Read KIMERU BIBLE PROTESTANT EDITION Ahi 11 Bible Online

Ahi 11 - KIMERU BIBLE PROTESTANT EDITION bible

Ahi 11

¹Wîtîkio nî gûkara na mma mantûûne jarîa twîrîgagîîra, na kûmenya tûtî na nkaanja atî mantû jau jatîonekaga jarî o.

²Nî wîtîkio bwatûmîre antû barîa baatûûraga o tene beetîkîrîka nî Mûrungu.

³ Nî wîtîkio bwatûmîre tûciûra atî nthîgûrû yoombîrwe nî rûteto rwa Mûrungu, nîkenda tûmenya atî mantû jarîa jakwoneka, joombîrwe nî mantû jarîa jatîûmba kwoneka.

⁴ Nî wîtîkio bwatûmîre Abeli aritîra Mûrungu kîgongwana gîgwîtîkîrîka nkûrûki ya gîa Kaini, na kîratûma eetîkîrîka nî Mûrungu arî ûmwagîru. Mûrungu wengwa nî oonanîrie atî ûu nîu kûbuîri gûkara rîrîa eetîkîrîrie biewa birîa aaritîre. Kinya këethîra Abeli nî aakuîre, nîûntû bwa wîtîkio bwaawe, kinya naarua tûrî no aragia.

⁵ Nî wîtîkio bwatûmîre Enoki ajûkua nî Mûrungu nîkenda atîgaakue, na gûtî muntû waamwona nîûntû Mûrungu nî aamûjûkîrie. Mbere ya aitithua îgûrû nî aarî akûgerua oonekana atî nî muntû waagwîrîtie Mûrungu.

⁶Muntû kinya ûrîkû akëethîrwa atî na wîtîkio atîûmba kûgwîria Mûrungu. Nîkwîthîrwa muntû wonthe ûrîa weendaga gwîta akuî na Mûrungu no mwanka eetîkie atî Mûrungu arî o, na atî nî aejaga barîa bamûcwaga îtuui.

⁷ Nî wîtîkio bwatûmîre Noa eetîkia mantû jarîa Mûrungu aamwîrîre jagakarîka kinya këethîra ataarî akûjoona. Nî aathîkîîre Mûrungu na arathithia Sabina îrîa yoonokerie nja yaawe. Tontû bûû, nthîgûrû nî yaathirîrue îndî Noa araaewa waagîru bûrîa bwonoraga nîûntû bwa gwîtîkia.

⁸ Nî wîtîkio bwatûmîre Abrahamu aathîka rîrîa eerîrwe nî Mûrungu aume nthîgûrû yaao na eete nthîgûrû îrîa Mûrungu aamwîrîrîte. Kinya këethîra ataijî kûrîa eetîte, nî aumîre kwaao na areeta.

⁹ Nî wîtîkio bwatûmîre Abrahamu atûûra nthîgûrû ya wîrane akari ta mûgeni agîtûûraga maemeene. Kinya Isaaka na Jakubu nî baatûûraga maemeene ta Abrahamu, nîûntû Mûrungu nî aabaeere wîrane o bûu.

¹⁰Nîkwîthîrwa Abrahamu aatûûraga eteerete ntûûra îrîa îrî mûsingi jwa kenya na kenya, îrîa yaathithîrue na îraakwa nî Mûrungu.

¹¹ Nî wîtîkio bwatûmîre Sara aewa inya na kûgîa îu, kinya këethîra nî aakûrûkîthîtie mîaka ya kûgîa mwana. Nî eetîkîrie atî Mûrungu nî mwîtîkua na nî eekaga wîrane bwaawe.

¹² Tontû bûû, kuumania na muntû ûmwe ûmûkûrû mono, nchiarwa inyingî ta njota cia îgûrû kana mûthanga jûrîa jûrî rûteere rwa îria nî ciaumanîrie na muntû ûu, tawe Abrahamu.

¹³ Antû bau bonthe baakuîre barî na wîtîkio. Baakuîre mbere ya Mûrungu oojûria jarîa aabeerîîrîte. Îndî nî baarî bakûjona na barajetîkîîria jarî kûraaja, na bareetîkîîria atî bo nî ageni na nîka baakûrûûkîrîte aja nthîgûrûûne.

¹⁴Nîkwîthîrwa antû barîa baragia nteto ta iu nîka boonanagia bwega atî ka baacwaga nthîgûrû îrîa boomba kuuga nîku kwaao.

¹⁵Këethîra nî baathûgaanagîria nthîgûrû îrîa baarî bakuuma barîngîîthîrwa barî na kaanya gakeega ga gûcoka.

¹⁶Îndî ûrîa gwakari nî atî bo nîka beendaga nthîgûrû înjega nkûrûki, tayo îrîa îrî kûu îgûrû. Tontû bûû, Mûrungu atigagua nthao bakîmwîta Mûrungu waao, nîkwîthîrwa we nî athûranîrîte ntûûra nîûntû bwaao.

¹⁷ Nî wîtîkio bwatûmîre Abrahamu arita mûtaana waawe Isaaka arî kîgongwana rîrîa Mûrungu aamûgeragia. Abrahamu ûu nîwe Mûrungu aeete wîrane, îndî amwe na bûu nî aaithûranîrîte kûrita mûtaana waawe wa mûûmwe arî kîgongwana.

