînjîri-Mûrungu barîa baakamatîte Îthandûkû rîa kîrîkanîro nî baarûngamîre gatîgatî ka Jorodani mwanka rîrîa antû ba Israeli bathithîrie mantû jonthe, jarîa MWATHANI aathîte Joshua eera kîrîndî, na nîo jo jarîa Musa eerîte Joshua. Nakîo kîrîndî nî kîaunîre rûûjî na mpwîî.

¹¹Rîu antû bonthe baathiria kuuna, athînjîri-Mûrungu barî na Îthandûkû rîa MWATHANI barakûrûka mbere ya kîrîndî.

¹²Nabo antû mwîrîga jwa Rubeni, na jwa Gadi na kîagatî kîa Mwîrîga jwa Manase barakûrûka mbere ya antû ba Israeli barabatongeeria baikundîkîte into bia ndwaa o ta ûrîa Musa aabaathîte.

¹³Nabo antû ta ngiri mîrongo îna, barauna mbere ya MWATHANI baithagathagîte nîûntû bwa ndwaa baratonya bûûrîîne ya Jeriko.

¹⁴Ntukû îîu MWATHANI nî aathûûngûûrîre Joshua mbere ya antû ba Israeli bonthe, nabo barakara bamwîkîrîte matukû jonthe ja ûtûûro bwaawe, o ta ûrîa beekîrîte Musa.

¹⁵MWATHANI areera Joshua atîrî,

¹⁶“Athana wîre athînjîri-Mûrungu barîa bakamatîte Îthandûkû rîa Ûkûûjî baaumîre Jorodani.”

¹⁷Joshua areera athînjîri-Mûrungu bau atîrî, “Umîreni Jorodani!”

¹⁸Nabo athînjîri-Mûrungu barîa baakamatîte Îthandûkû rîa kîrîkanîro kîa MWATHANI bakuumîra mûuroone jwa Jorodani, najo magûrû jaao jaakinya nthî înjûmo, nîrîo rûûjî rwa mûuro jwa Jorodani rwambîrîîrie kwînama kaîrî, naru rûroojûra mwanka rûrata mwera o ta ûrîa bethîrîte rûkari.

¹⁹Nakîo kîrîndî kîaunîîre Jorodani ntukû ya îkûmi ya mweri jwa mbere, nakîo kîraamba kambî akuî na Giligali, mwankeene jwa bwa gaiti jwa Jeriko.

²⁰Joshua ararûngîka maiga jarîa îkûmi na jaîrî kûu Giligali, jarîa baaritîte Jorodani.

²¹Rîu areera antû ba Israeli atîrî, “Rîrîa nchiarwa cieenu cia nyumeene ikooria beethe, ‘Gîtûmi kîa maiga jaja nî kîrîkû?’

²²Bûkabamenyithia bûbeere atîrî, ‘Antû ba Israeli baaunîre Jorodani beetîîrîte nthî înjûmo.’

²³Nîkwîthîrwa MWATHANI Mûrungu weenu nî aawîthîrie mûuro jwa Jorodani mwanka barathiria kuuna, o ta ûrîa MWATHANI Mûrungu weenu aathithîtie Îria Îtuune rîrîa aawîthîrie nîûntû bweetû mwanka tûrauna.

²⁴Tontû bûû, antû bonthe ba nthîgûrû bakaamenyaga atî MWATHANI arî inya; naabuî bûkîrage MWATHANI Mûrungu weenu mwanka kenya.”