Read KIMERU BIBLE PROTESTANT EDITION Ahi 5 Bible Online

Ahi 5 - KIMERU BIBLE PROTESTANT EDITION bible

Ahi 5

¹Tontû o mûthînjîri-Mûrungu ûrîa mûnene athuuragwa kuuma kîrî antû nîkenda aikagia biewa birîa antû baritaga na abaritagîra igongwana kîrî Mûrungu nîkenda barekerwa meeyia.

²Mûthînjîri-Mûrungu ûu, nî aremeeragwa nî mantû jamwe ta bangî. Tontû bûû, atiinyagîîria barîa batiijî na barîa barî na maatia.

³ Tontû kinya we kûrî mantû jamûremagîîra, nî aritaga kîgongwana nîûntû bwa meeyia jaawe na akarita kîgongwana nîûntû bwa meeyia ja antû barîa bangî.

⁴ Gûtî muntû ûûmba gûciaa wengwa gîtîîo kîu gîa kwaa mûthînjîri-Mûrungu ûrîa mûnene. Muntû aejaga mûthînjîri-Mûrungu ûrîa mûnene rîrîa athuurwa nî Mûrungu ta ûrîa Aaroni aathuurîrwe.

⁵ Tontû bûû, kîu nîkîo gîatûmîre kinya Kristû atairitîre wengwa kwaa mûthînjîri-Mûrungu ûrîa mûnene, îndî nîka aathuurîrwe nî Mûrungu ûrîa wamwîrîre nteto iji: “Gwe nîgwe Mûtaana waakwa, naarua nkwaa Abaagu.”

⁶ Ningî nî augîîte antû angî atî, “Gwe ûrî mûthînjîri-Mûrungu kenya na kenya, wa mûthemba jwa Melikizedeki.”

⁷ Rîrîa Jesû aatûûraga aja nthîgûrû nî aarombere areerencana na ararîrîra Mûrungu na kajû, Mûrungu ûrîa waarî na inya ya kûmwonokia kuuma gîkuûne. Nawe Mûrungu nî aamwigîrue nîûntû nî aarombaga ainyiîtie.

⁸Kinya këethîra we aarî Mûtaana wa Mûrungu, nî airitanîre kwathîka kuumania na mîthangîko îrîa aathangîkîre.

⁹Nawe nî aetherue muntû ûtî na îgi noo rîrîkû na araa kaumo ka wonokio bwa antû bonthe barîa bamwathîkagîra.

¹⁰Mûrungu nî aamweetherie mûthînjîri-Mûrungu ûrîa mûnene wa mûthemba jwa Melikizedeki.

¹¹Tûrî na mantû jamaingî ja kuuga ûntûûne bûbû îndî buî bûtîumba kûjaciûra nîûntû nî bwagîte mpwîî cia gûciûra mantû.

¹² Kinya këethîra buî nandî nî bûbuîrîte kwîthîrwa bûrî aritani, no bûkwenda muntû wa kûbûritana kaîrî mantû jarîa bwaambîrîrie kwîrwa jegiî Nteto Injega cia Mûrungu. Buî bûrîendekana kûrerwa na îria na tî irio bibiûmo.

¹³Nîkwîthîrwa o muntû wonthe ûrîa ûtûûraga kûnyua îria, gûtî û aijî bwegiî waagîru nîûntû nî mwana mûnyi.

¹⁴Biakûrîa bibiûmo nî bia antû barîa barî na kîrîra, barîa bairitanîte kwathûrana mantû jameega na jamaaî.