¹⁸ Mûrungu nî aarî akûmwîra ûjû, “Nchiarwa ciaaku irîa ndaakwîrîre ikaumania na Isaaka.”

¹⁹Abrahamu nî eetîkîrie atî Mûrungu oomba kûriûkia Isaaka kuuma gîkuûne, na nkiuga na njuno, Abrahamu nî aacokeerue Isaaka kuuma gîkuûne.

²⁰ Nî wîtîkio bwatûmîre Isaaka auga îtharimo birîa Jakubu na Esaû bakoona.

²¹ Nî wîtîkio bwatûmîre Jakubu agîkua atharima ataana ba Josefu na akîthaathayia Mûrungu areenamîîria aramamîra rûturo rwaawe.

²² Nî wîtîkio bwatûmîre Josefu arî akuî gûkua auga Aisraeli bakathaama kuuma Misri na abeera mantû jegiî kûrîa akathikwa.

²³ Nî wîtîkio bwatûmîre aciari ba Musa bamwitha mîeri îthatû agûciarwa nîûntû nî boonere karî kaana gakathongi mono. Bo bataakîrîre waatho bûrîa mûnene aaritîte.

²⁴ Nî wîtîkio bwatûmîre Musa rîrîa aaere muntû mûgima, arega gwîtwa mûtaana wa mwarî wa mûnene.

²⁵Nî aathuurîre kûthangîkanîrua na antû ba Mûrungu antû a kûgwîrîrua meeyia kagiita gagakai.

²⁶Nî oonere kûthangîkua nîûntû bwa Kristû kûrî na ûguni bûbûnene nkûrûki ya kûgwîrîrua ûtonga bwa Misri, nîûntû bwa îtuui rîrîa eerîgîîrîte kûewa nyumeene.

²⁷ Nî wîtîkio bwatûmîre Musa auma Misri atîgûkîra mûnene athûûra nîwe, nîûntû nî oomîrîrie ta muntû woonaga ûrîa ûtîonagwa.

²⁸ Nî wîtîkio bwatûmîre Musa athithia kîatho kîa Pasaka na aminya tharike mîariine nîkenda Mûraîka wa kûthirania atîkoorage aana ba kîranga ba Aisraeli.

²⁹ Nî wîtîkio bwatûmîre Aisraeli bauna Îria Îtuune ta antû betîrîte nthî înjûmo. Îndî rîrîa Amisri baagererie kuunîra antû o au baraûrîra îrieene.

³⁰ Nî wîtîkio bwatûmîre nthingo cia Jeriko imomoka rîrîa Aisraeli baathirîrie kwithiûrûka mainda mûgwanja.

³¹ Nî wîtîkio bwatûmîre mûmaraya ûrîa weetagwa Rahabu atîkooragwe amwe na antû bangî barîa baaremete Mûrungu, nîûntû nî aagwatîre ûgeni antû ba Israeli barîa beetîte gûcûnkûûna.

³² Mpongeere bûngî bûrîkû? Ntî na îgiita rîa kuuga mantû jegiî Gideoni, na Baraki, na Samusoni, na Jefitha, na Daudi, na Samueli na iroria.

³³ Antû bau bonthe nîûntû bwa wîtîkio nî baarwîre na moonene ja nthî na barajacinda na baratûma mantû ja îota jathithua kaîrî, na Mûrungu aroojûria jarîa aabeerîîrîte. Nî baakunîkîre tûnyua twa ngatûnyi,

³⁴ na barooria mîanki îmînene, na barateetha kûûragîrwa ndweene. Nî baagîîre inya kinya këethîra bataarî na inya, na baraa nchamba cia ndwaa na bareenga njûûrî cia anthû.

³⁵ Wîtîkio bwa aka bamwe barîa baakuîri nî bwatûmîre antû baao bariûkua. Bangî barîa beetîkîtie Mûrungu nî bathangîkîrue na baratua nî kaaba booragwe nîkenda bariûka boona ûtûûro bûbwega nkûrûki.

³⁶ Bangî baracikûûrwa na baraûûrwa ibooko, na kinya baratheekwa na nyororo na baraikua ncheera.

³⁷ Bamwe nî booragîrwe na maiga na bangî baragiitwa na mûchumeno bakaa inuku biîrî bing'anene, na bangî barooragwa na nchiû. Bamwe nî beetîre gûntû na gûntû beekîrîte mîgûûta ya mbûri na ya ng'ondu, barî nkîa mono, na barî antû bathangîkîte mono, na bakîthithagîrua mantû jamaaî.

³⁸Bo baatûûraga ta antû bataagîri kwîthîrwa barî nthîgûrû îîjî. Baatarataraga ndwanda, na irîmeene, na ikurunguune na marinyeene.

³⁹Bau bonthe kinya këethîra nî boombanîre nîûntû bwa wîtîkio bwaao, batoonere kîrîa Mûrungu eekîte wîrane nabo,

⁴⁰nîûntû nî aarî na mûbango jûmwega nkûrûki nîûntû bweetû. Aabangîte atî atîbaethia babaagîru buru tûtî amwe nabo.