Read KIMERU BIBLE PROTESTANT EDITION Josh 5 Bible Online

Josh 5 - KIMERU BIBLE PROTESTANT EDITION bible

Josh 5

¹Anene bonthe ba Aamori barîa baarî rwongo rwa rûgûrû rwa Jorodani na anene bonthe ba Akanaani barîa baarî rûteere rwa îria rîa Mediterania nî baaigîrue atî MWATHANI akûwîîthia mûuro jwa Jorodani mbere ya antû ba Israeli mwanka bauna. Nî baagwatîrwe nî ûguaa na baraitîîjîra buru mbere ya Aisraeli.

²Îgiiteene rîu MWATHANI nî eerîre Joshua, “Thithia tûchiû twa maiga na ûthithie îtaana rîa antû ba Israeli rîa jaîrî.”

³Joshua arathithia tûchiû twa maiga na arataanîra antû ba Israeli Gibeathi-haaralothi[1].

⁴Gîtûmi kîa Joshua kûthithia îtaana rîrî nî atî, arûme bonthe gatîgatî ga kîrîndi barîa baaumîte Misri baarî na ûkûrû bwa gwîta ndweene nî baarî bagûkuîra rwanda rûgendoone nyuma ya kuuma Misri.

⁵Antûarûme bau bonthe baaumîte Misri nî baataani, îndî barîa bonthe baaciarîrwe rwanda, rûgendoone nyuma ya kuuma Misri, bataataani.

⁶ Antû ba Israeli baakarîte rûgendoone rwanda mîaka mîrongo îna mwanka nthukî ya arûme barîa baumîte Misri barî na ûkûrû bwa gwîta ndweene îrathirua nîûntû bwa kûrega kwathîkîra MWATHANI. Nabo nîbo barîa MWATHANI aaciîtîrîtie atî atîreka boona nthîgûrû îrîa eerîîrîte beethe baao na mûciîtio, atî akabaa nthîgûrû îrîa nthongi na îrî mûthetu jûmûnoru na ûtonga bûbwingî.

⁷Antûûne a bo, nî aana baao MWATHANI ookîrîîrie na nîbo Joshua aataanîre nîûntû batoombîte gûtaanîrwa rûgendoone.

⁸Antûarûme bonthe bakûthiria gûtaanwa, nî baakarîre kambîîne mwanka rûtaano rûroora.

⁹MWATHANI areera Joshua atîrî, “Naarua ndîkûbûthirîria nthao cia kwîthîrwa bûrî nkombo Misri.” Tontû bûû antû au areetwa Giligali[2] mwanka naarua tûrî.

¹⁰ Nabo antû ba Israeli nî baakarîre Giligali na barathithia mambura ja Pasaka ûgoro bwa ntukû ya îkûmi na inya ya mweri jûu o kûu bûûrîîne ya Jeriko.

¹¹Ntukû îrîa yaathingatîte mambura ja Pasaka nîrîo baarîîre irio bia maciara ja nthî ya Kanaani; nabio biaarî mîgaate îtiimbithîtue na mpîndî inkarange.

¹² Kuuma rûûnene rwa ntukû îîu baarîre irio bia maciara ja nthîgûrû îîu, manna îrathira; na antû ba Israeli bataacoka kwona manna kaîrî, bareeta na mbere kûrîa maciara ja nthîgûrû ya Kanaani mwakeene jûu.

¹³Kûrakara atîrî, Joshua arî akuî na Jeriko nî aaciûkîrie meetho, na aroona muntû arûngi mbere yaawe, agwete rûchiû rûkûûri. Joshua areeta kîrî we aramûûria atîrî, “Ûrî wa rûteere rweetû kana rwa anthû beetû?”

¹⁴Nawe aramûcokeria atîrî, “Arî! Ûûni ndî mûtongeeria wa njûûrî ya MWATHANI!” Joshua araigwîthia, aratiirithia ûthiû bwaawe nthî na aramûthaathayia. Aracoka aramûûria atîrî, “Nîatîa MWATHANI Mweneinya waakwa akwenda kwîra nthûûmba yaawe?”

¹⁵Mûtongeeria wa njûûrî ya MWATHANI areera Joshua atîrî, “Rita iraatû magûrû jaaku, nîûntû antû aja ûrûngi nî antû aatheru.” Joshua arathithia o ûu.