Read KIMERU BIBLE PROTESTANT EDITION Ahi 3 Bible Online

Ahi 3 - KIMERU BIBLE PROTESTANT EDITION bible

Ahi 3

¹Tontû bûû, ataana na aarî ba baaba barîa atheru, buî barîa bwîti nî Mûrungu, thûgaanieni mantû jegiî Jesû, mûtûmwa na mûthînjîri-Mûrungu ûrîa mûnene wa wîtîkio bûrîa tûkuumbûra.

² Nî aarî mwîtîkua kîrî Mûrungu ûrîa waamûthuurîre, o ta ûrîa Musa aarî mwîtîkua nyomba ya Mûrungu.

³Muntû ûrîa wakîte nyomba nîwe ûrî îgweta nkûrûki ya nyomba îîu. O ûu nîu Jesû aeerwe gîtîîo gîkînene nkûrûki ya Musa nîûntû nîwe waarî mwaki wa nyomba.

⁴Buî nî bûkûmenya bwega atî o nyomba îrî mûmîaki, îndî Mûrungu nîwe mwaki wa into bionthe.

⁵Musa aeere mwîtîkua ngûgîîne yaawe yonthe ndeene ya nyomba ya Mûrungu arî nthûûmba nîkenda aa mûkûûjî wa mantû jarîa Mûrungu akaaria nyumeene.

⁶Îndî Kristû nî aeere mwîtîkua ta Mûtaana kûmenyeera nyomba ya Mûrungu yonthe. Naatuî nî tuî nyomba yaawe këethîra tûkamenyeera wîrîgîîro bweetû tûtîgûkîra na twikumîrie bu.

⁷ Tontû bûû, o ta ûrîa Roho Ûmûtheru akuuga, “Naarua, bûkëeja kwigua kajû kaawe,

⁸bûkómia nkoro cieenu ta ûrîa biûjûjû bieenu biaregere kwathîka rîrîa biagererue birî rwanda,

⁹kûrîa biangererie na biroona mantû jarîa ndaathithîrie antû a mîaka mîrongo îna.

¹⁰Tontû bûû, nî ndaathûûrîrue nî nthûûkî îîu, na ndîrauga ‘Îgiita rîonthe antû baba batîmbathîkagîra nkoroone ciaao, na batiijî njîra ciaakwa.’

¹¹Tontû nî ndaaciîtîrie nthûûri, ‘Baba batîkorokûrûka kiurûkoone gîaakwa.’”

¹²Ataana na aarî ba baaba, imenyagîîreni gûtîkeeje kwonora muntû kinya ûmwe kîrî buî ûrî nkoro ya ûûî na îtîîtîkîtie Mûrungu, eeja gûtûma bûgwa bûtigana na Mûrungu ûrîa ûrî mwoyo.

¹³Îndî buî, îkanagîreni inya o muntû na ûngî o ntukû o ntukû, bunka îgîtagwa “Naarua,” nîkenda gûtîkeeje kwîthîrwa kûrî na kinya ûmwe weenu ûkoomua nkoro nî waayia bwa meeyia.

¹⁴Tontû baatuî nî tûgwatanagîra na Kristû mantûûne jonthe, këethîra tûkarikia wîtîkio bweetû mwanka mûthia.

¹⁵ Ûjû nîu Maandîko jakuuga: “Naarua, ûkëeja kwigua kajû ka Mûrungu, ûkómia nkoro yaaku ûrega kwathîka.” Ta ûrîa biûjûjû bieenu biathithîrie

¹⁶ Nî baaû baaigîrue kajû ka Mûrungu îndî bararega kwathîka? Tî bonthe barîa baaumîre Misri batongeeretue nî Musa?

¹⁷Nî barîkû baathûûrîrie Mûrungu mîaka mîrongo îna? Tî barîa beeîrie na barakuîra rwanda?

¹⁸A barîa aaciîtîîrie arabeera batîkorokûrûka kiurûkoone kîaawe nî barîkû? Tî barîa baaregere kwathîka?

¹⁹Tontû bûû, nî tûkwona batoombîre gûtonya nthîgûrûûne îrîa beerîri nîûntû bwa kwaga wîtîkio.