Read KIMERU BIBLE PROTESTANT EDITION 2Tim 3 Bible Online

2Tim 3 - KIMERU BIBLE PROTESTANT EDITION bible

2Tim 3

¹Ririkana atî matukûûne ja mûthia, gûkeethîra kûrî na îgiita rîa thîîna.

²Tontû antû bakaa aciendi na eendi mbeecha na aikumia na ngîti na arumani na antû batîkwathîkîra aciari baao na antû batî nchûne na antû batîkîraga Mûrungu.

³Ningî bakaa antû batî na kîaao na batî na wendo na aguutani na eendi kûrîa mono na babang'entu na bakeethîrwa barî antû batîendeete wega.

⁴Bakeethîrwa barî antû bagûkunyanîra bangî na batî kîthimi mantûûne na antû aikumia. Nabo bakeethîrwa bendeete kwigwîria nkûrûki ya kwenda Mûrungu.

⁵Bakeethîrwa bakari ta antû bagûkîra Mûrungu îndî baregeete inya îrîa yeejanagwa yumanîtie na ûntû bûu. Ciathûrane na antû ta bau.

⁶Tontû gatîgatîîne kaao kûrî na arûme barîa batonyaga nja ciaitha bakaîria aka barîa boothû. Aka bau nabo nî barîa bakaraga baremeeri nî mîrigo ya meeyia na bakîathagwa nî mairîrîîria ja mîthemba îmiingî.

⁷Nabo aka bau bakaraga bakîeendaga kûritanwa îndî nî baremi nî kûmenya ûûma.

⁸ Antû bau nabo bakaraga bakîreganaga na ûûma o ta ûrîa Janesi na Jambare bareganîre na nteto cia Musa, nou kinya antû bau bareganîte na ûûma. Mathûgaanio ja antû bau nî jamathûûku na wîtîkio bwaao nî bwa ûrongo.

⁹Îndî gûtîo bagakinya tontû antû bonthe bakoona waa bwaao o ta ûrîa Janesi na Jambare bakarîre.

¹⁰Rîu nandî gwe nî ûthirîtie kûmenya ûritani bwaakwa na wona mîîtîre yaakwa. Nî ûthirîtie kûmenya na kwona mworoto jwaakwa mûtûûrîreene jwaakwa na wîtîkio bwaakwa na kûmîîria gwaakwa na wendo na gûciûmia gwaakwa.

¹¹ Ningî nî wonete kûnyamaarua na kûthangîkua gwaakwa. Nî ûthirîtie kwona jarîa jakarîkîre kîrî ni ndî Antioki na Ikoniamu na Listra. Nî ndomîrîîrie kûthangîkua gûkwingî îndî Mwathani nî aambonokerie mantûûne jau jonthe.

¹²Gûtî nkaanja barîa bonthe bendaga gûtûûra mûtûûrîre jwa gûkîra Mûrungu ndeene ya Kristû Jesû bakathangîkua.

¹³Nabo antû barîa baaî na aîîrania bageeta na mbere kwaa babaaî nkûrûki, bakîaîîragia bangî na kinya bo bakîaîragua.

¹⁴Îndî gwe îtaga na mbere na mantû jarîa ûthirîtie kwiritana na wajetîkia buru. Thithagia ûu ûkîmenyaga nî kuuma kîrî ûû wairitanîre jo.

¹⁵Ningî ûririkane atî gwe kuuma waana bwaaku nî ûmenyete Maandîko jamatheru jarîa joombîte gûkûritana nîkenda wonoka tontû bwa gwîtîkia Kristû Jesû.

¹⁶Maandîko jamatheru jonthe jaumanîtie na Mûrungu najo jarî na ûteethio bwa kûritana ûûma na kûgondokera ûrîa waatîtie na kwonereria ûrîa ûthûûkîtie o na kûritana muntû gûtûûra ûtûûro bûbwagîru,

¹⁷nîkenda muntû wa Mûrungu eethîrwe arî ûmûûjûru buru na arî na jonthe jarîa jakwendekana nîkenda akaritaga ngûgî irîa njega cionthe.