Read KIMERU BIBLE PROTESTANT EDITION Tito 3 Bible Online

Tito 3 - KIMERU BIBLE PROTESTANT EDITION bible

Tito 3

¹Ririkanagia antû bainyiiagie kîrî athani na atongeeria ba thirikarî. Nî babathîkagîre na beethagîrwe baithuranîrîte kûthithia mantû ûrîa kwagîrîte.

²Baririkanagie batîkaarie mantû jamathûûku jegiî muntû kinya ûrîkû na batigane na mateta na beethîrwe barî na ûkiri na batîîage antû bangî bonthe.

³Tontû kinya tuî kûrî îgiita twaarî biaa na ndemi na twaatîtie njîra na twaarî nkombo cia mairîrîîria na mîago ya mîthemba îmiingî. Îgiita rîu twaatûraga kûthithia ûûî na tûkiganagîrua rûriitho na antû nî baatûmenaga naatuî nî twaabamenaga.

⁴Îndî rîrîa Mûrungu Mwonokia weetû aatûguûrîîre wega na kîaao kîa wendo bwaawe

⁵nî aatwonokerie. Ataatwonokerie tontû bwa mathithio jameega jarîa twaathithîtie nîûntû bwa kwagîra gweetû îndî aathithîrie ûu nîûntû bwa kîaao kîaawe. Aatûthambîrie na araatûciara rîa jaîrî na araatûaa ûtûûro bûbwerû ndeene ya Roho Ûmûtheru.

⁶Mûrungu aatûtûmîîre Roho Ûmûtheru na njîra ya Jesû Kristû Mwonokia weetû.

⁷Aathithîrie ûu nîkenda tûkaagîrithua tontû bwa ûtugi bwaawe na twee arîokua ba ûtûûro bwa kenya na kenya bûrîa twîrîgîrîte.

⁸Mantû jau ndathiria kuuga nî ja mma. Ndîenda ûkinyîîrie mantû jaja nîkenda antû barîa beetîkîtie Mûrungu bagacieejanaga kûrita ngûgî injega. Mantû jau nî jameega mono mono na jarî na ûguni kîrî antû.

⁹Îndî gwe tiganaga na nkaanja cia waa na ndwaria ciegiî ûrîa ndûrîîjo ithingateene na kwathûkanaga, na mateta mantûûne ja Waatho. Mantû jau nî ja ûtheri na jatîgunaga.

¹⁰Muntû ûrîa ûretaga kwathûkana, mûkaanie rîmwe kana jaîrî na ûcoke ûtigane nawe buru.

¹¹Gwe nî ûkûmenya atî muntû wa mûthemba jûu nî athirîtie kûregana na nteto cia mma na meeyia jaawe nî jamwonagia atî nî aatîtie njîra.

¹²Rîrîa ngatûma Aritemasi kana Tukiko kîrî gwe, geria ûrîa ûûmba wîîje kîrî ni gûkû Nikopoli tontû nî ndîrabangîre gûkara ku îgiita rîa mpio.

¹³Geria ûrîa ûûmba ûtûme wakiiri Zena barî na Apolo baambîîrie rûgendo rwaao, na woone atî barî na bionthe birîa bakeenda rûgendoone rûu.

¹⁴Antû beetû nî baimenyerie kûritaga ngûgî injega nîkenda bagateethagia barîa barî na ûbatu mono ningî nîkenda batîgatûûre ûtûûro bûtî na umithio.

¹⁵Bonthe barîa tûrî nabo bakûbûkeethia. Keethia barîa barî acoore beetû ndeene ya wîtîkio. Ûtugi bwa Mûrungu bûrokaraga naabuî bwinthe.