Read KIMERU BIBLE PROTESTANT EDITION Ahi 10 Bible Online

Ahi 10 - KIMERU BIBLE PROTESTANT EDITION bible

Ahi 10

¹Waatho bwa Musa tî ngerekano ya mma ya mantû jameega jarîa jakeeja. Nî kîonanîîria akî kîa mantû jongwa jarîa jakeeja. Waathoone bûu, nî igongwana bia mûthemba o jûmwe biritagwa o mwaka o mwaka nîkenda bitheria barîa beetaga kûthaathayia Mûrungu.

²Këethîra nî biatheragia antû buru, batîngîthîrwa bakîbirîtaga mwanka nandî. Këethîra antû barîa baathaathayia Mûrungu nî baatheragua buru, batîngîthîrwa bagîîtaga na mbere kwîyia.

³Îndî nîka igongwana bibi biarikanagia antû meeyia jaao o mwaka o mwaka.

⁴Nîkwîthîrwa gûtîûmbîka buru tharike ya ndeegwa na ya mbûri îthiria meeyia.

⁵ Tontû bûû, rîrîa Kristû eejîre nthîgûrû nî augîre ûjû: “Gwe gûtî rîo weethîrwa ûrî na bata na igongwana na biewa, îndî gwe nî wampeere mwîrî.

⁶Gwe gûtî rîo waagwîrîrua igongwana bia gwakîîria, kana igongwana birîa biritagwa nîûntû bwa meeyia.

⁷Rîu naani ndîrauga, ‘Ûûni mbîjîte kûthithia ûrîa ûkwenda, Îgwe Mûrungu,’ o ta ûrîa mantû jambegiî jaandîki yukuune rîa Waatho.”

⁸Mbere aambîre kuuga, “Gwe gûtî rîo wendaga igongwana kana ûgwîrîrua biewa kana wîthîrwa ûrî na bata na igongwana bia gwakîîria kana birîa biriti nîûntû bwa kûthiria meeyia.” Igongwana biu bionthe nî biaritagwa kûringana na Waatho.

⁹Rîu aroongeera ûjû, “Tî ni ûûjû, mbîjîte kûthithia wendi bwaaku.” Aathirîrie igongwana birîa ikûrû bia mîthemba yonthe na arareeta Kristû arî kîgongwana antû a bio.

¹⁰Jesû Kristû akûûjûria mantû jarîa Mûrungu eendaga nî aaritîre mwîrî jwaawe jûrî kîgongwana rîmwe rîonka na rîa mûthia. Tontû bûû, nî tûtheretue meeyia nî kîgongwana kîu Jesû aaritîre.

¹¹ O mûthînjîri-Mûrungu wonthe nî eetaga kûrita igongwana bia kûthiria meeyia bia mûthemba o jûmwe o ntukû o ntukû îndî igongwana biu bitîûmba kûthiria meeyia.

¹² Îndî rîrîa Kristû aaritîre kîgongwana kîmwe akî nîûntû bwa meeyia jeetû, nî aakarîre nthî rûteere rwa njara ya ûrîo ya Mûrungu.

¹³Au nîo etagîîra arî, mwanka rîrîa Mûrungu akaethia anthû baawe gîkinyithio kîa magûrû jaawe.

¹⁴Nîkwîthîrwa rîrîa aaritîre kîgongwana kîmwe akî, nî aathererie buru barîa arekagîra meeyia.

¹⁵Nawe Roho Ûmûtheru nî agûkûûjîîra kîrî tuî akauga,

¹⁶ “Gîkî nîkîo kîrîkanîro kîrîa ngekanîra nabo matukûûne jarîa jakeeja, nîu Mwathani akuuga: Ngekîra Waatho bwaakwa nkoroone ciaao, na mpaandîke Waatho bwaakwa mathûgaanioone jaao.”

¹⁷ Ningî aroongeera atîrî, “Ntîcoka kûririkana meeyia jaao na moothûûku jaao kaîrî.”

¹⁸Tontû bûû, rîrîa meeyia jathirîtie kûrekerwa, gûtî kîgongwana gîkororitwa nîûntû bwa meeyia.

¹⁹Tontû bûû, ataana na aarî ba baaba, tûrî na ûchamba bwa gûkûrûka îgûrû, antû arîa atheru buru nîûntû bwa tharike ya Jesû.

