Read KIMERU BIBLE PROTESTANT EDITION Ahi 8 Bible Online

Ahi 8 - KIMERU BIBLE PROTESTANT EDITION bible

Ahi 8

¹ Rîu bûrîa bûrî na gîtûmi mono kîrî jarîa tûkuuga nî bûbû: baatuî tûrî na mûthînjîri-Mûrungu ûrîa mûnene, ûrîa ûkari nthî rûteere rwa ûrîo rwa rûriga rwa Ûnene kûu îgûrû.

²We nî mûthînjîri-Mûrungu ûrîa mûnene gûntû kûrîa kûtheru buru, gûntû kûu gûtîthithîtue nî muntû îndî kûthithîtue nî Mwathani.

³O mûthînjîri-Mûrungu ûrîa mûnene wonthe athuuragwa nîkenda aikagîria Mûrungu biewa na amûritagîra igongwana. Tontû bûû, no mwanka kinya mûthînjîri-Mûrungu ûû tûrî nawe eethîrwe arî na gîntû gîa kûrita.

⁴Këethîra mûthînjîri-Mûrungu ûû nî aja nthî arî, atîngîtarwa arî mûthînjîri-Mûrungu kinya anini, nîûntû gûkû nthî kûrî na athînjîri-Mûrungu barîa baritaga igongwana kûringana na ûrîa Waatho bwa Musa buugaga.

⁵ Ngûgî îrîa baritaga nî ngerekano akî ya ngûgî yongwa îrîa îritagwa kûu îgûrû nîûntû rîrîa Musa eendaga gwaka îema nî eerîrwe nî Mûrungu ûjû, “Aka kûringana na ûrîa woonerue ûrî kûu kîrîmeene.”

⁶Îndî Jesû nîwe weei ngûgî ya ûthînjîri-Mûrungu înjega nkûrûki ya ûthînjîri bûu bwa tene, nîûntû kîrîkanîro kîrîa aathithîrie gîa kûgwatithania Mûrungu na antû baawe nî gîkîega nkûrûki nîûntû kîthithîtue na wîrane bûbwega nkûrûki.

⁷Tontû kîrîkanîro kîrîa kîa mbere kîrîngîaga maatia, gûtîngîîthîrwa kûrî na ûbatu bwa kîrîkanîro kîa biîrî.

⁸ Îndî Mûrungu nî oonere antû baawe barî na maatia na arauga, “Îgiita rîgakinya, ûu nîu Mwathani akuuga, rîrîa ngeeka kîrîkanîro gîkîerû na antû ba Israeli na antû ba Juda.

⁹Gîtîîthîrwa gîkari ta kîrîkanîro kîrîa ndeekîre na biûjûjû biaao, rîrîa ndabagwatîre njara ndîrabatongeeria ndîrabarita nthîgûrû ya Misri; nîûntû bateetîre na mbere kûthingata kîrîkanîro gîaakwa, ntaatindanîîre na mantû jaao, nîu Mwathani akuuga.

¹⁰Gîkî nîkîo kîrîkanîro kîrîa ngeekanîra na antû ba Israeli, matukûûne jarîa jakeeja, nîu Mwathani akuuga; ngeekîra Waatho bwaakwa mathûgaanioone jaao, na njaandîke nkoroone ciaao. Naani nkaa Mûrungu waao, nabo baee antû baakwa.

¹¹Gûtî kinya ûmwe waao ûgacoka kûritana muntû ûngî, kana muntû kinya ûrîkû atua kwîraga ûngî, ‘Nî ûbwîrî kûmenya Mwathani.’ Tontû bonthe bakamenya nî ni ûû, kuuma ûrîa mûnini mwanka ûrîa mûnene buru.

¹²Nkaabarekera meeyia jaao, na ntîcoka kûrîrîkana maatia jaao.”

¹³Rîrîa Mûrungu aarîrie mantû jegiî kîrîkanîro gîkîerû, nîka aathirîrie kîrîkanîro kîrîa kîa mbere. Gîntû kinya kîrîkû gîkaambîrîria gûkûra nîka kîîthagîrwa kîrî akuî gûteewa.