Read KIMERU BIBLE PROTESTANT EDITION 1Tim 6 Bible Online

1Tim 6 - KIMERU BIBLE PROTESTANT EDITION bible

1Tim 6

¹Antû barîa barî nkombo babuîri gûtîîaga aathi baao nîkenda riîtwa rîa Mûrungu na ûritani bweetû bûtîkeeje kûthûûmbua.

²Nkombo irîa aathi baacio barî akristû nî ibuîri kûbagwatîra nthoni nîûntû bwa kwîthîrwa nî ataana na aarî ba baaba. Babuîri kûrita ngûgî bwega nkûrûki nîûntû barîa bakûgunîka nî ngûgî ciaao nî eetîkia na eendwa beetû. Ritanaga na ûkainyagîîria mantû jau.

³Muntû kinya ûrîkû ûraritana ûritani mwanya na bûu na akëethîrwa atîgwîtîkania na nteto cia Mwathani weetû Jesû Kristû kana ûrîa tûritanaga,

⁴muntû ûu nî mwikumia na gûtî u aijî. Muntû ta ûu eendeete mateta na kûringanagîra nkaanja mantûûne jegiî biugo. Mantû jau nîjo jareetaga rûriitho na kwathûkana na kûthûmbania na kûthûgaanagîria bangî mathûgaanio jamaaî.

⁵Mantû jau nîjo jareetaga mateta jarîa jatî na mûthia kuuma kîrî antû barîa barî mathûgaanio jamathûûku na barîa bathirîri nî mantû ja ûûma. Antû bau bathûgaanagia atî ndini nî gîntû kîa gwitongia nakîo.

⁶Bûrîo atî gûkîra Mûrungu nî gûtûmaga muntû aa gîtonga gûkëeja kwîthîrwa akang'anîrwa nî birîa arî nabio.

⁷Tontû tûkîîja nthîgûrû, gûtî kîo tweejîre nakîo na tûkiuma ku, gûtî kîo tûkauma na kîo.

⁸Îndî tûkëeja kwîthîrwa tûrî na biakûrîa na nguû, nî tûng'anagîrwe nî biu.

⁹Îndî antû barîa bendaga gûtonga nî batonyaga magerioone na mîtegoone na bagatonya mairîrîrieene jarîa jatî na gîtûmi na jarîa jabaigithagia ûrûrû na jagatûma beenyanga na bathûûka.

¹⁰Tontû kwenda mbeecha nîko kaumo ka moothûûku ja mîthemba yonthe. Wirîrîria bwa mbeecha nî bûtûmîte antû bamwe bauma na baûra mantûûne ja wîtîkio na beekîrithia nkoro ciaao rwaakaî rûrwingî.

¹¹Îndî gwe Timotheo, muntû wa Mûrungu, ûkëeja gûtonya mantûûne ta jau. Ciûmie ûkinyîre mantû ja waagîru na gûkîra Mûrungu na wîtîkio na wendo na kûmîîria o na ûkiri.

¹²Rûjaga ndwaa îrîa njega ya wîtîkio; ciûmie ûkinyîre ûtûûro bwa kenya na kenya. Tontû kîu nîkîo weetîîrwe nî Mûrungu rîrîa waumbûrîre wîtîkio bwaaku ûrî mbere ya akûûjî babaingî.

¹³ Ndîkwîra ndî mbere ya Mûrungu ûrîa ûtûmaga into bionthe bitûûra o na mbere ya Kristû Jesû ûrîa waritîre ûkûûjî bwaawe mbere ya Pontio Pilatû,

¹⁴atî wathîkagîre maathana na ûjathingatage bwega ûtî na bwa kûgutîrwa mwanka rîrîa Mwathani Jesû Kristû akeeja.

¹⁵Kwîja kwaawe gûkoonanua îgiita rîrîa rîagîrîte rîgakinya nî Mûrungu ûrîa ûrî Mwene waatho na ûmûtharime nthîgûrûûne yonthe, na ûrîa ûrî Mûnene wa anene na Mwathani wa athani bangî bonthe.

¹⁶We wenka nîwe ûtûûraga kenya na kenya na atûûraga weerûûne bûrîa gûtî we ûûmba gûkuîrîîria. Gûtî we wamwona kinya rî na gûtî we ûkoromwona. Nîwe wenka ûbuîri gwîkagîîrwa na gûkara na waathani bwa kenya na kenya! Amen.

¹⁷Kaania barîa barî itonga mantûûne ja nthîgûrû batîkeeje gwikumia na beeka wîrîgîîro bwaao kîrî into birîa bitîûmba kwîrîgîîrwa îndî nî berîgîîre Mûrungu ûrîa ûtweete into bionthe na magi bia gûtûma tûgwîrua.

¹⁸Beere nî bathithagie mawega na bethagîrwe barî itonga mantûûne ja kûthithia mawega. Nî baeejanage na magi na bateethagie antû na into biaao.

¹⁹Ûu nîu itonga bigaciîkîra mûthithû jûmwega jûrîa jûkaa mûsingi jûmûriku jwa îgiita rîrîa rîkeeja. Rîu nabio bikagîta ûtûûro bûrîa bûrî bwa mma.

²⁰Timotheo, menyagîîra mantû jonthe jarîa ûthirîtie kûnenkerwa jarî kiindajî. Reganaga na ndwaria cia nthîgûrû na nkaanja cia waa irîa antû bamwe beetaga “Ûmenyo” na tî bu.

²¹Nîkwîthîrwa antû bamwe nî baatiganîre na wîtîkio bûrîa baarî nabu bagiikumagia ûrîa bomîi na ûmenyo ta bûu. Ûtugi bwa Mwathani bûrokaraga naabuî bwinthe.