Read KIMERU BIBLE PROTESTANT EDITION 1Tim 3 Bible Online

1Tim 3 - KIMERU BIBLE PROTESTANT EDITION bible

1Tim 3

¹Ûrîa kuugagwa nî bwa mma: këethîra kûrîwe ûkwenda kwaa mûtongeeria wa kanisa, nî akwenda ngûgî înjega.

² Rîu mûtongeeria wa kanisa abuîri kwîthîrwa arî muntû ûtî na îgi na abuîri kwîthîrwa agûrîte mwekûrû ûmwe akî na muntû ûkûûmba gwikaania mantû. Ningî eethîrwe arî ûmûciûku na ûrî na mîîtîre îmîega na mûgwatani ûgeni na mûritani ûmwega,

³muntû ûtî mwogiti na ûmûkiru na ûtîendeete ndwaa na ûtî mûteti na muntû ûtîendeete mbeecha.

⁴Abuîri kwîthîrwa arî muntû ûkûûmba gûtongeeria nja yaawe bwega na akîûmbaga gûtûma aana baawe baathîka na barî na nthoni injega mantûûne jonthe.

⁵Tontû muntû akëeja kwîthîrwa atîûmbaga gûtongeeria nja yaawe bwega, nîatîa oomba kûmenyeera kanisa ya Mûrungu?

⁶Mûtongeeria wa kanisa abuîri kwîthîrwa arî muntû ûkûri bwega mantûûne ja wîtîkio, atîkeeje kûûjûrwa nî mantû ja gwikumia eeja gûtuîrwa îgamba bûbûûî ta ûrîa Nkoma aatuîrîîrwe.

⁷Ningî abuîri kwîthîrwa arî muntû ûgûtîîwa nî antû barîa batî ba kanisa, atîkeeje gûcokerwa nî nthao na atonya mûtegoone jwa Nkoma.

⁸Nou kinya antû barîa bateethagîîria ngûgîîne cia ûtongeeria bwa kanisa babuîri kwîthîrwa barî na mîîtîre îmîega na antû barîa baragia ûûma îgiita rîonthe. Batîbuîri kûnyua ndibei înyingî kana antû barî îtenûka rîa mbeecha.

⁹Babuîri kwîthîrwa barî antû barikîtie mantû ja wîtîkio jarîa Mûrungu aguûrîte na barî na mathûgaanio jatîkûbagambithia.

¹⁰Mbere babuîri kwamba kûgerua na baakûrûka rîu beetîkîrue kûrita ngûgî ya gûteethereria ûtongeeria bwa kanisa.

¹¹Kinya eekûrû baao babuîri kwîthîrwa barî antû barî na mîîtîre îmîega na tî aguutani na beethîrwe bakîûmbaga gwikaania mantû na antû eetîkua mantûûne jonthe.

¹²Barîa bateethagîria ngûgîîne cia ûtongeeria bwa kanisa, babuîrîte kwîthîrwa bagûrîte mwekûrû ûmwe akî na bakîmenyagîîra aana baao na nja ciaao bwega.

¹³Tontû antû barîa baritaga ngûgî injega barî ateethereria ngûgîîne cia ûtongeeria bwa kanisa nî batîîagwa na bakagîta ûchamba bwa kwarîîria mantû jegiî wîtîkio bwaao ndeene ya Kristû Jesû.

¹⁴Ndîbwaandîkîra barûga îîjî ndî na wîrîgîîro bwa kwîja kîrî buî rua.

¹⁵Îndî nkëeja gûcereerwa ntîreeja, barûga îîjî nî îbwonagîîrie ûrîa muntû abuîri gûkarania na bangî kîûrûûne kîa Mûrungu. Kîûrû kîu nîkîo kanisa ya Mûrungu ûrîa ûtûûraga mwoyo na nîyo gîtugî na mûsingi jwa ûûma.

¹⁶Nî mma atî kîriga kîa ndini yeetû nî gîa kûrigaria: Kristû nî onanîrue arî na mwîrî jwa muntû, ararikithua nî aarî wa mma nî Roho, nawe aroonwa nî araîka. Mantû jaawe jaratûmîîrua kîrî mîgongo, areetîkua nthîgûrûûne, nawe araitithua îgûrû na ûkumio.