Read KIMERU BIBLE PROTESTANT EDITION Ahi 12 Bible Online

Ahi 12 - KIMERU BIBLE PROTESTANT EDITION bible

Ahi 12

¹Tontû baatuî nî tûthiûrûki nî ntundu ya akûûjî babaingî mono, tûteni ûntû bunthe bûrîa bûtûritûagîra, na mono mono meeyia jonthe jarîa jatûgwatangaga na mpwîî. Tûûgîeni rûîro rûrîa rûrî mbere yeetû tûûmîrîtie,

²na tûraithîrîtie Jesû, ûrîa waambîrîrie wîtîkio bweetû na no we ûkabûkinyithia mûthia. Nîkwîthîrwa nîûntû bwa kûgwîrua kûrîa kwaarî mbere yaawe nî oomîrîrie nthao cia kwambwa mûtharabeene îndî nandî nî akari nthî rûteere rwa njara ya ûrîo ya rûriga rwa Mûrungu.

³Thûgaanieni mantû jarîa oomîrîrie ja kûthûûrwa nî eeyia, nîkenda bûtîgaakue nkoro kana bûtigana na wîtîkio.

⁴Buî bûtîrarwaa na meeyia mwanka bûkinyia a kûûragwa.

⁵ Ka bworîîrue nî ûritani bûrîa bûritanaga atî baabuî bûrî aana baawe? “Mwana waakwa, ûkameneria îkanûkia rîa Mwathani, kana ûkua nkoro rîrîa akûaa nthînje.

⁶Nîkwîthîrwa Mwathani akanûkagia mwana ûrîa eendeete, na aûûraga mwana wonthe ûrîa eetîkîîrîte arî mwana waawe.”

⁷Ûmîîrieni îkanûkia rîaawe nîûntû Mûrungu arîbûkanûkia nîûntû bûrî aana baawe. Ka kûrî mwana ûtîkanûkagua nî îthe?

⁸Mûrungu akëeja kûrega kûbûkanûkia, ta ûrîa akanûkagia aana baawe bonthe, bûkara ta bûtî aana baawe ba mma.

⁹Aciari beetû aja nthîgûrû nî batûkanûkagia na tûkabaa gîtîîo. Tuî nî tûbuîrîte kwinyiia nkûrûki rîrîa tûgûkanûkua nî Baaba weetû wa îgûrû nîkenda tûtûûra mwoyo?

¹⁰Tontû aciari beetû batûkanûkagia kagiita gagakai na rîrîa bakwenda, îndî Mûrungu atûkanûkagia nîkenda tûteetheka na twaa antû babatheru ta ûrîa arî ûmûtheru.

¹¹Rîrîa tûgûkanûkua nî twigagua ûrûrû na tûtîgwîragua, îndî nyumeene tuî barîa tûkanûkagua nî twîthagîrwa tûrî na thîîrî na mîîtîre îmîagîru.

¹² Tontû bûû, njara cieenu îrîa igoogoi nî igîe inya na maru jeenu jarîa jagûtetema nî jarûngame ceeni.

¹³ Thingatageni njîra irîa ciagîrîte nîkenda barîa barî wonje kinya bûrîkû batîkaremwe gwîta mwanka boorue.

¹⁴Ciûmagieni bûkarage na thîîrî na antû bonthe na bûkarage bûrî babatheru nîûntû gûtî muntû ûtî ûmûtheru ûkoona Mwathani.

¹⁵ Imenyagîîreni bûtîkeeje kwebaeba buuma ûtugiine bwa Mûrungu. O ûmwe weenu nî aimenyagîîre nîkenda atîkeeje kwîthîrwa arî na marûrû ndeene yaawe eeja gûtûma bangî bathangîka na beeyia.

¹⁶ Bûkáreka kinya ûmwe weenu eeja kwaa mûmaramari na muntû ûtîkîraga Mûrungu ta Esaû, ûrîa weenderie rûgai rwaawe rwa ûrikithathi nîkenda arûmua thaani îmwe ya biakûrîa.

¹⁷ Tontû buî nî bûkûmenya atî nyumeene agûcoka gwîtia kîtharimo kîaawe kuuma kîrî îthe, nî aatîrwe. Ataarî na kaanya ga kûromba ûrekeri kinya këethîra nî aageragia kûromba kîtharimo akîrîraga.

¹⁸ Buî bûtîîti bwîta antû bûûmba kûringithia na njara, ta ûrîa antû ba Israeli beetîrwe bareeta kîrîmeene gîa Sinai kîrîa barîngîringithia na njara, kana antû arî na mwanki kana antû arî na muundu kana antû arî na kwithikîîra gûkûnene kana antû arî na kîbubani,

¹⁹kana arîa tarûmbeta gakaringwa kana arîa bûkaigua kajû ga kûmakia antû bonthe ûntû batîenda gûcoka kwigua kajû kau kaîrî.

²⁰ Nîkwîthîrwa rîrîa Mûrungu aarîrie nî baaremerwe kûûmîîria kajû kaawe akuuga, “Ûrîa ûkaringithia kîrîma gîkî, kinya yëethîrwa nî nyomoo îgakîringithia no mwanka îûûrwe na maiga mwanka îkue.”

²¹ Nî boonere ûntû bûu bûrî bwa kûmakania mwanka kinya Musa wengwa arauga, “Nî nkwinaina nî ûguaa.”

²²Îndî buî bwîti bwita kîrîmeene kîa Zaiûni na ntûûreene ya Mûrungu ûrîa ûtûûraga mwoyo, tayo Jerusalemu îrîa îrî îgûrû, na kîrî araîka batîtarîka barîa boothûranîte amwe.

²³Ningî bwîti bwîta kîrî kîûthûrano kîa aana ba kîranga barîa mariîtwa jaao jaandîki îgûrû na kîrî Mûrungu ûrîa ûkagambithia bonthe na kîrî roho cia antû barîa baagîru na rîu baagîrithîtue buru.

²⁴ Ningî bwîti bwîta kîrî Jesû, ûrîa ûcokagia ngwatanîro ya Mûrungu na antû kîrîkanîroone gîkîerû, na kîrî tharike îrîa yeetûûrîrwe na îrekagîra meeyia antû a kwenda kwirîîria ta ûrîa tharike ya Abeli yeendaga.

²⁵ Menyeereeni bûtîkeeje kûrega kwathîkîra Mûrungu, ûrîa ûkûbwarîria. Tontû këethîra barîa baaregere kûmwathîkîra rîrîa aabakaanîrie arî aja nthî bataatethere, kinya tuî twarega kûmwathîkîra rîrîa agûtûkaania kuuma îgûrû tûkaathirua nkûrûki ya bo.

²⁶ Kajû kaawe kagiiteene kau nî gaatûmîre nthîgûrû inaina, îndî nandî nî eekîre wîrane atî, “Rîu rîngî ntinainia nthîgûrû akî îndî nkainainia kinya îgûrû.”

²⁷Nteto iu “Rîu rîngî” irîtwonia atî into bionthe birîa biûmbi bikainainua na biritwe o, nîkenda kîrîa gîtîûmba kwinainîka gîtigara.

²⁸Tontû bûû, tûcokerieni Mûrungu nkaatho nîûntû bwa gûtûaa Ûnene bûrîa bûtîûmba kwinainua. Tûmûthathayieni ûrîa kwagîrîte tûkîmûkîraga na kwinyiia mbere yaawe.

²⁹ Nîkwîthîrwa Mûrungu weetû nî mwanki jûîîthagia jûkathiria buru.