Read KIMERU BIBLE PROTESTANT EDITION Josh 7 Bible Online

Josh 7 - KIMERU BIBLE PROTESTANT EDITION bible

Josh 7

¹Antû ba Israeli nî baaremerwe nî kwiingia ûrîa beeri bwegiî into birîa biabuîrîte kûthirua buru nîûntû bwa Mûrungu. Akani nî aajûkîrie bimwe bia into birîa biabuîrîte kûthirua buru nîûntû bwa Mûrungu. Akani ûu aarî mûtaana wa Karami, na Karami aarî mûtaana wa Zabidi na Zabidi aarî mûtaana wa Zera, wa kuuma mwîrîga jwa Juda. Tontû bûu, mûthûûro jwa MWATHANI nî jwatûrîkîîre antû ba Israeli.

²Joshua nî aatûmîre antû kuuma Jeriko bareeta Ai, ntûûra îrîa îrî bwa gaiti ya Betheli na akuî na Bethiaveni, arabeera atîrî, “Îteeni bûgacûnkûûne nthîgûrû.” Nabo antû bau bareeta baracûnkûûna Ai,

³na baracoka kîrî Joshua baramwîra atîrî, “Kinya antû batîtiinde gwîta nao bonthe. Nî beete ûû antû ta ngiri ijîîrî kana îthatû baithûkîre Ai. Ûgátinda kûnogeria kîrîndî kîonthe nao, nîûntû antû bau nî babakai.”

⁴Nabo antû ta ngiri ithatû kuuma kîrî kîrîndî bareeta kwithûkîra Ai, îndî baroombwa nî antû ba Ai na baramatûka.

⁵Nabo antû bau ba Ai barooraga antû mîrongo îthatû na batantatû ba Israeli. Ningî barabeengaînga kuuma mpingîroone ya ntûûra mwanka Shebarimu, na bareeta bakîbooragagîra mwînamoone. Nabo antû ba Israeli baragîa ûguaa na barathirîrwa nî inya.

⁶Rîu Joshua na akûrû ba Israeli baratambûranga nguû ciaao na baraigwîthia nthî na baratiirithia moothiû jaao nthî mbere ya Îthandûkû rîa MWATHANI mwanka ûgoro. Ningî baraigerera tîîri mîtwe yaao.

⁷Joshua arauga atîrî, “Wûûi-naanû! MWATHANI Mûrungu, nîmbi, îtûmîte ûreka antû baba bauna mûuro jwa Jorodani, nîkenda ûtûrekeeria njareene cia Aamori batûthiria? Tî kaaba tûrîngîng'anîrwa ni gûtûûra Rwongo rûrîa rûngî rwa Jorodani?

⁸MWATHANI, mbuge atîa nandî, na Israeli îguutatîra anthû baao yaamatûka!

⁹Akanaani na atûûri bonthe ba nthî îîjî baamenya ûntû bûbû, bagaatûcîgîîria batûthirie na riîtwa rîeetû rîebue nthîgûrû yonthe. A gwe nîatîa ûkaathithia ûtûûria ûkûmio bwa riîtwa rîaaku rîrînene?”

¹⁰MWATHANI areera Joshua atîrî, “Ûkîîra! Nîmbi waigwîthîria nthî ûjû?

¹¹Antû ba Israeli nî beeîtie; nî bakararîîtie rîathana rîrîa mbaathîte, nabo nî bajûkîtie into birîa mbathûrîrîtwe na nî baiyîte na baathithia mantû ja waayia. Ningî nî baringanîrîte into biu na into biaao.

¹²Tontû bûû, antû ba Israeli batîûmba kwirikîria mbere ya anthû baao. Bagarûkîte baamatûka anthû baao nîûntû nî baete ta gîntû gîa kwînyangua. Naani ntîkara amwe naabuî kaîrî bwarega kûrita into biu biathûrîtwe bia kûthirua gatîgatî keenu.

