Read KIMERU BIBLE PROTESTANT EDITION 2Tim 1 Bible Online

2Tim 1 - KIMERU BIBLE PROTESTANT EDITION bible

2Tim 1

¹Nî ni Paûlû, nîûntû bwa kwenda kwa Mûrungu, mpeete mûtûmwa wa Kristû Jesû nîkenda ngatûmîîria wîrane bwa ûtûûro bûrîa bwonekaga nîûntû bwa kûgwatanîra na Kristû Jesû.

² Nî ngûkwaandîkîra gwe Timotheo mwana waakwa ûrîa mpendeete. Ûtugi na kîaao na thîîrî birîa biumaga kîrî Mûrungu Baaba na Mwathani weetû Kristû Jesû birokaraga naagwe.

³Rîrîa nkûririkanaga marombeene jaakwa nî ncokagîria Mûrungu nkaatho ntîkwigambithia, o ta ûrîa biûjûjû biaakwa biaathithagia.

⁴O rîonthe rîrîa ndirikanaga methori jaaku, nî ndiriragîîria mono ûtukû na mûthenya gûkwoona nîkenda nkoojûrwa nî kûgwîrua.

⁵ Nî nkaraga nkîririkanaga wîtîkio bwaaku bûrîa bûtî bwa waayia. Wîtîkio ta bûrîa ûjûûgu Loise na kinya nyakwe Yunîsi baarî nabu na ndî na mma nîbu kinya gwe ûrî nabu.

⁶Tontû bûû, nî ngûkûririkania ûritithagie ngûgî kîewa kîa Mûrungu kîrîa waeerwe rîrîa ndakûrîkîrîre njara ciaakwa.

⁷Tontû Mûrungu atatweere Roho wa gûtûma twaa iguaa îndî atweere Roho wa ûchamba na wendo o na wa gwikaania mantû.

⁸Tontû bûû, ûkáigua nthao ûgîkûûjîîra mantû ja Mwathani weetû, kana wigua nthao nîûntû bwaakwa ni ndî mûthaîke nîûntû bwaawe. Îndî kinya gwe gwatanîra naatuî mîthangîkoone nîûntû bwa Nteto Injega ûrî na inya kuuma kîrî Mûrungu.

⁹Nîwe waatwonokerie na aratwîta na mwîto jwaawe jûmûtheru. Ataatwîtîre nîûntû bwa kwagîra kwa ngûgî irîa twaaritîte, îndî aatwîtîre nîûntû bwa mûbango na ûtugi bwaawe bûrîa atweere ndeene ya Kristû Jesû kuuma kûûmbwa kwa nthîgûrû.

¹⁰Îndî ûntû bûu bûguûri îgiiteene rîrî tûrî nîûntû bwa kwîja kwa Mwonokia weetû Kristû Jesû, ûrîa wathirîrie gîkuû na aratwonia ûtûûro bwa kenya na kenya kuumania na Nteto Injega.

¹¹ Nteto iu Injega nîcio ndathuurîrwe mpaa mûtûmîîria na mûtûmwa o na mûritani waacio,

¹²na nîkîo gîtûmaga nthangîka ûu nkûthangîka nandî. Îndî ntiigagua nthao nî ûntû bûu, tontû nî mbijî ûrîa mbîtîkîtie, na ndî na mma atî we akamenyeera kîrîa ampeete mwanka Ntukû îu îkinye.

¹³Thingataga na wîru Nteto Injega irîa wigîîtue kuuma kîrî ni mantûûne ja wîtîkio na wendo birîa biumanîtie na Kristû Jesû.

¹⁴Menyagîîra ûûma bûrîa waeerwe nî Roho Ûmûtheru ûrîa ûtûûraga ndeene yeetû.

¹⁵Gwe nî wiijî atî bonthe barîa batwîre ndeene ya nthîgûrû ya Asia, barî amwe na Fugelo na Herimogenesi, nî baambîrûkîîre.

¹⁶Mwathani aroigîîrua antû ba mûciî jwa Onesiforo kîaao, nîkwîthîrwa we nî atûmaga mbigua nogoki nkoroone jamaingî tontû ataigua nthao nîûntû bwa kûthaîkwa gwaakwa.

¹⁷Îndî we rîrîa aakinyîre Roma nî aancwîre na wîru mwanka araambona.

¹⁸Mwathani aroomwigîîrua kîaao Ntukû îîu yakinya! Kinya gwe nî ûkûmenya bwega mantû jamaingî jarîa aanthithîîrie kûrîa Efeso.