Read KIMERU BIBLE PROTESTANT EDITION Ahi 13 Bible Online

Ahi 13 - KIMERU BIBLE PROTESTANT EDITION bible

Ahi 13

¹Îtageni na mbere kwendanaga buru o muntû na ûngî ta akristû.

² Gwatageeni antû bûtîkûmenya ûgeni nja cieenu nîûntû kûrî bo baagwatîre araîka ûgeni batîkûmenya.

³Ririkanageeni barîa barî ncheera ta bûrî ncheera amwe nabo. Ririkanageeni barîa bakweewa thîîna ta bûkûrîa thîîna kinya buî.

⁴Arûme na aka barîa bagûreene nî babuîri kûeejagwa gîtîîo. Mûkûrû nî abuîri kwîthîrwa arî mwîtîkua kîrî mwekûrû waawe na mwekûrû nî abuîri kwîthîrwa arî mwîtîkua kîrî mûkûrû waawe. Nîkwîthîrwa Mûrungu akagambithia amaramari na athûngîîri.

⁵ Bûkejeeni kwaa eendi mbeecha mono bwaa nkombo ciaacio; ng'anagîrweni nî kîrîa bûrî nakîo. Tontû Mûrungu nî augîîte ûjû, “Ntîkorogûtîîjîra kana ngûtiganîria kinya rî.”

⁶ Nîkîo tûbuîri kuuga tûrî na ûchamba atîrî, “Mwathani nîwe ûnteethagia, ntîkorokîra kinya rî. Nîatîa muntû oomba kûnthithia?”

⁷Ririkanageeni atongeeria beenu, nabo nî antû barîa baabûritanîre rûteto rwa Mûrungu. Raithîrieni jarîa bathithîtie nthîgûrûûne îîjî na bwîtîkie Mûrungu ta ûrîa beetîkîtie.

⁸Jesû Kristû akari o ûrîa arakari îgoro, na noou akari naarua na noou agatûûra akari kenya na kenya.

⁹Imenyereeni bûtîgaatithue njîra nî mooritani mageni mwanya mwanya. Nî bûbwega kwona inya yaaku kuumania na ûtugi bwa Mûrungu, antû a kuumania na mawaatho jegiî biakûrîa nîûntû barîa bathingataga mawaatho jau batîgunagwa nîjo.

¹⁰Athînjîri-Mûrungu barîa baritaga igongwana kîûrûûne kîrîa Ayahudi bathaathagia Mûrungu, batîbuîri kûrîa kîgongwana kiumîte kîritîroone gîeetû kîa igongwana.

¹¹ Nîkwîthîrwa mûthînjîri-Mûrungu ûrîa mûnene akamataga tharike ya nyomoo akî agatonya nayo kîûrûûne na akamîrita îrî kîgongwana gîa kûthîria meeyia îndî nyama cia nyomoo iu îkaîthîîrua oome ya kambî.

¹²Tontû bûû, kinya Jesû ooragîîrwe oome ya ntûûra, nîkenda atheria antû meeyia jaao na tharike yaawe wengwa.

¹³Tontû bûû, twîteeni oome ya kambî kûu arî nîkenda tûûmîîria nthao o ta ûrîa we oomîîrîrie nthao.

¹⁴Nîkwîthîrwa aja nthîgûrû tûtî na ntûûra ya gûtûûra kenya na kenya, îndî ka tûgûcwaa ntûûra îngî îrîa îkeeja.

¹⁵Rîu tûrîtagîreni Mûrungu kîgongwana kîa kûmûkumia ndeene ya Kristû, nakîo nî kuumbûra na tûnyua tweetû riîtwa rîaawe.

¹⁶Bûgátiga kûthithagia mantû jameega na kûgaana birîa bûrî nabio nîûntû biu nîbio igongwana birîa bigwîragia Mûrungu.

¹⁷Athîkagîreeni atongeeria beenu na bûthithagie ûrîa bakûbwîra. Ngûgî yaao nî kûmenyeera nkoro cieenu, na nî bakûmenya no mwanka beere Mûrungu ûrîa baaritîre ngûgî yaao. Bwabaathîkîra, bakarita ngûgî yaao bagwîrîtue îndî bwarega kûbaathîkîra bakarita ngûgî îîu batîgwîrîtue, na batîbûteethia ûrîa kwagîrîte.

¹⁸Tûrombagîreeni. Tûrî na mma tûtîkwigambithia nkoroone cieetû nîûntû nî twendaga mono kûthithia ûrîa kwagîrîte magiita jonthe.

¹⁹Ni ndîbwerenca bûrombe mono nîkenda mpûûmba gûcoka kîrî buî na mpwîî.

²⁰Nandî rî, reeka Mûrungu wa thîîrî ûrîa waariûkîrie Mwathani weetû Jesû kuuma kîrî akuû, tawe mûrîîthi ûrîa mûnene wa ng'ondu, nîûntû bwa tharike ya kîrîkanîro gîa kenya na kenya,

²¹abûûjûrie mantû jonthe jameega nîkenda bûthithia wendi bwaawe. Ningî nî atûme ngûgî irîa igwîragia Jesû Kristû ikûre ndeene yeenu na Kristû aaewe ûkumio kenya na kenya. Amen.

²²Ataana na aarî ba baaba ndîbûromba bûthûgaanîrie nteto iji ndabwandîkîra bwega nîûntû barûga ijî ndabwandîkîra tî îndaaja mono.

²³Ndîenda bûmenya atî mûtaana wa baaba Timotheo nî ararekereerue kuuma ncheera. Akëeja gûkinya kûrî o, nkeejania nawe kûbwona.

²⁴Keethieni atongeeria beenu bonthe na akristû bonthe. Ataana na aarî ba baaba barîa barî Italia bakûbûkeethia mono.

²⁵Ûtugi bwa Mûrungu bûrokaraga amwe naabuî bwinthe.