Read KIMERU BIBLE PROTESTANT EDITION Ahi 2 Bible Online

Ahi 2 - KIMERU BIBLE PROTESTANT EDITION bible

Ahi 2

¹Tontû bûû, nî tûbuîri kûthingata bwega mantû jarîa tûthirîtie kwigua tûtîkeeje kwaga wîtîkio kaorakaora.

²Gûkëeja kwîthîrwa ntûmîîri îrîa biûjûjû bieetû biareteerwe nî araîka nî ya mma, na îthûûkia rîa mûthemba kinya jûrîkû rîkoona îkanûkia rîng'anene narîo rî,

³nîatîa tuî tûkoonokua këethîra nî tûregeete wonokio bûbûnene ta bûû? Mwathani nîwe waarî wa mbere kwîrana mantû jegiî wonokio bûu na rîu bûrarikithua kîrî tuî nî barîa baaigîrue akîaria.

⁴Kinya Mûrungu nî aarikithîrie wonokio bûu agîtumagîra iriga na mantû ja kûrigaria na biama mwanya mwanya na biewa birîa aaeejanîre o ûrîa akwenda kuumania na Roho Ûmûtheru.

⁵Mûrungu atîethetie araîka athani ba nthî îrîa îkeeja; îrîa tûkwaria mantû jaayo nandî.

⁶ O ta ûrîa kwîrani antû ana: “Muntû nîwe ûû kenda gwe ûmûthûgaanîria? Kana mûtaana wa muntû nîwe ûû nîkenda gwe ûmûmenyagîîra?

⁷Wamweetherie ûmûnini kîrî araîka antû a kagiita gagakai, wamwîkîra thirû ya ûkumio na gîtîîo,

⁸na wamweethia mwathi wa into bionthe.” Rîrîa Mûrungu aaugîre into bionthe biathagwe nîwe, gûtî gîntû kinya kîmwe aatigîre gîtî waathoone bwaawe. Kinya nandî tûtîonaga into bionthe birî waathoone bwaawe.

⁹Îndî ûrîa twonaga nî Jesû ûrîa waeetherue ûmûnini kîrî araîka kagiita gagakai na araeewa mwago na gîtîîo nîûntû bwa kûûmîîria mwanka arakua nîkenda, nîûntû bwa ûtugi bwa Mûrungu, akua nîûntû bwa antû bonthe.

¹⁰Jesû nîwe waambîrîrie wonokio bwa antû bonthe. Tontû bûû, Mûrungu ûrîa woombîre into bionthe na noo we ûbimenyagîîra, nî oonere kwagîrîte gwîtîkîîria Jesû athangîkua nîkenda eethîrwa arî na mûtûûrîre jûtî îgi kinya rîrîkû nîkenda atongeeria antû babaingî bonoka.

¹¹Tontû ûrîa ûtheranagia na barîa batheretue Îthe waao nî ûmwe. Kîu nîkîo gîtûmaga Jesû arega kwigua nthao akîbeeta ataana na aarî ba baaba,

¹² akîîraga Mûrungu ûjû, “Nkeera ataana na aarî ba baaba ûrîa gwe ûthithîtie; ngagûkumia ndî kîûthûranoone kîaao.”

¹³ Ningî akauga, “Nî Mûrungu akî nkeerîgagîîra.” Kaîrî akauga, “Ûûni ndî aja, amwe na aana barîa Mûrungu aampeere.”

¹⁴Tontû aana bonthe boombi barî na nyama na tharike, kinya Jesû nî aaere muntû ûrî na nyama na tharike nîkenda gûkûrûkîîra gîkuûne kîaawe athiria Nkoma ûrîa ûrî na inya ya gîkuû,

¹⁵na akûûra antû bonthe barîa batwîre ûkomboone bwa gûkîra gîkuû.

¹⁶Nîkwîthîrwa nî gûkwonekana bwega atî tî araîka ateethagia îndî nî nchiarwa cia Abrahamu.

¹⁷Tontû bûû, Jesû nî aabuîri kûng'uananua na antû mantûûne jonthe nîkenda aa mûthînjîri-Mûrungu ûrîa mûnene ûrî na kîaao na wa gwîtîkîka agîtumîkîra Mûrungu na akîrekera antû meeyia jaao.

¹⁸Tontû nî aathangîkîrue na aragerua, arî na inya ya gûteethia bonthe barîa bageragua.