¹³Ûkîîra ûtherie kîrîndî, na uuge ûjû, ‘Itherieni nîûntû bwa rûûjû, nîkwîthîrwa MWATHANI Mûrungu wa Israeli ariuga atîrî, kûrî into bibiaathûre gatîgatîîne keenu buî antû ba Israeli. Bûtîûmba kwirikîria mbere ya anthû beenu mwanka rîrîa bûkaarita into biu biaathûre gatîgatîîne keenu.’

¹⁴Tontû bûû, gwakea rûkîîrî bûkeeja mbere yaakwa kûringana na mîîrîga yeenu. Mwîrîga jûrîa MWATHANI akoonanîa, jûkeeja mbere yaakwa o mûciî o mûciî. Naju mûciî jûrîa MWATHANI akoonania, antû baaju bakeeja mbere yaakwa o muntû o muntû.

¹⁵Muntû ûrîa ûkaagwatwa na into birîa biathûri akaîîthua na mwanki, amwe na into biaawe bionthe, nîûntû nî akararîtie rîathana rîa MWATHANI, na ningî nî athithîtie ûntû bwa kûthaithia Israeli.”

¹⁶Rûûneene Joshua ararooka gûûkîîra rûkîîrî kainda, nawe areeta antû ba Israeli o mwîrîga o mwîrîga; na mwîrîga jwa Juda jûroonanua.

¹⁷Ningî areeta mîciî ya mwîrîga jwa Juda o mûciî o mûciî; na mûciî jwa Zera jûroonanua. Rîu areeta mûciî jwa Zera o nja o nja, nayo nja ya Zabidi îroonanua.

¹⁸Aracoka areeta nja ya Zabidi o muntû o muntû, nawe Akani, mûtaana wa Karami mûtaana wa Zabidi mûtaana wa Zera wa mwîrîga jwa Juda, aroonanua.

¹⁹Joshua areera Akani atîrî, “Mûtaana waakwa, kîra MWATHANI Mûrungu wa Israeli na uumbûre mbere yaawe; nandî mbîîra ûrîa ûthithîtie na ûkámbitha.”

²⁰Akani aracokeria Joshua aramwîra, “Nî mma nî mbîîtie kîrî MWATHANI Mûrungu wa Israeli, na ûû nîu nthithîtie:

²¹rîrîa ndoonîre kîrî into birîa twataîte nguû înthongi mono ya îgûrû ya kuuma Shinari na kilo ijîîrî cia fetha na kînuku kîa thaabu kîa ûrito bwa nusu kilo, nî ndabiirîrîîrie na ndîrabijûkia. Nandî biînjîri nthî îemeene rîaakwa biaithwa ku, na fetha irî ruungu rwaabio.”

²²Tontû bûû, Joshua aratûma antû, nabo baroogîa mwanka îemeene, bareethîra mma into biu nî biithi îemeene rîa Akani na fetha îrî ruungu.

²³Nabo barabirita îemeene barabikia kîrî Joshua amwe na antû bonthe ba Israeli; barabirîkîîra nthî mbere ya Îthandûkû rîa kîrîkanîro kîa MWATHANI.

²⁴Joshua amwe na antû bonthe ba Israeli barajûkia Akani mûtaana wa Zera na fetha na nguû ya îgûrû na kînuku kîa thaabu, na ataana baawe na aarî baawe na ng'ombe ciaawe na ntigiri na ng'ondu ciaawe na îema rîaawe na into biaawe bionthe. Nabo barabaikia Mûguuruune jwa Akori[3]

²⁵Bagûkinya o Joshua aramûûria atîrî, “Nîmbi îtûmîte ûtûreetera thîîna? MWATHANI agagûkanûkia naarua!” Nabo antû ba Israeli bonthe baramûûraga na maiga amwe na antû ba nja yaawe na barabaîîthia na mwanki.

²⁶Nabo barabathûûmbîîra kîthûûmba gîkînene kîa maiga kîrîa gîtwîre o mwanka naarua tûrî. MWATHANI aratiga gwankanwa nî mûthûûro. Kîu nîkîo gîtûmaga antû au eetwa Mûguuru jwa Akori mwanka naarua îîjî.