Read KIMERU BIBLE PROTESTANT EDITION Ahi 4 Bible Online

Ahi 4 - KIMERU BIBLE PROTESTANT EDITION bible

Ahi 4

¹Rîu Mûrungu nî atweete wîrane atî tûkoona kiurûko kîu aabeeragîra. Tontû bûû, o ûmwe weetû nî aimenyagîîre na akîrage, nîkenda atîkeeje kûremwa gûkinya kiurûkoone kîu kîîranîri.

²Tontû tuî nî twigîtue Nteto Injega o ta ûrîa bo baigîrue. Îndî ntûmîîri îrîa baaigîrue îtaabagunîre noo atîa, nîûntû barîa baamigîrue bataamîtîkîrîrie na wîtîkio.

³ Nîkwîthîrwa baatuî barîa tweetîkîrie nî tûtonyaga kiurûkoone kîu, o ta ûrîa Mûrungu augîîte, “O ta ûrîa ndaaciîtîrie nthûûri, ‘Batîkorokûrûka kiurûkoone gîaakwa.’” Aaugîre ûu kinya këethîra ngûgî ciaawe ciathirîre kuuma rîrîa oombîre nthîgûrû.

⁴ Maandîko jariuga ûjû mantûûne jegiî ntukû ya mûgwanja, “Mûrungu nî aanogokere ntukû ya mûgwanja aratigana na ngûgî ciaawe cionthe.”

⁵ O kaîrî nî jaugîîte ûjû, “Bo batîkorokûrûka kiurûkoone gîaakwa.”

⁶Kiurûko kîu kîrî o nîkenda antû bamwe bakûrûka ku îndî barîa baaigîrue Nteto Injega barî ba mbere batoombîre gûkûrûka ku nîûntû bwa kûrega kwathîka.

⁷ O kaîrî Mûrungu nî eekîre ntukû îngî îtagwa “Naarua.” Nî aarîrie agîtumagîra Daudi nyuma ya kagiita gakaraaja arauga ûjû, “Naarua, ûkëeja kwigua kajû ka Mûrungu, ûkómia nkoro yaaku.”

⁸ Tontû këethîra Joshua nî aatûmîre boona kiurûko, Mûrungu atîngîcoka kwaria mantû jegiî ntukû îngî nyumeene.

⁹Tontû bûû, kinya nandî nî gûtigeere kiurûko kîrî antû ba Mûrungu ntukû ya mûgwanja.

¹⁰ Tontû muntû ûrîa ûkûrûkaga kiurûkoone kîu Mûrungu eranîîrîte, nî atiganaga na ngûgî ciaawe o ta ûrîa Mûrungu aanogokere atigana na ngûgî ciaawe.

¹¹Tontû bûû, rekeeni tûciûmie nîkenda tûkûrûka kiurûkoone kîu, nîkenda gûtîkeeje kwonora kinya ûmwe weetû wîîja kûremwa gûtonya nîûntû bwa kûrega kwathîka ta ûrîa Aisraeli baathithîrie.

¹²Tontû rûteto rwa Mûrungu rûrî mwoyo na rûrî inya, nî rûrûûgî nkûrûki ya rûchiu rûrîa rûûgî nteere cio-ijîîrî. Rûmuntaga rûkagaania nkoro na mwoyo na rûkaathûrana marûngo na maguta ja mîndîîndî. Nî rûmenyaga mathûgaanio na mairîrîîria ja nkoro.

¹³Gûtî kîûmbe kinya kîmwe kiithi mbere ya Mûrungu. Îndî nî onaga mantû jonthe jarîa jakarîkaga na gûtî jo jaithi. Mûrungu ûûjû nîwe tûkeera mantû jonthe jarîa twaathithia.

¹⁴Tontû bûû, tûthingateeni wîtîkio bûrîa tuumbûraga bwega, nîûntû tuî tûrî na mûthînjîri-Mûrungu ûrîa mûnene, ûrîa waitîrie îgûrû, tawe Jesû, Mûtaana wa Mûrungu.

¹⁵Mûthînjîri-Mûrungu ûrîa mûnene ûu weetû nî aijî kûrîa tûremeeragwa nîûntû nî aagererue na njîra cionthe irîa tûgeragua nacio, îndî ataathithia meeyia.

¹⁶Tontû bûû, twîteeeni akuî na rûriga rwa ûtugi bwa Mûrungu tûrî na ûchamba nîkenda agatuigîîrua kîaao na twona ûtugi bwa gûtûteethia rîrîa tûrî na ûbatu.