Read KIMERU BIBLE PROTESTANT EDITION 2Tim 4 Bible Online

2Tim 4 - KIMERU BIBLE PROTESTANT EDITION bible

2Tim 4

¹Ndîkwîra ndî mbere ya Mûrungu na mbere ya Kristû Jesû ûrîa ûkagambithia antû barîa barî mwoyo na barîa bakuîte rîrîa akeeja kwaathana arî mûnene,

²ûtûmagîîrie rûteto rwa Mûrungu. Inyagîîria gûtûmîîria rîrîa îgiita rîagîrîte na rîrîa rîtîagîrîte. Igithagia antû mantû na ûbakanagie na ûboonagîîrie na ûbaritanage ûmîrîtie.

³Îgiita nî rîîjîte rîrîa antû batîtîkîîria ûritani bwa mma. Tontû bagaicwîra aritani barîa bakabaritanaga mantû jarîa bakwenda kwigua.

⁴Antû bau bakaregana na ûritani bwa mma na batue kûthikagîîra ngono cia ûrongo.

⁵Îndî gwe karaga wirikîrîtie mantûûne jonthe na ûmagîîrie mathîîna. Ningî ûritage ngûgî ya gûtûmîîria Nteto Injega na ûritage bwega ngûgî îrîa Mûrungu agwîtîrîte.

⁶Nîkwîthîrwa ûûni ndî akuî kûritwa ndî kîgongwana. Îgiita rîaakwa rîa gûkua nî rîkinyîte.

⁷Nî ndwîte bwega na nî nkinyîtie rwîro rwaakwa mûthia na ndî o wîtîkioone.

⁸Nandî ntigeerie kûewa kîewa kîa waagîru kîrîa Mwathani, ûrîa ûrî mûgambi ûmwagîru agaampa Ntukû iu yakinya. Atîmpa ninka akî, îndî akaa bonthe barîa bakaraga bamweteerete rîrîa agacoka.

⁹Geria wîjange na mpwîî.

¹⁰ Nîkwîthîrwa Demasi nî arambîrûkîîre eeta Thesalonike nîûntû bwa kwenda mantû ja nthîgûrû. Nawe Keresite nî areetîre Galatia, nawe Tito eeta Dalimatia.

¹¹ Ntigi na Luka akî. Cwaa Maariko bwîjanie nawe tontû eeja aganteethia mono.

¹² Nî ndîratûmîre Tukiko kûu Efeso.

¹³ Watua kwîja ûndeeteere kabuuti gaakwa karîa ndaatigîîre Karipo naarîa Troa. Ningî ûndetere mauku na mono mono jau jathithîtue na mûgûûta.

¹⁴ Mûturi ûrîa wîtagwa Alexanda nî anthithîîrie mantû jamathûûku mono. Mwathani nîwe ûkamûrîaa kûringana na mathithio jaawe.

¹⁵Imenyagîîre kîrî we tontû nî aareganîre na inya mono nteto irîa twatûmagîîria.

¹⁶Ntukû ya mbere îrîa ndaikîrue kotini, gûtî we weejîre kûmbigîka îgambeene, ka bonthe baambîrûkîîre. Nî nkûromba Mûrungu atîkabarîyie ûthûûku bûu!

¹⁷Îndî Mwathani nî aarî amwe naani na araampa inya ndîroomba gûtûmîîria Nteto Injega cionthe kîrî antû barîa batî Ayahudi nîkenda bonthe baciigua. Nî ndoonokerue kuuma ûgwatiine bwa kûgitîrwa kûragwa.

¹⁸Mwathani nîwe ûgantunyûkia kuuma kîrî moothûûku ja mîthemba yonthe na ambonokie nîkenda ngakûrûka Ûneneene bwaawe bwa Îgûrû. Nawe arokumagua kenya na kenya. Amen.

¹⁹ Keethia Prisila na Akuila, amwe na antû ba mûciî jwa Onesiforo.

²⁰ Erastasi nî aatigîrwe Korintho. Turofimo nawe ndamûtigîre Miletasi tontû nî aajîtue.

²¹Geria na wîru wîje mbere ya îgiita rîa mpio rîkinya. Ûgûkeethua nî Eubulusi barî na Pudensi na Lino na Klaudia amwe na ataana na aarî ba baaba bonthe.

²²Mwathani arokaraga naagwe. Ûtugi bwa Mûrungu bûrokaraga amwe naagwe.