Read KIMERU BIBLE PROTESTANT EDITION 1Pet 3 Bible Online

1Pet 3 - KIMERU BIBLE PROTESTANT EDITION bible

1Pet 3

¹ Buî eekûrû, inyiiagieni kîrî akûrû beenu. Ûntû bûu nîbu bûgatûma bamwe baao barîa batîtîkîtie rûteto bagarûka nîûntû bwa mîtîre ya eekûrû baao batîarîrîtue,

² boona ûrîa mîîtîre ya eekûrû baao îrî ya ûtheru na ya gûkîra Mûrungu.

³Kwigemia kweenû gûkéethîrwa kûrî kwa mwîrî ta kwîînda nchiûri na kwigemia na into bia thaabu na gwîkîra nguû cia goro.

⁴Îndî kwigemia kweenu nî kwîthîrwe kûrî gwa nkoro ndeene. Into bieenu bia kwigemia nî biîthîrwe birî birîa bitîînyangaga nabio nî mûtûûrîre jwa ûboreri na ûkiri. Mantû jau nîjo jarî gîtûmi mono mbere ya Mûrungu.

⁵Ûu nîu eekûrû bamwe barîa baatwîre karaaja barîa baakaraga beerîgîîrîte Mûrungu baigemagia. Nabo baatûûraga bainyiîtie kîrî akûrû baao.

⁶ Ûu nîu Sara aathîkaga kîrî Abrahamu akîmwîtaga mwathi waakwa. Naabuî nandî bûrî aana ba Sara bwatua kûthithagia ûrîa kwagîrîte na bweethîrwa bûtîreka bûguawua nî ûntû kinya bûrîkû.

⁷ Naabuî akûrû bûbuîri gûtûûrania na eekûrû beenu bwega bûkîmenyaga atî batî na inya taabuî. Batîîageni tontû kinya bo nî baeei kîewa kîa ûtûûro nî Mûrungu o ûmwe naabuî. Thithagieni ûu nîkenda maromba jeenu jatîkeeje kûrigîîrua.

⁸Mûthieene, ataana na aarî ba baaba, ndîbwîra ûjû: nî bûbuîri kwîthîrwa bûrî na yerekeeria rîmwe. Iganagîîrueni kîaao na bwendanage ta aana ba ng'ina ûmwe. Ningî bwîthîrwe bûrî na nkoro ibooreri na bûkinyiiagia o muntû kîrî ûngî.

⁹Bûkárîagieni ûûî na bûngî. Ningî bûkárîagieni kîrumi na kîngî. Îndî antû a kûthithia ûu, tharimanageni tontû ûntû bûu nîbu bwîtîri bûtua kûthithagia nîkenda kinya buî bûkeeja kwona kîtharimo.

¹⁰ Tontû Maandîko jaugîîte, “Muntû ûrîa ûkwenda kwona ûtûûro, na ntukû ciaawe ciîthîrwe îrî injega, nî abuîri kûmenyeera rûûme rwaawe rûtîkeeje kwaria ûntû bûbûûî na kanyua kaawe gatîkeeje kwaaria ûrongo.

¹¹Abuîri gûtigana na ûthûûku na athithie ûrîa kwagîrîte; nî acwaage thîîrî na athingatanage nayo.

¹²Tontû meetho ja Mwathani jakaraga jaraithîrîtie antû barîa bagîrîte, najo matû jaawe jakaraga jathikîîrîte maromba jaao. Îndî Mwathani nî areganaga na antû barîa bathithagia ûthûûku.”

¹³Nandî rî, nûû ûûmba kûbûthûûkia këethîrwa bûrî na wîru bwa kûthithia ûrîa kwagîrîte?

¹⁴ Îndî kinya bûkëeja kûthangîkua tontû bwa kûthithia ûrîa kwagîrîte, Mûrungu akabûtharima. Bûkábakîreni kana bûthangîka.

¹⁵Îndî buî tîîageni Kristû arî Mwathani nkoroone cieenu. Karageni bwithuranîrîte gûcokeria wonthe ûrîa ûûmba kûbûria mantû jegiî wîrîgîîro bûrîa bûrî nabu. Thithagieni ûu bûrî na ûkiri na gîtîîo.

¹⁶Karageni bûtî na ûntû bwa kûbûgambithia nkoroone cieenu nîkenda kinya rîrîa bûkarumwa, bau bakûbûruma bacokerwe nî nthao boona mathithio jeenu jameega jarîa bûthithagia bûrî ndeene ya Kristû.

¹⁷Tontû nî kaaba kûthangîkua nîûntû bwa kûthithia ûrîa kwagîrîte këethîrwa bûu nîbu wendi bwa Mûrungu nkûrûki ya kûthangîkua nîûntû bwa kûthithia ûthûûku.

¹⁸Tontû kinya Kristû ka aakuîre nîûntû bwa meeyia jeetû rîmwe rîonka. We ûrîa waarî ûmwagîru arakua nîûntû bwa antû barîa bataagîrîte nîkenda agatûreeta kîrî Mûrungu. We nî aakuîre mwîrî îndî aragîa ûtûûro ndeene ya Roho.

¹⁹Areeta gûtûmîîria roho irîa ciatheeki.

²⁰ Roho iu nî cia barîa bataathîkîrîte Mûrungu îgiiteene rîa Noa rîrîa Mûrungu eeteerete aboorerete ntukûûne irîa Noa aakaga sabina. Antû babakai barîa baatonyere sabineene, nabo nî antû banana, nîbo boonokere rûûjî rwa îkondoria.

²¹Kwonokua kûu kwaao kûraa rwano rwa kwonania gûkeeja ûbatithio bûu buî bwonoketue nabu nandî. Naku kwonokua kûu tî kûthambua rûko rwa mwîrî, îndî ûrîa gûkari nî kwerenca Mûrungu nîkenda agatwaa mathûgaanio jamakembûku kuumania na kûriûka kwa Jesû Kristû,

²²ûrîa waitîrie îgûrû na ûkari rûteere rwa njara ya ûrîo ya Mûrungu akîathaga araîka na athani na mainya jonthe.