²⁰Îîjî nîyo njîra injerû na îrî na mwoyo, îrîa Jesû Kristû aarugûrîre rîrîa gîtambaa kîrîa kîagaanagia kîûrû gîatambûkîre agûkua nîûntû bweetû.

²¹Ningî tûrî na mûthînjîri-Mûrungu ûmûnene ûrîa ûrûngamagîîra nyomba ya Mûrungu.

²² Tûkuîrîrieni Mûrungu tûrî na nkoro irî na ûûma na wîtîkio bûûriku. Nîkwîthîrwa mathûgaanio jeetû nî jatheretue nî tharike ya Kristû na mîîrî yeetû yathambua na rûûjî rûûtheru.

²³Tûciaandeni bwega kîrî wîrîgîîro bûrîa tuumbûraga tûtîkûebaeba nîûntû Mûrungu ûrîa weekîre wîrane nî mwîtîkua.

²⁴Ningî tûcwageni ûrîa tûûmba gwîkanagîra wîru bwa kwendana twingwa tûkîritaga ngûgî irîa njega.

²⁵Tûgatigeeni kûûthûranaga amwe, ta ûrîa bamwe bamenyeretie, îndî twîkanagîreni inya o muntû na ûngî, mono mono nîûntû rîu nî bûkwona atî Ntukû ya gûcoka gwa Kristû îrî akuî gûkinya.

²⁶Nîkwîthîrwa tûkëeja kwîyia ntabarako tûkwamba kûmenya ûûma, tûtîkoroona kîgongwana kîngî gîa kûrekera meeyia,

²⁷ Îndî kîrîa gîkeethîrwa gîtigeere nî gûtuîrwa îgamba na mwanki jûmûnene jûrîa jûkaîîthia anthû baawe.

²⁸ Muntû ûrîa waunaga Waatho bwa Musa nî ooragagwa antû batîkûmwigîîrua kîaao kwëethîrwa kûrî na akûûjî baîrî kana bathatû.

²⁹ Îkanûkia rîa muntû ûrîa ûmeneragia Mûtaana wa Mûrungu kana akoona tharîke ya kîrîkanîro, îrîa yaamûthererie kuuma meeyiene teeka îrî ya ûtheri kana akaruma na akûthûûria Roho Ûmûtheru ûrîa ûreetagîra antû ûtugi rîkeethîrwa rîrî rîrîî nkûrûki.

³⁰ Tuî nî tûkûmenya ûrîa waugîre atî, “Nî ni nkabûrîagîîria,” na kaîrî arauga, “Mwathani nîwe ûkagambithia antû baawe.”

³¹Nî ûntû bwa kûmakania muntû kûringwa nî njara ya Mûrungu ûrîa ûrî mwoyo!

³²Ririkaneeni ûrîa gwakari rîrîa bwamenyere ûûma; buî nî bwomîîrîrie mono mathîîna jarîa bwonere.

³³Kûrî îgiita bwarumagwa na bûkathangîkua mbere ya antû bonthe, na rîngî bûkeethîrwa bwîtîkîîrîtie kûthangîkua na barîa baathangîkagua.

³⁴Buî nî bwaigagîîrua barîa baarî ncheera kîaao na bûgeetîkîîria na bûgwîrîtue kwona into bieenu bikîjûkua, nîûntû nî bwamenyaga atî buî bûrî na ûtonga bûbwega nkûrûki bûrîa bûgatûûra kenya na kenya.

³⁵Tontû bûû, bûkáreka ûchamba bweenu bûûra, nîûntû bûgatûma bwona kîewa gîkînene.

³⁶Nîkwîthîrwa no mwanka bûkare bûûmîîrîtie nîkenda bûkoomba kûthithia wendi kwa Mûrungu na bwoona kîrîa eeranîîre.

³⁷ Maandîko jariuga, “Tontû gûtigeere kagiita kaniini, nawe ûrîa wîjîte akeeja na atîkarakara;

³⁸îndî muntû waakwa ûrîa mwagîru agatûûra nîûntû bwa wîtîkio, îndî akëeja gûtigana na wîtîkio, nkoro yaakwa îtîgwîrua nîwe kaîrî.”

³⁹Îndî tuî tûtî bamwe ba barîa bacokaga nyuma na bakathirua. Tuî tûrî ba antû barîa beetîkagia mwanka bakoonokua.