Read KIMERU BIBLE PROTESTANT EDITION Josh 9 Bible Online

Josh 9 - KIMERU BIBLE PROTESTANT EDITION bible

Josh 9

¹Rîu anene bonthe barîa baatwîre rwongo rwa Jorodani rwa rûgûrû, nthî ya irîma na ya mûgwanthî, na rûteere runthe rwa îria rîa Mediterania gwîta bwa Lebanoni: Ahiti na Aamori na Akanaani na Aperizi na Ahivi na Ajebusi, rîrîa baigîrue mantû jau,

²nî boothûranîre, baragwatanîra gwîta kûrwaa na Joshua na Israeli.

³Îndî rîrîa atûûri ba Gibeoni tabo Ahivi, baigîrue ûrîa Joshua aarî akûthithîria Jeriko na Ai,

⁴bo nî baathûgaanîrie gûtumîra ûûme. Nabo bareeta bararinga rîîgu, na barajûkia ithango bia nkunia baraara mîgongo ya ntigiri ciaao. Ningî barajûkia biujo bia ndibei bibikûrû mono na biûjûri iraka.

⁵Ningî bareekîra iraatû bibithiru birî na iraka, na nguû inthiru. Nayo mîgaate yaao ya rîîgu yaarî îmiumu na îmîûmagaru.

⁶Nabo bareeta kîrî Joshua amwe na antû ba Israeli kambîîne yaao Giligali barabeera ûjû, “Tuumîte nthî ya kûraaja, na nîûntû bûu nî bwega bûthithie kîrîkanîro naatuî.”

⁷ Îndî antû ba Israeli bareera antû bau atîrî, “Bwoomba kwîthîrwa bûtwîre akuî naatuî. Nîatîa îndî tûûmba kûthithia kîrîkanîro naabuî?”

⁸Nabo bareera Joshua atîrî, “Tuî tûrî nthûûmba ciaaku.” Joshua nawe arabooria, “Ka bûrî ba û na nîkû buumîte?”

⁹Nabo baramûcokeria atîrî, “Nthûûmba ciaaku ciumîte nthî ya kûraaja mono nîûntû nî twigîîtue îgweta rîa MWATHANI Mûrungu waaku. Nî twigîtue mantû jarîa jonthe aathithîîrie Misri,

¹⁰ na jarîa jonthe aathithîîrie anene barîa baîrî ba Amori barîa baarî rwongo rwa Jorodani rwa gaiti, nabo nî Sihoni mûnene wa Heshiboni na Ogi mûnene wa Bashani, ûrîa waatwîre Ashitarothi.

¹¹Atongeeria beetû na atûûri bonthe ba nthî yeetû nî baarîîtie naatuî batwîra atîrî, ‘Jûkieni rîîgu nîûntû bwa rûgendo, bwîîte bûtirime antû bau bûbeere atîrî: Tuî tûrî nthûûmba cieenu; nandî nî bwega bûthithie kîrîkanîro naatui!’

¹²Mîgaate îîjî yeetû yaarî na mwanki rîrîa twamîjûkîrie îrî rîîgu yeetû kûûma nyomba cieetû, ntukû îrîa twaumagaraga twîja kîrî buî. Nandî tegeeni bwoone nî îmiumu na îmîûmagaru!

¹³Biujo bibi biaarî bibierû tûkîbiîkîra ndibei, na nandî nî bûkwona nî bibitûrîkangu! Nguû cieetû na iraatû bieetû nî birathirîre nîûntû bwa ûrîa rûgendo rûraarî rûrûraaja!”

¹⁴Nabo antû ba Israeli bararûma rîîgu îîu yaao, batîrombete kîrîra kîrî MWATHANI.

¹⁵Joshua areeka kîrîkanîro kîa thîîrî nabo atî akareka batûûre mwoyo. Nabo atongeeria ba kîûthûrano bararikithia kîrîkanîro kîu na mûciîtio.

¹⁶Naku kûrakara ûjû, nyuma ya ntukû ithatû kuuma Aisraeli bakûthithia kîrîkanîro na antû ba Gibeoni, Aisraeli nî baigîrue atî antû bau baarî atûûri baao.

¹⁷Antû ba Israeli bareeta rûgendo, barakinya ntûûreene cia antû ba Gibeoni ntukû ya ithatû. Nacio ntûûra iu ciaarî Gibeoni, na Kefira, na Beerothi, na Kiriathi-jearimu.

¹⁸Nabo antû ba Israeli bataabooragîre nîûntû atongeeria baao nî baarî bagûciîtîria antû ba Gibeoni na riîtwa rîa MWATHANI Mûrungu wa Israeli. Nakîo kîûthûrano kîonthe kîranung'unîra atongeeria.

¹⁹Nabo atongeeria bonthe bareera kîûthûrano kîonthe atîrî, “Nî twabaciîtîîrie na riîtwa rîa MWATHANI Mûrungu wa Israeli, na nîûntû bûu tûtîûmba kûbaringithia.

²⁰Îndî ûrîa tûkûbathithîria nî ûjû: tûrîtigana nabo batûûre mwoyo tûtîkeeje gûkanûkua nî MWATHANI nîûntû bwa mûciîtio jûrîa twabaciîtîîrie.”

²¹Rîu atongeeria barauga atîrî, “Rekaneni nabo batûûre.” Tontû bûû antû ba Gibeoni baraa auni ba nkû na atai ba rûûjî ba kîûthûrano gîa Israeli kîonthe o ta ûrîa atongeeria baugîîte.

²²Joshua nî aatûmanîîre antû bau ba Gibeoni arabooria, “Nîmbi îtûmîte bûtwaîria bûkiugaga bûrî ba kûraaja naatuî o rîrîa bûtwîre akuî naatuî?

²³Tontû bûû, bûrî na kîrumi, na bamwe beenu bakaa nkombo na auni ba nkû, na atai rûûjî ba nyomba ya Mûrungu waakwa.”

²⁴Nabo baracokeria Joshua baramwîra atîrî, “Nî twaarî tûkwîrwa ûrîa MWATHANI Mûrungu waaku eerîte Musa nthûûmba yaawe atî akabûnenkera nthî îîjî yonthe na atî akaathiria antû bonthe barîa batwîre ku baume mbere yeenu. Naatuî nî twagwatîrwe nî ûguaa bûbûnene mono tûkîbûkîra na nîkîo gîatûmîre tûthithia ûntû bûu.

²⁵“Rîu tuî tûrî njareene ciaaku, tûthithîrie ûrîa ûkoona kwagîrîte.”

²⁶Nawe arabathithîria ûjû: araboonokia kuuma njareene cia antû ba Israeli bararega kûbooraga.

²⁷Ntukû îîu, Joshua arabaeethia auni ba nkû na atai ba rûûjî ba kîûthûrano gîa antû ba Israeli na ba kîritîro kîa igongwana kîa MWATHANI mwanka naarua tûrî. Îîu nîyo ngûgî îrîa baritaga o kunthe kûrîa MWATHANI athuuraga.