Read KIMERU BIBLE PROTESTANT EDITION Ahi 6 Bible Online

Ahi 6 - KIMERU BIBLE PROTESTANT EDITION bible

Ahi 6

¹Tontû bûû, tûtiganeeni na mantû jarîa muntû aritanagwa jarî ja mbere athîria kwaa mûkristû. Twîteni na mbere gûkûra wîtîkioone tûtîgacoke gwaka mûsingi jwa kwirira kaîrî: ta kûbwîra bûtige kûthithia mantû jarîa jatîkûbûteethia gûkûra kana kûbwîra mantû jegiî gwîtîkia Mûrungu;

²kana ûritani bwegiî kîbatithio, kana kûrîîkîra antû njara, kana ûritani bwegiî kûriûkua gwa akuû kana ûritani bwegiî gûtuîrwa îgamba kenya na kenya.

³Ûu nîu tûkathithia këethîra nî wendi bwa Mûrungu.

⁴Nîkwîthîrwa gûtîûmbîka antû barîa baatigîre wîtîkio bwaao bairira kaîrî nîûntû nî bathirîtie gûcema wega bwa kwîthîrwa barî na ngwatanîro na Mûrungu na nî baeei Roho Ûmûtheru amwe na bangî.

⁵Nî bacemete baigua wega bwa rûteto rwa Mûrungu, na baamenya inya ya ûtûûro bûrîa bûkeeja.

⁶Antû ta bau bakëeja kûgwa, kûrî inya mono bo gûcoka kwirira kaîrî nîûntû nîka bamenithagia Mûtaana wa Mûrungu weerûûne na bakamwambithia mûtharabeene kaîrî nîûntû bwa mathithio jaao.

⁷Nîkwîthîrwa muunda jwathiria kuurîrwa nî ngai ya kûng'ana, kîmera nî kiumaga na barîa bajûrîmîte bakatharimwa nî Mûrungu.

⁸ Îndî muunda ta jûu jûkëeja kuuma nkonko na matongu, jwîthîrwa jûrî jwa ûtheri na jûkeethîrwa jûrî ûgwatiine bwa kûrumwa na mûthieene jûkaîîthua.

⁹Acoore baakwa, kînya këethîra tûkuuga ûu mantûûne jabwegiî, tûrî na mma atî kûrî na mantû jameega nkûrûki jarîa jeejanagia na wonokio.

¹⁰Tontû Mûrungu nî wa mma na atîûmba kûûrîrua nî ngûgî cieenu na wendo bweenu bûrîa bwonanîtie nîûntû bwaawe bûgîtumîkîra akristû mwanka naarua tûrî.

¹¹Ûrîa tûkwenda mono nî atî o ûmwe weenu agîe wîru ta bûu bungwa, mantûûne ja kûrikithia wîrîgîîro bweenu buru mwanka mûthia.

¹²Bûthithie ûu nîkenda bûtîkeeje kwaa athao. Îndî thingateni ngerekano ya barîa boojûragîrua wîrane bûrîa Mûrungu eekîre nîûntû bwa wîtîkio bwaao na kûûmîîria kwaao.

¹³Rîrîa Mûrungu eekîre wîrane na Abrahamu nî aaciîtîrie arauga atî akoojûria wîrane bûu. Tontû gûtaarî na ûngî ûmûnene nkûrûki yaawe wa gûciîtia nawe, Mûrungu nî aaciîtîrie na riîtwa rîaawe wengwa.

¹⁴ Arauga ûjû, “Ngakûtharima mono na ntûme nchiarwa ciaaku ciingîe mono.”

¹⁵Abrahamu nawe nî eeteerere omîîrîtie, mwanka Mûrungu aramwaa kîrîa aamwîrîrîte.

¹⁶Ûrîa gûkari nî atî antû baciîtagia na riîtwa rîa gîntû kîrîa kînene kîrî bo, na mûciîtio jûu jûkaa ûntû bwa mûthia bwa kûrikithia atî ûu baciîtia nî bwa mma.

¹⁷Mûrungu nî eendaga kwonia barîa eekîte wîrane nabo atî bûrîa augaga bûtîgarûkaga. Tontû bûu, aroongeera mûciîtio kîrî wîrane.

¹⁸Tontû bûû, Mûrungu nî aatûnenkerete wîrane na mûciîtio. Jaja jo-jaîrî jatîûmba kûgarûka nîûntû gûtîûmbîka Mûrungu aaria ûrongo. Tontû nî twiciithîte kîrî we, tûrî na ûchamba bûbûnene nîûntû tûkoona wîrîgîîro bûrîa eekîte mbere yeetû.

¹⁹ Wîrîgîîro bûu bweetû nîbu tûciandîte kîrî bu mwanka twarika. Wîrîgîîro bûbû nî bûkûrûkaga mwanka nyuma ya gîtaambaa kîrîa kîgaanîtie kîûrû na antû arîa atheru buru.

²⁰ Kûu nîku Jesû eetîre nîûntû bweetû. Rîu we nî aaere mûthînjîri-Mûrungu ûrîa mûnene wa kenya na kenya wa mûthemba jwa Melikizedeki.