Read KIMERU BIBLE PROTESTANT EDITION Josh 6 Bible Online

Josh 6 - KIMERU BIBLE PROTESTANT EDITION bible

Josh 6

¹Mpingîro cia Jeriko ciaingi irikîtue nîûntû bwa gûkîra antû ba Israeli. Gûtî we waumagaraga kana akûrûka ku.

²MWATHANI areera Joshua atîrî, “Raithîîria, ndîkûnenkanîra Jeriko njareene ciaaku amwe na mûnene waayo na nchamba ciaayo cia ndwaa.

³Naabuî bûthiûrûke ntûûra, nchamba cionthe cia ndwaa imîthiûrûke îthiûrûka rîmwe. Bûthithie ûu ntukû ithanthatû ithingatene.

⁴Athînjîri Mûrungu mûgwanja bakaajûkia ngoji cia ntûrûme cia kûringa batongeerie Îthandûkû rîa kîrîkanîro. Ntukû ya mûgwanja nîrîo bûkaathiûrûka ntûûra mainda mûgwanja na athînjîri-Mûrungu bakîringaga ngoji.

⁵Rîrîa bûkaigua baringa ngoji iu cia ntûrûme na mûgambo jûmûraaja, nîrîo antû bonthe bakagondoka na tûjû tûtûnene; naru rûthingo rwa ntûûra rûkamomoka rûgwe nthî mûthetuune, nabo antû batonyeere o arîa muntû akeethîrwa eerekerete.”

⁶Rîu Joshua mûtaana wa Nuni, areeta athînjîri-Mûrungu arabeera atîrî, “Jûkieni Îthandûkû rîa kîrîkanîro na bamwe beenu antû mûgwanja bakamatîte ngoji cia ntûrûme cia kûringa bakûrûke mbere ya Îthandûkû batongeerie.”

⁷Aracoka areera antû atîrî, “Îteeni bûthiûrûke ntûûra! Nabo bamwe ba barîa baikundîkîte mathaga ja ndwaa nî bakûrûke mbere batongeerie Îthandûkû rîa kîrîkanîro kîa MWATHANI.”

⁸Kûrakara atîrî, o ta ûrîa Joshua aarî akûbeera, athînjîri-Mûrungu mûgwanja barîa bakamatîte ngoji cia ntûrûme cia kûringa bareeta bakîringaga. Nabo athînjîri-Mûrungu barîa baakamatîte Îthandûkû rîa kîrîkanîro kîa MWATHANI barabathingata.

⁹Antû barîa baaikundîkîte mathaga ja ndwaa nî beetîre barî mbere ya athînjîri-Mûrungu barîa baarîngaga ngoji, nabo bau bangî barîa baarî na mathaga ja ndwaa bareeta barî nyuma ya Îthandûkû rîa kîrîkanîro kîa MWATHANI, nacio ngoji ireeta na mbere ikîringagwa.

¹⁰Joshua nawe nî aarî akwîra kîrîndî atîrî, “Bûtîkeeje kûringa gîtuma kana bûreka tûjû tweenu twiigîîgua. Ningî gûtîkaume mûgambo noo jûmwe tûnyuene tweenu mwanka ntukû îrîa nkaabwîra bûgondoke bûgîkuuraga rîu nîrîo bûkaagondoka.”

¹¹Joshua arareka Îthandûkû rîa kîrîkanîro kîa MWATHANI rîkumbûkua ntûûra rîmwe, rîu baracoka kambîîne baramama.

¹²Joshua ararooka gûûkîîra rûkîîrî kainda, nabo athînjîri-Mûrungu barajûkia Îthandûkû rîa kîrîkanîro kîa MWATHANI.

¹³Nabo athînjîri-Mûrungu mûgwanja barîa baarî na ngoji cia kûringa mûgwanja cia ntûrûme baratongeeria Îthandûkû rîa kîrîkanîro kîa MWATHANI, beetite na mbere kûringa ngoji. Nabo antû barîa baaikundîkîte mathaga ja ndwaa bareeta barî mbere yaao, nabo barîa baakabîte bwa nyuma bareeta bathingatîte Îthandîkû rîa kîrîkanîro kîa MWATHANI, ngoji nacio igîîtaga na mbere na kûringwa.

