Read KIMERU BIBLE PROTESTANT EDITION Fil 1 Bible Online

Fil 1 - KIMERU BIBLE PROTESTANT EDITION bible

Fil 1

¹Nî ni Paûlû ûrîa ûthaîki ncheera nîûntû bwa Kristû Jesû, tûrî na Timotheo mûtaana wa baaba, Tûgûkwandîkîra gwe Filemoni ûmweende, ûrîa ûritanagîria ngûgî amwe naatuî,

² bûrî amwe na kanisa îrîa îcemanagia nyomba yaaku, na mwarî wa baaba Afia, na Arikipo, ûrîa ûrî asikarî jaatuî.

³Bûrokara na ûtugi na thîîrî kuuma kîrî Mûrungu Baaba weetû na Mwathani Jesû Kristû.

⁴Nî ncokagîria Mûrungu nkaatho magiita jonthe nîûntû bwaaku gwe Filemoni rîrîa nkûromba.

⁵Gîtûmi nî atî nî mbigagua ûrîa wendeete na wetîkia Mwathani Jesû na atheru bonthe.

⁶Ndîromba atî ngwatanîro yeetû ya kwîthîrwa tûrî na wîtîkio bûmwe îtûme ûmenyo bwa wega bunthe bûrîa twonaga kuuma kîrî Kristû bwongeereka.

⁷Mûtaana wa baaba, wendo bwaaku nî bûtûmîte mbîthîrwa ndî na kûgwîrua gûkwingî na mbigua ndî na inya. Gwe nî ûtûmîte nkoro cia atheru babaingî ciigua îrî na kûgwîrua.

⁸Tontû bûû, kinya këethîra ndomîîria ndeene ya Kristû Jesû kûrita waatho atî ûthithie ûntû bûrîa bûbuîri kûthithua,

⁹îndî nîûntû nî nkwendeete, ndîenda gûkûûria na gîtîîo. Ûûni Paûlû ûrîa ûtûmi antû a Kristû, na nandî nthaîki ncheera nîûntû bwa Kristû Jesû,

¹⁰ ndîkwerenca nîûntû bwa Onesimo, mwana waakwa, ûrîa mpeete îthe ndî ncheera.

¹¹Mbere aarî muntû wa ûtheri kîrî gwe. Îndî nî mma nandî nî aeete wa gîtûmi kîrî gwe na kîrî ni.

¹²Ndîkûmûtûma acoke kîrî gwe; nî ta nkoro yaakwa yongwa ndagûtûmîra.

¹³Ndîngîgwîrua nî gûkara nawe nîkenda aganteethagia arî antû aku îgiiteene rîrî nthaîki nîûntû bwa Nteto Injega.

¹⁴Îndî ndîroonere bûrîa bwega nî kûrega kûthithia ûu gwe ûtîtîkîîrîtie. Kûthithia bwega gwaaku kwîthîrwe kûrî ûntû bwa gûciendera na tî ûntû bwa gûkinyîîrua.

¹⁵Mbuga kîu nîkîo kîratûmîte auma kîrî gwe kagiita gagakai nîkenda agacoka kîrî gwe ûtûûre nawe îgiita rîonthe.

¹⁶Nandî atîîthîrwa arî nkombo akî îndî akeethîrwa arî nkûrûki ya nkombo. Akeethîrwa arî mûtaana wa baaba ûmwende ndeene ya Kristû na mono kîrî ni, îndî nkûrûki kîrî gwe tontû atîîthîrwa arî nkombo akî; akeethîrwa arî mûtaana wa baaba ndeene ya Mwathani.

¹⁷Tontû bûû, këethîra nî ûgûntara ndî mûriti wa ngûgî ya Mwathani amwe naagwe, mûjûkie bûkare nawe o ta ûrîa ûrîngînjûkia.

¹⁸Akëeja kwîthîrwa akûthithîrîtie ûntû kinya bûrîkû bûbûthûûku kana akëethîrwa arî na îrandû rîaaku, ûndaandûre rîo.

¹⁹Nî ni Paûlû nkwaandîka ûû na njara yaakwa nkiugaga atîrî, “Ngakûrîaa.” Gûtî na bata ya gûkûririkania atî kinya gwe ûrî na îrandû rîaakwa, tarîo mwoyo jwaaku.

²⁰Tontû bûu mûtaana wa baaba, nthithîria ûntû bûu ndeene ya Mwathani nîkenda ûtûme nkoro yaakwa îcancamûka ndeene ya Kristû.

²¹Ndîkwaandîkîra barûga îîjî ndî na mma atî ûkathithia ûntû bûu ngûkûûria ûthithie. Ningî nî nkûmenya ûkathithia mantû jamaingî nkûrûki ya ûu nkûûrîtie ûthithie.

²²Amwe na ûu thuranîra nyomba îrîa ngakara tontû nî nkwîrîgîîra Mûrungu akaigua maromba jeenu ncoke kîrî buî kaîrî.

²³ Bûgûkeethua nî Epafarasi, ûrîa ûtheeki ncheera amwe naani nîûntû bwa Kristû Jesû.

²⁴ Bûgûkeethua kinya nî Maariko na Aristariko na Demasi na Luka barîa tûritanagîria ngûgî nabo.

²⁵Ûtugi bwa Mwathani Jesû Kristû bûrokara amwe naabuî.