Read KIMERU BIBLE PROTESTANT EDITION Ahi 7 Bible Online

Ahi 7 - KIMERU BIBLE PROTESTANT EDITION bible

Ahi 7

¹ Melikizedeki ûûjû aarî mûnene wa Salemu na aarî mûthînjîri wa Mûrungu Ûrîa Ûrî Îgûrû buru. Rîrîa Abrahamu aacokete aumîte kûûraga anene, nî aatirimanîre na Melikizedeki nawe aramûtharima,

²na Abrahamu aramûgaîra gîchunchî kîmwe kuuma kîrî îkûmi kîa into bionthe birîa aataîte. Riîtwa Melikizedeki, nî kuuga Mûnene wa waagîru. Tontû aarî mûnene wa Salemu, riîtwa rîaawe nî kuuga Mûnene wa thîîrî.

³Gûtî we wiijî îthe kana ng'ina na atiumanîtie na rûrîîjo kinya rûrîkû. Gûtî we wiijî rîrîa aaciarîrwe kana rîrîa aakuîre. We ang'uanene na Mûtaana wa Mûrungu na nî atûûraga arî mûthînjîri-Mûrungu kenya na kenya.

⁴Rîu bûkwigua ûrîa aarî muntû ûrî îgweta rîrînene. Kîûjûjû gîeetû kîrîa kîaarî îgweta, takîo Abrahamu nî kîamûritîîre gîchunchî kîmwe kuuma kîrî îkûmi kîa into bionthe birîa aataîte.

⁵ O ûu nîu kinya antû ba rûrîîjo rwa Lawi, tabo athînjîri-Mûrungu, beetîkîrîîtue nî Waatho kûjûkagia gîchunchî kîmwe kuuma kîrî îkûmi kuuma kîrî antû bonthe kinya këethîra nî baarî ba rûrîîjo rwa Abrahamu.

⁶Melikizedeki ûrîa ûtaarî wa rûrîîjo rwaao nî aaritîîrwe gîchunchî kîmwe kuuma kîrî îkûmi nî Abrahamu. Nî aatharimîre Abrahamu ûrîa waarî akweewa wîrane nî Mûrungu.

⁷Nî kwijîwe bwega atî ûrîa mûnini nîwe ûtharimagwa nî ûrîa mûnene.

⁸Ningî athînjîri-Mûrungu bau bajûkagia gîchunchî kîmwe kuuma kîrî îkûmi nî bakujaga îndî Melikizedeki nî atûûraga mwoyo kûringana na ûrîa Maandîko jakuuga.

⁹Tontû bûû, twoomba kuuga atî kinya Lawi, ûrîa ûjûkagia ichunchî bia îkûmi, nî aaritîre gîchunchî kîmwe kuuma kîrî îkûmi kîrî Abrahamu,

¹⁰nîûntû kinya Lawi ataarî agûciarwa noo aarî bieroone bia Abrahamu.

¹¹Këethîra ûthînjîri-Mûrungu bwa Alawi nî bwatûmîre mantû jaagîra buru ûrîa kwendekaga, nîûntû antû baaerwe Waatho barî kîrî ûthînjîri-Mûrungu bûu, Mûrungu atîngîona ûbatû bwa kûreeta mûthînjîri-Mûrungu ûngî wa mûthemba jwa Melikizedeki antû eeta na mbere na ûmwe wa rûrîîjo rwa Aaroni.

¹²Nîkwîthîrwa rîrîa ûthînjîri-Mûrungu bûgarûkaga, kinya Waatho nabu no mwanka bûgarûke.

¹³Nîkwîthîrwa ûrîa tûkwaria mantû jamwegiî aarî wa kuuma mwîrîga jûngî, jûrîa antû baajû batîejaga athînjîri-Mûrungu.

¹⁴Nî kwijîwe bwega atî Jesû aarî wa kuuma mwîrîgeene jwa Juda. Musa gûtî u auga bwegiî mwîrîga jûu rîrîa agwetaga mantû jegiî athînjîri-Mûrungu.

¹⁵Mantû nî jakwoneka bwega nkûrûki nîûntû mûthînjîri-Mûrungu ûkari ta Melikizedeki akwîja,

¹⁶ûrîa waaere mûthînjîri-Mûrungu, tî kuuma mwîrîgeene jwa Lawi ta ûrîa Waatho buugaga, îndî nî kuumania na inya ya ûtûûro bûrîa bûtîthiraga.

¹⁷ Nîkwîthîrwa nî kwaandîki mantû jamwegiî ûjû, “Gwe ûrî mûthînjîri-Mûrungu kenya na kenya, wa mûthemba jwa Melikizedeki.”

¹⁸Waatho bwa mbere nîka bwaûmbîrue nîûntû bûtarî na inya na bwaarî bwa ûtheri.

¹⁹Tontû gûtî ûntû kinya bûmwe bwagîrîthua nî Waatho bwa Musa. Îndî tûkûreterwa wîrîgîîro bûbwega nkûrûki bwa gûtûma tuî tûîtaîta akuî na Mûrungu.

²⁰Mûrungu nî aaciîtîrie akîmwethia mûthînjîri-Mûrungu.

²¹ Antû bangî bakîaa athînjîri-Mûrungu, Mûrungu ataciîtagia. Îndî rîrîa Jesû aeejaga mûthînjîri-Mûrungu, Mûrungu aaugîre ûjû: “Mwathani agûciîtia, na atîgarura mathûgaanio jaawe: ‘Gwe ûkaa mûthînjîri-Mûrungu kenya na kenya!’”

²²Mwanya jûjû nîju jûkûrikithia atî kîrîkanîro kîrîa Jesû aaretere nî gîkîega nkûrûki.

²³Athînjîri-Mûrungu barîa baarî o mbereene nî babaingî mono nîûntû nî baakujaga batîte na mbere kûrita ngûgî.

²⁴Îndî Jesû atûûraga arî mûthînjîri-Mûrungu îgiita rîonthe nîûntû nî atûûraga mwoyo kenya na kenya.

²⁵Tontû bûu, we arî na inya îgiita rîonthe ya kwonokia bonthe barîa beetaga akuî na Mûrungu gûkûrûkîra kîrî we, nîûntû atûûraga mwoyo kûromba akîberencanagîîra.

²⁶Nîkwagîrîte twîthîrwe tûrî na Jesû arî mûthînjîri-Mûrungu ûrîa mûnene, nîûntû we nî ûmûtheru, na atî maatia, na atî îgi, na nî athûûranîtwe na eeyia na aeewa ûkumio na gîtîîo gîkînene mono kûu îgûrû.

²⁷ We atî meeyia ja gûtûma aritaga kîgongwana o ntukû o ntukû ta athînjîri-Mûrungu barîa bangî, barîa baambaga kûrita kîgongwana nîûntû bwa meeyia jaao, rîu bagacoka kûrita kîgongwana nîûntû bwa meeyia ja antû bau bangî. Jesû aaritîre kîgongwana rîmwe rionka na rîa mûthia rîrîa aacieejanîre wengwa arî kîgongwana.

²⁸Ûrîa gûkari nî atî Waatho bwa Musa nî bwatûmaga antû bakaa athînjîri-Mûrungu barîa anene kinya këethîra mîîrî yaao noo îtûme bakagwa meeyiene. Îndî mûciîtio jûrîa Mûrungu aaciîtîrie nyuma ya kweejana Waatho, nî jwatûmîre arathuura Mûtaana waawe ûrîa waeetherue ûmûtheru buru kenya na kenya.