Read KIMERU BIBLE PROTESTANT EDITION Ahi 1 Bible Online

Ahi 1 - KIMERU BIBLE PROTESTANT EDITION bible

Ahi 1

¹Karaaja Mûrungu nî aaragîria biûjûjû bieetû maita jamaingî na njîra inyingî agîtumagîra iroria.

²Îndî ntukûûne iji cia mûthia Mûrungu atwarîrîtie agîtumagîra Mûtaana waawe ûrîa aethetie mwene rûgai rwa into bionthe na oombîre nthîgûrû yonthe na birîa birî ku gûkûrûkîîra kîrî we.

³Kristû nîwe wonanagia ûrîa ûkumio bwa Mûrungu bûkari na nîwe kîonanîîria kîa ûrîa Mûrungu akari. Nîwe ûgwatîrîte into bionthe agîtumagîra rûteto rwaawe rûrîa rûrî inya. Akûthiria kûrita kîgongwana gîa kûrekera meeyia, nî aakarîre nthî rûteere rwa ûrîo rwa Mûrungu Mweneinya.

⁴Krîstû nî aaetherue ûmûnene nkûrûki ya araîka o ta ûrîa riîtwa rîrîa Mûrungu aamweere rîrî rîrînene nkûrûki ya mariîtwa jaao jonthe.

⁵ Nîkwîthîrwa gûtî mûraîka kinya ûmwe Mûrungu eera, “Gwe nîgwe Mûtaana waakwa, naarua nkwaa Abaagu.” Ningî gûtî mûraîka Mûrungu eera, “Ûûni nkaa Abaagu, naagwe ûkaa Mûtaana waakwa.”

⁶ Ningî rîrîa aarî akuî kûreta Mûtaana waawe wa kîranga nthîgûrû nî augîre, “Araîka ba Mûrungu bonthe nî bamûthaathayie.”

⁷ Mantûûne jegiî araîka augaga, “Nî aeethagia araîka baawe ruuo, na akaeethia nthûûmba ciaawe ndûmûrî cia mwanki.”

⁸ Îndî mantûûne jegiî Mûtaana ariuga, “Rûriga rwaaku rwa Ûnene Îgwe Mûrungu, nî rwa gûtûûra o kenya na kenya. Rûturo rwa waagîru nîru rûkaa rûturo rwa waathani bwaaku.

⁹Gwe nî wendeete waagîru na ûkathûûra ûthûûku; tontû bûu Mûrungu, Mûrungu waaku, nî akûthuurîte na akwaa gîtîîo nkûrûki ya bangî bonthe agwîtûûrîria maguta ja kûgwîrua.”

¹⁰ Kaîrî ariuga, “Gwe, Mwathani, nîgwe wombîre nthîgûrû o kîambîrîria, na îgûrû nî ngûgî ya njara ciaaku,

¹¹biu bionthe bikarima, îndî gwe ûtigwe, bionthe bigakûra o ta nguû.

¹²O ta ûrîa mûgeka jûkûnjagwa nou ûkabikûnja, na bionthe bikagarûka. Îndî gwe ûgatûûra ûkari o ûu ûkari nandî, na mîaka yaaku îtîkarokinya mûthia.”

¹³ Îndî rî, gûtî mûraîka kinya ûmwe Mûrungu eera, “Kara nthî rûteere rwa njara yaakwa ya ûrîo, mwanka rîrîa nkaethia anthû baaku gîkinyithio kîa magûrû.”

¹⁴Araîka bonthe tî roho irîa itûmagwa nî Mûrungu gûteethia antû barîa babuîri kwonoka?