Read KIMERU BIBLE PROTESTANT EDITION 1Tim 4 Bible Online

1Tim 4 - KIMERU BIBLE PROTESTANT EDITION bible

1Tim 4

¹Nandî Roho nî augîîte tarîîria atî ntukûûne cia mûthia, antû bamwe bagatigana na wîtîkio na bathingate roho cia waayia na mooritani ja roho inthûûku.

²Mooritani jau jatambagua nî antû barîa arongo na aîîrania barîa mathûgaanio jaao jathaati ta gîntû kîîthîtue na chuuma îrî na mwanki.

³Antû bau baritanaga atî antû batîbuîrîte kûgûrana kana kûgûrwa na ningî bakauga biakûrîa bina bikárîîwa. Îndî Mûrungu oombîre biakûrîa biu birî bia kûrîîjagwa nî antû barîa beetîkîtie na baamenya ûûma bakîmûcokagîria nkaatho.

⁴Nîkwîthîrwa into bionthe birîa Mûrungu oombîre nî bibiega, na gûtîkîo kîbuîri kûregwa bunka gîkîrîîjagwa kûrî na îromba rîa nkaatho.

⁵Tontû rîu biîthagîrwa bikweethua bibitheru nî rûteto rwa Mûrungu na maromba.

⁶Ûkëeja kûritana akristû mantû jau, weethîrwa ûrî nthûûmba înjega ya Kristû Jesû îrîa îreri bwega na nteto cia wîtîkio kuumania na mooritani jameega jarîa ûtwîre ûkîthingataga.

⁷Regana na ngono cia waa irîa ciaateenie na ûritani bwa Nteto cia Mûrungu. Iritanage gûkîra Mûrungu,

⁸tontû kûmenyeria kûritithagia irûngo bia mwîrî mîceetho kûrî umithio mwîrîîne îndî kwimenyeria gûkîra Mûrungu kûrî umithio na njîra cionthe tontû nî kweei wîrane ûtûûroone bûbû bwa nandî na kinya ûtûûroone bûrîa bûkeeja.

⁹Ûntû bûu nî bwa mma buru na bûbuîri gwîtîkîrwa.

¹⁰Nîkwîthîrwa tuithangîkagia tûkîritaga ngûgî na wîru, tûgîcwaa gûkinyîra ûntû bûu, tûîkîte wîrîgîîro bweetû kîrî Mûrungu ûrîa ûtûûraga mwoyo, we ûrîa ûrî Mwonokia wa bonthe na mono mono barîa beetîkîtie.

¹¹Kinyagîîria na ûritanage mantû jau.

¹²Ûkáreka muntû kinya ûrîkû eeja gûkûmena nîûntû ûrî ûmwîthî. Îndî eejaga ngerekano înjega kîrî barîa betîkîtie rwarieene na mîtîreene na mantûûne ja wendo na wîtîkio na mûtûûrîre jûmûtheru.

¹³Thoomagîra antû Maandîko jamatheru na ûbatûmagîîrie na kûbaritanaga mwanka rîrîa nkeeja.

¹⁴Ûgátiga kûritithia ngûgî kîewa kîa Roho kîrîa waeerwe kuumania na nteto cia ûroria rîrîa kîûthûrano kîa akûrû gîakûrîîkîrîre njara ciaao.

¹⁵Ritaga ngûgî iu na wîru mono na ûcieejane kîrî cio buru, mwanka antû bonthe boone atî nî wîtîte na mbere bwega.

¹⁶Imenyagîîre gwe gwengwa na ûmenyagîîre ûritani bwaaku. Athîkagîra mantû jau, tontû wathithia ûu, ûgacionokia na wonokie antû barîa bakûthikagîîra.