Read KIMERU BIBLE PROTESTANT EDITION Jak 2 Bible Online

Jak 2 - KIMERU BIBLE PROTESTANT EDITION bible

Jak 2

¹Ataana na aarî ba baaba, tontû bwa ûrîa bwîtîkîtie Mwathani Jesû Kristû ûrîa ûrî mûnene wa ûkumio, bûkáthithagîria antû mantû na kîmenyano.

²Kwa ngerekano, muntû akeeja kîûthûranoone kîeenu eekîrîte nguû inthongi na eekîrîte kîmata kîa thaabu, ningî muntû ûngî nkîa akeeja wîkîrîte nguû inthiru.

³Këethîra bûkagwata ûgeni ûrîa wîkîrîte nguû inthongi bûkamwîra, “Itû kara nthî aja,” îndî nkîa bûkamîra, “Rûûngama arîa gwe,” kana “Kara nthî aja akuî na magûrû jaakwa,”

⁴rîu nîka bwonania atî kûrî na kîmenyano gatîgatîîne keenu na bwaa aathûrani barî na mathûgaanio jamathûûku.

⁵Ûnthikîîreni ataana na aarî ba baaba barîa mpendeete! Anga Mûrungu tî antû barîa nkîa athuurîte nîkenda bakaa itonga mantûûne ja wîtîkio na agaîra rûgai rwa ûnene bûrîa eekîte wîrane atî akaa bonthe barîa bamwendeete?

⁶Îndî buî bweethetie muntû ûu nkîa gîntû gîtî na bata. Anga bau itonga tîbo babûinyagîîria na bakabwîkîra mîrigi bakabwikia kotini?

⁷Bau too bo bathûmbagia riîtwa rîrîega rîrîa bwaeerwe?

⁸ Bûkëeja kwîthîrwa na mma nî bwathîkagîra Waatho bûrîa bwega o ta ûrîa bwandîki Maandîkoone atî, “Eendaga mûtûûri waaku o ta ûrîa ûciendeete,” nî bûthithagia bwega.

⁹Îndî gûkëethîrwa atî buî bûthithagîria antû mantû na kîmenyano bûrî na meeyia. Nabu Waatho nî bûkûbûthitanga atî bûrî eeyia.

¹⁰Tontû kinya muntû akeethîrwa nî ombîte kwathîkîra Waatho bunthe îndî agaatia gaûntûûne kaniini, we eethagîrwa aunîte Waatho bunthe.

¹¹ Tontû ûrîa waugîre “Ûkáthûngîîra,” nowe waugîre, “Ûkóragana.” Rîu ûkëeja kûrega kûthûngîîra îndî ûkooragana, kwaa no unîte Waatho.

¹²Tontû bûû, tueni kwaragia na kûthithagia mantû ta antû barîa bakagambithua nî Waatho bûrîa bûtweete ûciathi.

¹³Tontû barîa batî kîaao Mûrungu akabagîtîra îgamba atî na kîaao. Amwe na jau kîaao kîrî inya mantûûne ja kûgiita îgamba.

¹⁴Ataana na aarî ba baaba, kûrî na ûguni bûrî kû muntû kuuga arî na wîtîkio îndî atîkûbwonania na mathithio? Wîtîkio bûu bwaawe bûûmba kûmwonokia?

¹⁵Gûkëethîra mûtaana kana mwarî wa baaba nî athirîtie nguû kana atî na biakûrîa,

¹⁶na ûmwe weenu akeera muntû ta ûu, “Îta bwega, ûkáreka mpio îkûgwata na ûkáreka ûrîîwa nî mpara”, na atîramûthirîria thîîna îrîa agûkarî nayo, nî wega bûrîkû muntû ûu athithia?

¹⁷Tontû bûû wîtîkio bûtî na mathithio nî bûkuû.

¹⁸Îndî muntû ûûmba kuuga: “Gwe ûrî na wîtîkio, naani ndî na mathithio.” Naani ngacokia, “Û mbonia ûrîa muntû oomba kwîthîrwa arî na wîtîkio bûtî na mathithio, naani ngakwonia na mathithio atî ndî na wîtîkio.”

¹⁹Gwe nî wîtîkîtie atî Mûrungu nî ûmwe; naagwe nî ûthithagia bwega. Îndî roho inthûûku kinya cio nî ciîtîkîtie o ûu na ikainaina nî ûguaa.

²⁰Îgwe kîaa, ka ûkwenda kwonua atî wîtîkio bûtî na mathithio nî bwa ûtheri?

²¹ Anga baaba weetû Abrahamu, tî mathithio jatûmîre atarwa arî ûmwagîru rîrîa aaritîre mûtaana waawe Isaaka arî kîgongwana kîritîroone kîa igongwana?

²²Au nî ûkwona atî nî wîtîkio bwaritaga ngûgî birî amwe na mathithio, na wîtîkio bûroojûrua na mathithio.

²³ Ûu nîu Maandîko joojûrîrue jarîa jaugaga, “Abrahamu nî eetîkîrie Mûrungu, na bûu bûratarwa bûrî waagîru kîrî we.” Tontû bûû, Abrahamu areetwa mûcoore wa Mûrungu.

²⁴Au nî bûkwona atî muntû aagîrithagua nî mathithio îndî tî wîtîkio akî.

²⁵ Ûu nîu gwakarîre kîrî mûka mûmaraya ûrîa weetagwa Rahabu. We aatarîrwe arî ûmwagîru nîûntû bwa kûgwata ûgeni Aisraeli barîa baatûmi gûcûnkûûna na araboonia njîra ya gûtorokeera.

²⁶Rîu, o ta ûrîa mwîrî jûtî na mwoyo jûrî jûmûkuû, nîu kinya wîtîkio bûtî na mathithio bûrî bûkuû.