¹⁴Ntukû ya ijîîrî nî baathiûrûkîre ntûûra îthiûrûka rimwe, nabo baracoka kambîîne. Ûu nîu baathithîrie ntukû ithanthatû ithingatene.

¹⁵Ntukû ya mûgwanja, barookîra rûkîîrî kainda riûa rîkiuma nabo barathiûrûka ntûûra îîu mainda mûgwanja o ta ûrîa baathiûrûkîre rîa mbere îndî nî ntukû îîu yonka baathiûrûkîre ntûûra mathiûrûka mûgwanja.

¹⁶Bakîthiûrûka rîa mûgwanja, rîrîa athînjîri-Mûrungu baaringîre ngoji, Joshua areera kîrîndî atîrî, “Gondokeni! Nîkwîthîrwa MWATHANI akûbwaa ntûûra îîjî!

¹⁷Naabuî bûkaathiria ntûûra îîjî na into bionthe amwe na antû bonthe barîa barî ndeene yaayo biee kîgongwana gîkîathûrîre MWATHANI. Rahabu wenka, ûrîa mûmaraya, nî we ûkoonokua, na antû barîa barî amwe nawe nyomba yaawe, nîûntû bwa ûrîa aithîre achûnkûûni barîa twatûmîte.

¹⁸Îndî buî imenyeereni bûtîgatonge into biu biathûri birî bia kûthirua. Tontû bûkëeja kwirîrîria na bûkajûkia kinya kîmwe kîa biu biathûri, bigaatûma ûthûûku bwîjîîra kambî ya Israeli na kinya yo yee ya kûthirua.

¹⁹Îndî rî, fetha yonthe na thaabu na into bia îturutia na bia chuuma, biu nî biathûrîri MWATHANI, nabio bigeekwa mûthithûûne jwa MWATHANI.”

²⁰ Tontû bûû, kîrîndî kîraringa gîtuma na ngoji îraringwa. Rîrîa kîrîndî kîaigîrue mûgambo jwa ngoji, kîragondoka na kajû gakanene, naru rûthingo rûramomoka rûragwa nthî mûthetuune. Nakîo kîrîndî kîrakûrûka ntûûreene îîu, o muntû areetîîra arîa eerekerete, barataa ntûûra.

²¹Nabo barooraga na nchiû birîa bionthe biaarî ntûûreene îîu: arûme na aka, na baakûrû na baanini na ng'ombe na ng'ondu na ntigiri.

²²Joshua areera antû barîa baîrî baarî bagûcûnkûûna nthîgûrû atîrî, “Îteeni nyomba ya mûka ûrîa mûmaraya naabuî bûmuumagarie na barîa bonthe barî amwe nawe kûringana na ûrîa bwamûciîtîîrie.”

²³Tontû bûû, nthaka iu ciatûmi gûcûnkûûna nthîgûrû ireeta iraumagaria Rahabu na îthe na ng'ina na ataana-ba-ng'ina na antû baao bonthe. Ningî baraumagaria antû ba ndûgû ciaao bonthe barabeeka oome ya kambî ya Aisraeli.

²⁴Nabo baracina ntûûra îîu mwanki amwe na birîa bionthe biaarî ku, tiga fetha na thaabu na into bia îturutia na bia chuuma; biu barabiîka mûthithûûne jwa nyomba ya MWATHANI.

²⁵ Îndî Joshua nî onokerie Rahabu ûrîa mûmaraya amwe na antû ba nja ya îthe na antû bonthe barîa baarî amwe nawe; na nî batûûraga Israeli mwanka naarua tûrî, nîûntû bwa ûrîa Rahabu aithîre antû barîa Joshua aatûmîte gûcûnkûûna Jeriko.

²⁶ Îgiita rîu Joshua arabaa muuma akiugaga atîrî, “Muntû ûrîa ûkorokîîra gwaka ntûûra îîjî ya Jeriko nî ûmûrume meethoone ja MWATHANI. Akarîaa gwaka kîe kîaayo na mwana waawe wa kîranga, na arîee kûrûngîka mpingîro ciaayo na mwana waawe wa maturango!”

²⁷Tontû bûû MWATHANI areethîrwa arî amwe na Joshua, nayo nkuma yaawe îroojûra nthî yonthe.