Read KIMERU BIBLE PROTESTANT EDITION Tito 2 Bible Online

Tito 2 - KIMERU BIBLE PROTESTANT EDITION bible

Tito 2

¹Îndî gwe ûbuîrîte kûritana ûritani bwa mma.

²Ritana akûrû bakare na mantû ja kûng'anîîria mîtîreene yaao na batigane na rûûgo na beethîrwe barî na ûûme na bakare na wîtîkio bwa mma. Ningî boojûrwe nî wendo na kûmîîria.

³Ritana eekûrû babakûrû gûtûûra mûtûûrîre jwa gûkîra Mûrungu. Batî kûguutana kana baa nkombo cia ndibei. Babuîrîte kûritanaga mantû jarîa meega

⁴nîkenda boonagîîrie eekûrû babeethî ûrîa babuîrîte kwendaga akûrû baao na aana baao.

⁵Ningî baboonagîîrie ûrîa babuîri kwîng'anîîria mantû mîtûûrîreene yaao na bae babatheru nkoroone na bae amenyeeri ba mîciî yaao na baigagîîrue antû bangî kîaao na ainyiiya kîrî akûrû baao nîkenda ngûgî ya Mûrungu îtîkathûûmbue.

⁶O ûu nîu ûbuîrîte kûritana nthaka ûrîa babuîri kwathaga mîîrî yaao.

⁷Naagwe aa ngerekano înjega mîtîreene yaaku yonthe. Karaga na mma na wîthagîrwe ûrî na ûgima ûritanine bwaaku.

⁸Rwaria rwaaku nî rwîthîrwe rûrî tarîria ûrîa gûtî muntû ûûmba kûrûrita maatia nîkenda mûnthû ûrîa ûrûjaga naatuî agaacokerwa nî nthao aaga ûntû bûbûthûûku bwa kuuga bûtwegiî.

⁹Ritana nkombo kwinyiiagia kîrî athani baacio na bacwaage ûrîa bakabagwîria mantûûne jonthe. Batîbuîri kûbacoka

¹⁰kana baiya into biaao. Îndî nî bae eetîkua mathithioone jaao nîkenda ûritani bwa Mûrungu Mwonokia weetû bûkagîa îgweta.

¹¹Tontû Mûrungu nî aguûrîte ûtugi bwaawe bwa kwonokia kîrîndî kîonthe.

¹²Ûtugi bûu bûtûritanaga gûtigana na mîtûrîre îmîthûûku na mairîrîîria jamaaî ja nthîgûrû na gûtûûra ûtûûro bûbwega na bûbwagîîru na bwa gûkîra Mûrungu nthîgûrûûne îîjî,

¹³tweteerete Ntukû îu ntharime îrîa twîrîgagîîra, rîrîa ûkumio bwa Mûrungu weetû Ûmûnene tawe Mwonokia weetû Jesû Kristû îgakinya.

¹⁴ Nîwe wacieejanîre wengwa nîûntû bweetû nîkenda agatûkûra kuuma meeyiene jonthe na atweethie antû baawe babatheru barîa beendeete kûthithagia mawega.

¹⁵Ritanaga mantû jau ûrî na Waatho bunthe rîrîa ûkûmîîria kana ûgûkaania antû barîa bagûkûthikîîra. Ûkáreka muntû kinya ûrîkû eeja gûkûmena.