Read KIMERU BIBLE PROTESTANT EDITION 2Ath 3 Bible Online

2Ath 3 - KIMERU BIBLE PROTESTANT EDITION bible

2Ath 3

¹Nkîthirîria ataana na aarî ba baaba ndîbwîra atî tûrombagîreni nîkenda rûteto rwa Mwathani rûgatamba na mpwîî na rwîtîkagîîrue na gîtîîo o ta ûrîa rwathithîrie gatîgatîîne keenu.

²Ningî tûrombereni nîkenda tûkoonokua kuuma kîrî antû ndemi na barîa baaî, tontû tî bonthe betîkîtie.

³Îndî we Mwathani nî mwîtîkua. Agatûma bûkara na inya na abûkaragie kîrî ûrîa Mûûî.

⁴Naatuî tûrî na mma mantûûne jeenu ndeene ya Mwathani, atî nî bûkûthithia na bûgeeta na mbere kûthithia mantû jarîa tûbwathîte bûthithagie.

⁵Mwathani arobûtongeeria nîkenda bûgaciûra wendo bwa Mûrungu na kûûmîîria kûrîa kumanagia na Kristû.

⁶Nandî ataana na aarî ba baaba, tûrîbwatha ndeene ya Mwathani Jesû Kristû, atî bûciathûranage na mûkristû o wonthe ûrîa ûrî mûthao na atîtûûraga ta ûrîa twaabûritanîre.

⁷Tontû buî bwingwa nî bûkûmenya ûrîa bûbuîri kwigerekania naatuî. Tûtaarî athao rîrîa twaatwîre amwe naabuî.

⁸Tûtaarîa biakûrîa bia muntû tûtîrîte mbeecha. Tuî twainogagia na kûrita ngûgî na inya ûtukû na mûthenya nîkenda tûtîkae mûrigo kîrî muntû kinya ûrîkû.

⁹Tî kuuga ga tûtaarî na mma ya gwîtia ûtethio kuuma kîrî buî, îndî ga twendaga buî bwona ngerekano kuuma kîrî tuî.

¹⁰Tontû kinya rîrîa twaarî amwe naabuî nî twaabwathîre atî muntû kinya ûrîkû ûrîa ûtîrita ngûgî akárîa.

¹¹Tûriuga ûu nîûntû nî twigîtue atî bamwe beenu batûûraga mûtûûrîre jwa ûthao. Nabo batîthithagia no atîa tiga gûtonyeera ngûgî cia antû bangî.

¹²Riîtweene rîa Mwathani Jesû Kristû tûrîatha antû ta bau baritage ngûgî ciaao bamaarîrîte nîkenda bakoona gîntû gîa gwiteethia bongwa.

¹³Ataana na aarî ba baaba bûkánoga kûthithia mantû jameega.

¹⁴Ûrîa ûkarega kwathîkîra mantû jarîa tuugîîte barûgeene îîjî, mweeni meetho na bûciathûrane nawe, nîkenda agacokerwa nî nthao.

¹⁵Bûkámûjûkia arî mûnthû weenu îndî mûkaanieni arî ûmwe weenu.

¹⁶Mwathani ûrîa ûrî kaumo ka thîîrî arobweejaga thîîrî magiita jonthe na njîra cionthe. Mwathani arokaraga amwe naabuî bwinthe.

¹⁷Nkeethi kuuma kîrî Paûlû: nî ni Paûlû ndaandîka nkeethi îîjî na njara yaakwa ningwa. Ûu nîu mbîkagîra caini barûgeene ciaakwa cionthe.

¹⁸Ûtugi bwa Mwathani weetû Jesû Kristû bûrokaraga naabuî bwinthe.