Read KIMERU BIBLE PROTESTANT EDITION 1Pet 1 Bible Online

1Pet 1 - KIMERU BIBLE PROTESTANT EDITION bible

1Pet 1

¹Nî ni Peterû mûtûmwa wa Jesû Kristû, nkûbwaandîkîra buî antû barîa bathuuri nî Mûrungu barîa bûtûûraga bûrî mpinga narîa bûnyaganîte nthîgûrû cia Pontu na Galatia na Kapadokia na Asia na Bithinia.

²Nî bwî barîa Mûrungu Baaba aathuurîre kûringana na meerekeeria jaawe. Mûrungu nî abweethetie babatheru na njîra ya Roho waawe nîkenda bûkaathîkagîra Jesû Kristû na bûtherue nî tharike yaawe. Ûtugi na thîîrî birokaraga naabuî kwa wingî.

³Mûrungu, Îthe wa Mwathani weetû Jesû Kristû arokumagua! Tontû bwa kîaao kîaawe gîkiingî nî tûciarîtwe rîa jaîrî nîûntû bwa Mûrungu kûriûkia Jesû Kristû kuuma kîrî akuû. Ûntû bûu nîbu bûtûmaga tûkara na wîrîgîîro bwa mma,

⁴na tontû bûû, nî twetagîîra kwîja kûewa itharimo birîa bitîthiraga birîa Mûrungu eekîrîte antû baawe. Itharimo biu Mûrungu abwîkîrîte kûu îgûrû arîa bitîûmba kwora kana bithûûka kana bithira ûthongi bwaabio.

⁵Nî bieenu buî barîa tontû bwa wîtîkio bweenu bûkaragua nî inya ya Mûrungu nîkenda bwîja kwoona wonokio bûrîa bûthuranîri bwa kwîja kûguûrwa îgiita rîa mûthia rîakinya.

⁶Gwîragueni nîûntû bwa ûntû bûu kinya këethîra nandî kwombîka bûkoona mîthangîko ya mîthemba îmiingî antû a kagiita gagakai.

⁷Gîtûmi kîa mîthangîko îîu nî kûrikithia këethîra wîtîkio bweenu nî bwa mma. Kinya thaabu îrîa yûmba kwînyanga, nî îgeragua na mwanki yoonwa këethîra nî înjega. Ûu nou wîtîkio bweenu bûrîa bûrî goro nkûrûki ya thaabu, bûgeragua nîkenda bûkooneka këethîra bûrî na inya. Rîu nîrîo buî bûkeeja kûewa ûkumio na mwago na gwîkîîrwa Ntukû îrîa Jesû Kristû akaguûrwa.

⁸Buî nî bûmwendeete o na këethîra bûtaamwona. Ningî nî bûmwîtîkîtie o na këethîra bûtîkûmwona nandî. Tontû bûu buî bûrî na kûgwîrua gûkûnene na gwa gûkaathwa kûrîa gûtîona nteto cia kwîrana ûrîa gûkari.

⁹Kuumania na wîtîkio bûu bweenu nandî buî nî bûkwona wonokio bwa mîoyo yeenu.

¹⁰Iroria birîa biaroretie mantû ja wonokio bûrîa bûkorweja kûewa nî biacûnkûûnîte na biorithîria mantû ja kîewa gîkî bwaarî aaewa nî Mûrungu îgiita rîakinya.

¹¹Iroria biu nî biagererie kûmenya îgiita rîongwa nîrî na nîatîa rîkeeja rîkari. Îgiita rîu narîo rîaarî îgiita rîrîa Roho wa Kristû ûrîa waarî ndeene yaabio aabionagîîria ûrîa rîgakara na agatûma iroria biu bigweta mîthangîko îrîa Kristû akorweja kwona na ûkumio bûrîa bûkathingatana na mîthangîko îîu.

¹²Ningî iroria biu nî biaguûrîîrwe atî ûntû bûu baaroragia bûtaarî bwa kûbaguna îndî bwaarî bwa kûbûguna. Ûntû bûu baarîtie mantû jaabu, nî bûrîa buî nandî bûthirîtie kwigua kuuma kîrî atûmwa barîa baabûtûmîrîîrie Nteto Injega ndeene ya inya ya Roho Ûmûtheru ûrîa waatûmi kuuma îgûrû. Mantû jau nî jarîa kinya araîka bairîragîîria kûmenya.

¹³Tontû bûû, ithuranîreni na bûkarage bûciûki na ningî bwîke wîrîgîîro bweenu bunthe kîrî ûtugi bûrîa bûkaewa rîrîa Mwathani Jesû Kristû akaaguûrwa.

¹⁴Nîkwîthîrwa bûrî aana ba Mûrungu barîa bamwathîkagîra, bûgeetîkîreni kwathwa nî mairîrîîria jarîa bwaarî najo rîrîa gûtî u bwaijî.

¹⁵Eeni babatheru mîtîreene yeenu yonthe o ta ûrîa Mûrungu ûrîa waabwîtîre arî ûmûtheru.

¹⁶ Tontû nî kwaandîki atîrî, “Eeni babatheru tontû ûûni ndî ûmûtheru.”

¹⁷Îgiita rîrîa bûkûromba bwîtaga Mûrungu Baaba. Nawe agitagîra antû bonthe magamba atîkwendeera, akagambîra o muntû kûringana na mathithio jaawe. Tontû bûû îtageni na mîîtîre ya gûkîra Mûrungu îgiita rîonthe rîrîa bûgatûûra nthîgûrûûne.

¹⁸Buî nî bwijî atî bûtaakûûrîrwe na into ta fetha na thaabu birîa biînyangaga kuuma mîtîreene ya ûtheri îrîa bwaagwatîre kuumania na biûjûjû bieenu.

¹⁹Îndî bwakûûrîrwe na tharike ya goro ya Kristû, ûrîa wakari ta kang'ondu karîa gatî îgi kana gatûmba.

²⁰We aathuuri nî Mûrungu mbere ya nthîgûrû yûmbwa, îndî araguûrwa matukûûne jaja ja mûthia nîûntû bweenu.

²¹Tontû bwaawe buî nî bwîtîkîtie Mûrungu ûrîa wamûriûkîrie kuuma kîrî akuû na aramûnenkera ûkumio nîkenda wîtîkio na wîrîgîîro bweenu kîrî Mûrungu bûriika.

²²Nandî nîûntû nî bûtheretie mîoyo yeenu na njîra ya kwathîkîra ûûma nîkenda bûkendaga ataana na aarî ba baaba bangî na wendani bûtî na waayia, endanageni o muntû na ûngî na wendani bûrîa buumîte nkoroone.

²³Buî nandî nî bûthirîtie gûciarwa kaîrî. Bûtîciari kuumania na mûciari ûrîa ûkujaga îndî bûciari nî rûteto rwa ûtûûro rwa Mûrungu.

²⁴ Tontû Maandîko jariuga, “Antû bonthe bakari ta nyaki na ûthongi bwaao bunthe nî ta bwa marao ja kîthaka. Nyaki ka inyaaraga na maûa jagetîka,

²⁵îndî rûteto rwa Mwathani rûtûûraga kenya na kenya.” Rûteto rûu nî Nteto Injega irîa buî bwaatûmîrîîrue.