Read KIMERU BIBLE PROTESTANT EDITION Jak 3 Bible Online

Jak 3 - KIMERU BIBLE PROTESTANT EDITION bible

Jak 3

¹Ataana na aarî ba baaba, bûkaeeni aritani babaingî gatîgatîîne keenu. Tontû buî nî bûkûmenya atî tuî barîa tûrî aritani tûkagambithua îgamba rîrîûmo nkûrûki ya bangî.

²Twinthe nî tûthithagia maangaratania jamaingî. Muntû ûrîa ûtîangaratanagia rwarieene rwaawe nî ûmwega buru na nî oombîte kwatha mwîrî jwaawe junthe.

³Baatuî twîkagîra mbarathi gacuuma ga kîathatha nîkenda îtwathîkîra. Tûthithagia ûu nîkenda tûûmba kûmiikia o arîa tûkwenda.

⁴Meri kinya këethîra nî înene mono na ningî nî îtindîkagwa nî ruuo rûrûnene îrî îrieene, îgatagwa nî kathigû kaniini mono îkeerekerua o arîa mwîtithia waayo akwenda.

⁵Nî o ta ûu, kinya këethîra rûûme nî karûngo kaniini ka mwîrî nî rûûmbaga gwikumîria mantû jamanene. Mwitû jûmûnene kinya atîa jwîîthagua nî kamwanki kaniini!

⁶Rûûme nî mwanki. Rûûjûri mantû jamathûûku jarîa joomba kûthûkia mwîrî junthe. Rûûme rûrûngûragia ûtûûro bweetû bunthe na mwanki jwa kenya na kenya.

⁷Muntû oomba kûrîîthia nyomoo cia kîthaka na agakaranîria nacio itîkûmûthûkia. Nî oombîte kûrîîthia nyomoo cia kîthaka na nyoni na irîa îrî mathendû na kinya biûmbe birîa bikaraga îrieene.

⁸Îndî gûtî muntû woomba kwatha rûûme. Rûûme nî ûthûûku bûtîûmba kwathîka na rûûjûri sumu yûûmba kûûraga.

⁹ Nîru tûkumithagia naru Mwathani Baaba, na noru tûrumaga naru antû barîa Mûrungu oombîte bang'uanene nawe.

¹⁰Kanyueene kamwe nîko kaumaga irumi na gakauma itharimo. Gûtîbuîri gûkaraga ûu ataana na aarî ba baaba.

¹¹A rî rûûjî rûrî mûrîo na rûûjî rûrî ng'ana rwoomba kuumîîra kîthimeene kîmwe?

¹²Ataana na aarî ba baaba, kûrî rîo mûkûû jûûmbîkia gûciara ntaratare kana mûtaratare jûciarîkia nkûû? Ningî gûtî rîo kîthima kîa rûûjî rwa chumbî kiumîkia rûûjî rûrwega.

¹³Nûû gatîgatîîne keenu ûrî ûûmûme na ûgûciûkîrwa nî mantû? Muntû ta ûu nî onanagie na mîîtîre yaawe ûrîa ngûgî ciaawe ikari arî na kwinyiiyia kûrîa kuumanîtie na ûûme.

¹⁴Îndî këethîra buî bûrî na rûriitho na bûûjûrîtwe nî ûrûrû na gûcienda bûgaikumieni bwîja kûrwaa na ûûma.

¹⁵Ûûme bwa mûthemba jûu bûtîejani buumîte kîrî Mûrungu, îndî nî bwa nthîgûrû îîjî na tî bwa kîroho, nî bwa Nkoma.

¹⁶Arîa kwonoraga rûriitho na gûcienda nî gûkaraga na kinya gîtuma na mîîtîre îmîthûûku ya mîthemba yonthe.

¹⁷Îndî ûûme bûrîa bweejani buumîte îgûrû, mbere mma bûu nî bûûtheru. Ningî ûûme bûu bûcwaga thîîrî na bûûjûrîtwe nî ûkiri na nî bûthikagîîra mathûgaanio ja bangî. Ningî ûûme nî bûûjûrîtwe nî kîaao na maciara jameega na bûtî kîmenyano kana waayia.

¹⁸Antû barîa baandaga mbeeû ya thîîrî boojûrîtwe nî thîîrî bakethaga maciara ja waagîru.