Read KIMERU BIBLE PROTESTANT EDITION 1Tim 2 Bible Online

1Tim 2 - KIMERU BIBLE PROTESTANT EDITION bible

1Tim 2

¹Mbere mma ndîbûûria bwerencanagîîre bangî na bûrombage na bûrombagîre bangî na bûcokagîrie Mûrungu nkaatho nîûntû bwa antû bonthe.

²Rombagîreni anene na atongeeria bonthe, nîkenda tûtûûrage na ûkiri na thîîrî, tûgîkîraga Mûrungu na tûrî na mîîtîre îmîega.

³Ûntû bûu nîbu bwega na nîbu bûgwîragia Mûrungu Mwonokia weetû.

⁴We eendaga antû bonthe boonoke na bamenye ûûma.

⁵Tontû Mûrungu nî ûmwe, nawe ûrîa wigithanagia Mûrungu na antû nî ûmwe nawe nî muntû ûrîa wîtagwa Kristû Jesû.

⁶Nîwe wairitîre arî mûkûûri wa antû bonthe. Ûntû bûu nî bwonanîrue îgiita rîrîa rîagîrîte rîgûkinya atî Mûrungu nî aarî na mworoto jwa kwonokia antû bonthe.

⁷ Kîu nîkîo gîatûmîre mpeethua mûtûmîîria na mûtûmwa kîrî antû barîa batî Ayahudi nîkenda nkabaritana mantû ja wîtîkio na ûûma. Nî mma nkuuga na ntîkwaria ûrongo.

⁸Rîrîa bûcemenie amwe ndîenda arûme barombage bookîîrîtie njara intherû bwa îgûrû kîrî Mûrungu batî na mûthûûro kana mateta.

⁹ Ningî ndîenda aka bekagîre nguû bwega na irîa ikwonania gîtîîo. Beekagîre bwega na tî na gûcuka nchiûri kana baigemia na into bia thaabu kana tuiga twa goro kana nguû cia goro,

¹⁰îndî nî baithongomagie na mathithio jameega, tontû ûu nîu kwagîrîte kîrî aka barîa baugaga nî akristû.

¹¹Aka babuîri gûkira ki na bainyiîtie rîrîa bakûritanwa.

¹²Ntîgwîtîkîîria mûka kinya ûrîkû aritana kana eethîrwa arî na waatho kîrî arûme. Aka babuîri gûkira ki.

¹³ Tontû Adamu nîwe waambîre kûûmbwa, rîu Hawa aroombwa.

¹⁴ Ningî Adamu tîwe waaîrîrue îndî nî mûka waaîrîrue na araa mwîyia.

¹⁵Îndî amwe na jau mûka akoona wonokio tontû bwa gûciara twaana, këethîra agatûûra eetîkîtie na arî na wendo na ûtheru bwa nkoro amwe na mîîtîre îmîega.