Read KIMERU BIBLE PROTESTANT EDITION Jak 4 Bible Online

Jak 4 - KIMERU BIBLE PROTESTANT EDITION bible

Jak 4

¹Nîmbi îtûmaga bûkara bûkîrûjaga na bûgîtetaga gatîgatîîne keenu? Mantû jau jaumanagia na mairîrîîria jamaaî jarîa jabwatîkaga ndeene yeenu.

²Bwendaga into bina îndî bwabiaga, bûkooragana. Ningî nî bwirîragîîria mantû mana, îndî bwajaga rîu bûkarwaa na bûgatetania. Bûtî nabio nîûntû bûtîrombaga kuuma kîrî Mûrungu.

³Bûrombaga bûkarega kwona nîûntû bûrombaga na njîra îmbîî nîkenda bûjûria mairîrîîria jeenu.

⁴Buî antû barîa batîûmba gwîtîkîka! Ka bûtiijî atî gûtuma ûcoore na nthîgûrû îîjî nî kûgîa ûthû na Mûrungu? Tontû bûû, o muntû ûrîa wendaga gûtuma ûcoore na nthîgûrû, ka acieethagia mûnthû wa Mûrungu.

⁵Ûkáthûgaania atî Maandîko nî ja ûrongo jarîa jaugaga, “Mûrungu arî rûriitho rûûneene nîûntû bwa Roho ûrîa eekîte ndeene yeetû.”

⁶ Îndî ûtugi bûrîa Mûrungu aeejanaga nîbu bûrî inya nkûrûki. O ta ûrîa Maandîko jaugaga, “Mûrungu nî areganaga na antû barîa aikumia îndî akaa barîa bainyiiagia ûtugi bwaawe.”

⁷Tontû bûû, inyiiagieni mbere ya Mûrungu. Reganageni na Nkoma nawe akabûmatûka.

⁸Kuîrieni Mûrungu nawe akabûkuîrîîria. Therieni njara cieenu buî eeyia, naabuî aciayia thambieni nkoro cieenu.

⁹Ithikîîreni na bûkaye na bûrîre. Ntheko cieenu nî igarûke ciee kwithikîîra na kûgwîrua kweenu kwee kwigua kîeba.

¹⁰Inyiagieni meethoone ja Mwathani nawe akabûa gîtîîo.

¹¹Ataana na aarî ba baaba, tigeeni kûmenanagîîria. Ûrîa ûmenagîîria mûkristû ûngî kana akamûgitîra îgamba bûbûûî nî Waatho ethagîrwa akîmenagîîria na kûgitîra îgamba bûbûûî. Îndî gwe ûkä mûgambithia wa Waatho ûtîthagîrwa ûkîthithagia ûrîa Waatho bûkuuga, îndî wîthagîrwa ûrî mûgitanîri wa îgamba.

¹²Mûrungu nîwe wenka mwejani Waatho na mûgitanîri îgamba. Nîwe wenka wonokagia na akooraga. Rîu, ûgwe nîgwe ûu ûgitagîra muntû ûngî îgamba bûbûûî?

¹³ Nandî rî, thikîîreeni buî barîa buugaga, “Naarua, kana rûûjû tûgeeta ntûûreene nna, tûkare kûu antû a mwaka jûmwe tûringe biashara na tûcionere umithio.”

¹⁴Îndî buî bûtîîthagîrwa kinya bwijî ûrîa rûûjû gûgakara. Ûtûûro bweenu bûkari ta nduume îrîa yonagwa kagiita gagakai îgacoka îkaûra.

¹⁵Antû a buuga ûrîa bûkathithia, bûbuîri kuuga ûjû, “Mwathani eenda, tûkeethîrwa tûrî mwoyo rûûjû, tûrite ngûgî îîjî kana îrîa.”

¹⁶Îndî nandî buî bwikaathaga na bûgaikumia. Gwikumia ta kûu nî gûkûthûûku.

¹⁷Rîu, o muntû wonthe ûrîa wiijî ûntû bûrîa agîîrîte kûbûthithia na akarega kûbûthithia, nî meeyia eethagîrwa akîthithia.