Read KIMERU BIBLE PROTESTANT EDITION Jak 5 Bible Online

Jak 5 - KIMERU BIBLE PROTESTANT EDITION bible

Jak 5

¹Nthikîîreeni nandî buî itonga! Rîreni na bûkaye, nîûntû bwa mathîîna jarîa jakabwîjîîra.

² Mootonga jeenu jakwora, na nguû cieenu ikûrîwa nî mûthwa.

³Thaabu cieenu na fetha ikûrota. Gutu yaacio nîyo îkaa ûkûûjî bwa kûbûgambithia na îîthie nyama cia mîîrî yeenu ta ûrîa mwanki jûîîthagia. Buî bûciûthûranîrîtie mootonga jamaingî nîûntû bwa ntûku cia mûthia cia ûtûûro bweenu.

⁴ Mîchaara ya ariti ngûgî barîa barîmaga miuunda yeenu, îrîa bûbaîîragia bûgatigwa nayo nî îgûtûmîîria na kajû gakanene. Nakîo kîrîro gîa akethi nî kîthirîtie gûkinya matûûne ja Mwathani Mweneinya.

⁵Babuî bûtwîre nthîgûrûûne bwingîîri nî into na mîago îmingî. Buî nî bwituîrîte na bwanora bwetereete ntukû ya kûthînjwa.

⁶Buî nî bûgitîrîte antû babaagîru îgamba na bwabooraga. Îndî bo batairûîra.

⁷Ataana na aarî ba baaba, kareni bûûmîîrîtie mwanka rîrîa Mwathani akeeja. Oneni ûrîa mûrîmi akaraga oomîrîtie, eteerete muunda jwaawe juuma irio. Akaraga oomîîrîtie mwanka rîrîa kîmera kîaawe gîkaurîrwa nî ngai ya mbere na ya nyuma.

⁸O ûu kinya buî ûmîîrieni. Ciaandeni wîrîgîîroone tontû Mwathani arî akuî kwîja.

⁹Ataana na aarî ba baaba, tigeeni kûnung'una nîûntû bwa bangî Mûrungu atîkeeje kûbûgambithia. Mûgambithania arî akuî gûkinya.

¹⁰Ataana na aarî ba baaba, jûkieni ngerekano ya iroria ûrîa biomîrîrie mîthangîko rîrîa biaaragia riîtweene rîa Mwathani.

¹¹ Twîtaga antû barîa baciaandîre baroomîîria mîthangîko babatharime. Nî bûthirîtie kwigua mantû ja kûûmîîria kwa Ayubu na bwamenya ûrîa Mwathani amûthithîîrie mûthieene. Tontû Mwathani nî aiganagîîrua kîaao na nî atuganaga.

¹² Bûrîa bûnene nkûrûki ya mantû jangî jonthe, ataana na aarî ba baaba nî atî bûgaciîtagieni rîrîa bûgwîka wîrane. Bûgaciîtieni na îgûrû kana nthîgûrû kana gîntû kinya kîrîkû kîngî. Rîrîa bûgwîtîkîîria ûntû ugageni akî “Ii”, na rîrîa bûkûrega ugageni, “arî”, bûtîkeeje kûgambithua nî Mûrungu.

¹³Kûrî we gatîgatîîne keenu ûkûthangîka? Nî arombe. Kûrî weenu ûgwîrîtue? Nî aine ndwîmbo cia gûkumia Mûrungu.

¹⁴ Kûrî weenu waajîtue? Nî eete akûrû ba kanisa, nîkenda bakamûrombera na bamwake maguta riîtweene rîa Mwathani.

¹⁵Maromba ja mûthemba jûu jarîa jarombi na wîtîkio jagatûma muntû ûu waajîtue oore. Nawe Mwathani agatûma agwate inya na ningî eethîrwa kûrî meeyia athithîtie akarekerwa.

¹⁶Tontû bûû, umbûranagîreni meeyia na bûkîrombanagîra o muntû na ûngî, nîkenda bûkoorua. Maromba ja muntû ûrîa wagîrîte nî jathithagia mantû jamanene tontû bwa ûrîa jarî na inya înene.

¹⁷ Elija aarî muntû o jaatuî. Nî aarombere na wîru atî ngai îtîkaure, nayo îtaurîre nthîgûrû îgiita rîa mîaka îthatû na nusu.

¹⁸ Rîu aracoka araromba kaîrî, nayo ngai îraura înyingî mono kuuma îgûrû. Nthî nayo îroona maciara jaayo.

¹⁹Ataana na aarî ba baaba, ûmwe weenu akëeja gûtaratara akauma ûûmeene na muntû ûngî gatîgatîîne keenu akamûcokia kaîrî,

²⁰ ririkaneni ûjû: o muntû ûrîa ûgatûma mwîyia atigane na ûthûûku bwaawe, akoonokia ûtûûro bwa mwîyia ûu kuuma gîkuûne na atûme meeyia jamaingî mono jarekerwe.