Read KIMERU BIBLE PROTESTANT EDITION 2Ath 2 Bible Online

2Ath 2 - KIMERU BIBLE PROTESTANT EDITION bible

2Ath 2

¹ Ataana na aarî ba baaba, ka mbwîre mantû jegiî kwîja kwa Mwathani weetû Jesû Kristû na kûûthûrana gweetû amwe nîkenda tûkara amwe nawe.

²Bûkágagua mathûgaanioone jeenu kana bûbabaîkua nî ûroria kana ndwaria kana barûga, îkîîragwa yumîte kîrî tuî bûkîîragwa atî ntukû ya Mwathani nî îkinyîte.

³Bûgéetîkîreni kwaîrua nî muntû na njîra no îrîkû, tontû Ntukû îîu îtîkinya mbere ya antû babaingî baregana na Waatho bwa Mûrungu na ûrîa Mûûî aumîrua, ûrîa wakîrîtue mwanki jwa kenya na kenya.

⁴ We akarwaa na gîntû kîonthe kîrîa kijîkeene ta mûrungu kana gîntû gîa kûthathaua, nawe akaithûngûûra îgûrû rîa mîrungu yonthe. Ningî agakûrûka kinya kîûrûûne kîa Mûrungu akiugaga nîwe Mûrungu.

⁵Ka bûtîkûririkana atî rîrîa ndaarî amwe naabuî nî ndaabwîrîre ûntû ta bûu bûkeeja?

⁶Buî nî bûkûmenya kîrîa kîgirîtie eeja nandî. Ka eteerete îgiita rîaawe rîkinya.

⁷Kinya nandî ûrîa Mûûî nî akûrita ngûgî na wiitho, îndî akaumîrua rîrîa ûrîa ûmûrigîrîtie akaritaritwa o nî Mûrungu.

⁸ Rîu nîrîo ûrîa Mûûî akaguûrwa, îndî Mwathani Jesû akeeja, amûûrage na mîrukî ya kuuma kanyua kaawe na amwînyangie na gûkenga kûrîa akeeja naku.

⁹ Ûu Mûûî akeeja arî na inya ya Nkoma na aringe biama na athithie mantû ja kûrigaria.

¹⁰Agatumîra waayia bwa mîthemba yonthe nîkenda akayia barîa bakaûra. Tontû antû bau nî baregete kwenda ûûma nîkenda bakoonoka.

¹¹Kîu nîkîo gîtûmîte Mûrungu abatûmîra inya ya waayia nîkenda bageetîkia mantû ja ûrongo.

¹²Mûthieene ûrîa gûgakarîka nî atî antû bonthe barîa batîtîkîtie ûûma, îndî nî mantû ja meeyia bagwîragua nîjo, bakagitîrwa îgamba bûbûûî.

¹³Nî tûbuîrîte gûcokagîria Mûrungu nkaatho tontû bweenu, buî ataana na aarî ba baaba barîa bwendi nî Mwathani. Gîtûmi nî atî Mûrungu nî abûthuurîre kuuma kîambîrîria nîkenda bûkoonoka na njîra ya kûtherua nî Roho na gwîtîkia nteto cia mma.

¹⁴Jûjû nîju mwîto jûrîa aabwîtîre kuumania na Nteto Injega îrîa twaabûtûmîîrîrie nîkenda bûkaeewa ûkumio bwa Mwathani weetû Jesû Kristû.

¹⁵Tontû bûû, ataana na aarî ba baaba, ciaandeni na bûrikie mooritani jarîa twabûritanîre na njîra ya kûbûtûmîrîria kana ya kûbwaandîkîra barûga.

¹⁶Mwathani weetû Jesû Kristû wengwa na Mûrungu Baaba weetû, ûrîa watwendere na aratwaa ûkiri bûrîa bûtîthiraga na wîrîgîîro bûbwega kuumania na ûtugi bwaawe,

¹⁷arooboreria nkoro cieenu na aciîkîre inya ya kûritaga ngûgî injega na kwaragia rwaria rûrwega.